قوستاناي. 24 مامىر. قوستانايدا ونەر مەن عىلىمداعى دارىندارعا, مادەنيەت, ءبىلىم سالاسى قىزمەتكەرلەرىنە «مەتسەناتتار كلۋبىنىڭ» سىيلىعى تاپسىرىلدى. قوستانايدىڭ اتىمتاي-جومارت كاسىپكەرلەر مادەنيەت پەن ونەر سالاسى, شىعارماشىلىق وكىلدەرىن بيىل ون بەسىنشى جىل قولداپ كەلەدى. بۇل تۋرالى egemen.kz ءتىلشىسى حابارلادى.
«مەتسەناتتار كلۋبى» سىيلىعىنىڭ شىعارماشىلىق وكىلدەرىنە ون بەسىنشى رەت تاپسىرىلۋ سالتاناتىنا قاتىسقان وبلىس اكىمى نۇرالى سادۋاقاسوۆ مەرەيلى مەركەمەن كاسىپكەرلەردى دە, ونەر مەن مادەنيەتتەگى دارىنداردى دا قۇتتىقتادى. نۇرالى سادۋاقاساوۆ: «وسى كەزگە دەيىن مەتسەناتتار كلۋبى» 369 سىيلىق بەردى, ونى 372 لاۋرەات الدى. 35 ونەر ۇجىمى سىيلىقپەن ماراپاتتالدى. «مەتسەناتتار كلۋبى» ەل ەڭسەسىن كوتەرە قويماعان 2000-شى جىلى قۇرىلعان بولاتىن. ول كەزدە شىعارماشىلىق ادامدارى قارجىعا, كومەككە ءزارۋ بولدى. ال بۇگىن «مەتسەناتتار كلۋبى» سىيلىعىنىڭ ماقساتى باسقا, ول لاۋرەاتتاردىڭ ونەرگە, مادەنيەتكە, بىلىمگە, عىلىمعا, سپورتقا, الەۋمەتتىك باسقا سالالارعا سىڭىرگەن ەڭبەگىن باعالايدى. قازىر دە ۋاقىت جەڭىل ەمەس, بىراق مەتسەناتتار قاي ۋاقىتتا دا مەتسەنات بولىپ قالا بەرەدى. بىزدەگى شىعارماشىلىق وكىلدەرى مەتسەنات كاسىپكەرلەرگە راحمەت ايتۋى ءتيىس. ولاردىڭ كوپشىلىگى اۋىل شارۋاشىلىعىندا ىستەيدى. سىرتقى جاعدايلاردىڭ اسەرىنەن ەكونوميكا دا اۋىر جاعدايدى باستان كەشىپ وتىر, سونىمەن قاتار توللاسسىز جاڭبىر ديقانداردىڭ قولىن ءجىپسىز بايلاپ وتىر. مۇنىڭ بارلىعىن دا كاسىپكەرلەر جەڭەدى جانە حالقىمىز رۋحانياتىنا قىزمەت ەتەتىن ونەر مەن مادەنيەت, عىلىم وكىلدەرىنە قول ۇشىن سوزا بەرەدى» دەدى.
مۇنان كەيىن «مەتسەناتتار كلۋبىنىڭ» «قازىنا» جانە «شابىت» سىيلىقتارى «ادەبيەت», «مادەني مۇرا», «عىلىم», «ءبىلىم», «حورەوگرافيا», «تەاتر», «ۆوكال», «جۋرناليستيكا», «اۋىل ونەرپازى», «ونەر ۇجىمىنىڭ جەتەكشىسى», «مۋزىكا ونەرى» دەگەن بىرنەشە اتالىمدار بويىنشا تاپسىرىلدى. ولاردىڭ اراسىندا قولونەرشى جانە ەتنوگراف ءشوپتىباي ءبايدىلدين, ساقتاعان دوسمۇحامبەتوۆ, اكتەر قونىسبەك بەگايداروۆ, فيلولوگيا عىلىمدارىنىڭ دوكتورى الماس ابسادىقوۆ, بىلىكتى ۇستاز نيكولاي كوچين, مۋزىكانت سۆياتوسلاۆ ستاكانوۆ, كومپوزيور گەننادي سەدوۆ, مۇرات حاميتوۆ, ونەر ستۋدياسىنىڭ جەتەكشىسى ءاسيا بەركەنوۆا, ءانشى گۇلميرا ۇمبەتوۆا, جۋرناليستەر تاتيانا باشكاتوۆا, گۇلجىبەك بەكمۇحامبەتوۆا تاعى باسقالار بار.
ەسكە سالا كەتسەك, 2000-شى جىل ەلىمىزدە مادەنيەت جىلى دەپ بەلگىلەنگەن بولاتىن. ەلباسى ن.نازارباەۆ كاسىپكەرلەرگە شىعارماشىلىق وكىلدەرىن قولداۋدى ۇسىنعان ەدى. سول جىلى قوستاناي وبلىسىنىڭ اكىمى بولىپ تۇرعان ومىرزاق شوكەەۆتىڭ باستاماسىمەن وبلىستا «وبلىس اكىمى سىيلىعى» تاعايىندالىپ, كەيىنىرەك ول «مەتسەناتتار كلۋبى» بولىپ قۇرىلدى. ونى بەلگىلى شارۋاشىلىق ۇيىمداستىرۋشى, كاسىپكەر, «يۆولگا» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ۆاسيلي روزينوۆ باسقاردى. مىنە, سودان بەرى اتىمتاي جومارتتار ونەر مەن مەن مادەنيەت, ءبىلىم مەن عىلىم, سپورت سالالارى وكىلدەرىنە 100 ميلليون تەڭگەنىڭ سىرتىندا كومەك بەردى.
ءنازيرا جارىمبەتوۆا.
دەرەك, سۋرەت: egemen.kz
