سولتۇستىك قازاقستاندا ءىرى قارا مالى برۋتسەللەزگە شالدىقتى

پەتروپاۆل. 24 مامىر. قىزىلجار اۋدانىنا قاراستى سەميپولاتنوە اۋىلىندا 35 ءمۇيىزدى ءىرى قارا مالىنان برۋتسەللەز تاياقشالارى تابىلۋىنا بايلانىستى كارانتين جاريالانىپ, ءسۇت, ەت ونىمدەرىن ساتىپ الۋعا تىيىم سالىندى. بۇل تۋرالى كتك تەلەارناسى حابارلادى. الايدا, مال يەلەرى قوسىمشا ساراپتاما جاساۋدى تالاپ ەتىپ, اۋرۋ مالداردى وتكىزۋدەن ءۇزىلدى-كەسىلدى باس تارتىپ وتىر. «وتكەن اپتادا مال دارىگەرلەرى اۋرۋ سيىردى الىپ كەتتى. ەندى بۇزاۋىن دا كۇشتەپ الماقشى. وسىنشاما مالدىڭ برۋتسەللەزگە شالدىققانىنا سەنبەيمىز. مۇنىڭ ءبارى ويدان شىعارىلعان جالا. كۇدىكتەنسە, نەگە ەكىنشى رەت قان المايدى؟», دەيدى پەتروۆتار وتباسى. راسسۆەت اۋىلدىق وكرۋگىنىڭ اكىمى قايسا جاڭابەكوۆتىڭ ايتۋى بويىنشا   العاشقى تەكسەرۋدە 180 باس مالدىڭ 34-نەن اۋرۋ شىققان. 20 مال ەتكە وتكىزىلىپ, ءار كيلو ەت ءۇشىن 500 تەڭگەدەن وتەماقى تولەنگەن.  ايعاي-شۋدى وتەماقىنى ازسىنىپ جۇرگەندەر كوتەرىپ جۇرگەن كورىنەدى. اۋرۋ مالدى جايىلىمعا شىعارۋعا دا تىيىم سالىنعان. ايتپەسە 40 مىڭ تەڭگە مولشەرىندە ايىپپۇل سالىنادى. مالدان برۋتسەللەز تاياقشالارى انىقتالىسىمەن 15 كۇننىڭ ىشىندە كوزى جويىلۋى ءتيىس. الدىن الۋ شارالارى جەدەل قاراستىرىلماسا, ادامدارعا دا جۇعىپ, ىندەتكە اينالىپ كەتۋى عاجاپ ەمەس. اۋىل تۇرعىندارىنىڭ ءبىرى ءاليا الكينا كارانتين جاريالانعالى ەتتى دە, ءسۇتتى دە ەشكىم قابىلداماي جاتقانىن,بالا-شاعا ناپاقاسىن ءتورت ت ۇلىكتەن ايىرىپ وتىرعان تۇرعىنداردىڭ كۇنكورىسى قيىنداپ كەتكەنىن جىلامسىراي جەتكىزدى. مال دارىگەرلەرى اۋرۋ مالداردىڭ ءبارى اكەتىلگەن سوڭ تاعى دا تەكسەرۋ شارالارىن جۇرگىزىپ, ەگەر دەرت انىقتالماسا, كارانتيندى الىپ تاستاۋعا ۋادە بەرىپ وتىر. ازىرگە ەكى تاراپ ءبىر-ءبىرىن كىنالاۋمەن ءجۇر. ءومىر ەسقالي. دەرەك: كتك تەلەارناسى. سۋرەت: egemen.kz