باس ۇيىم وكىلىمەن كەزدەستى

سەنات توراعاسى قاسىم-جومارت توقاەۆ بۇۇ باس حات­شىسىنىڭ گۋمانيتارلىق ماسەلەلەر جونىندەگى وكىلى ابدۋللا ماتۋك ءال-ماتۋكتى قابىلدادى, دەپ حابارلادى وسى پالا­تانىڭ ءباسپاسوز قىزمەتى. سەنات توراعاسى بۇۇ-عا قاتىستى قازاقستاننىڭ كوزقاراسى تۋرالى جۇزدەسۋشىگە جان-جاقتى اڭگىمەلەدى. «قازاقستان ايماقتىق قاۋىپسىزدىكتى قامتاماسىز ەتۋدە ەلەۋلى ءرول اتقارا وتىرىپ, گۋمانيتارلىق سالاداعى حالىقارالىق ىنتىماقتاستىقتى ەداۋىر ۇلعايتتى, ول اۋعانستان, سيريا, پاكىستان, ورتالىق ازيا ەلدەرى جانە وزگە بىرقاتار مەملەكەتتەرگە كومەك بەرۋدە كورىنىس تاپتى», – دەدى. قازاقستان پارلامەنتى جوعارى پالاتاسىنىڭ توراعاسى الماتىدا ايماقتىق حاب نەگىزىندە بۇۇ گۋمانيتارلىق قۇرىلىمدارىنىڭ قىزمەتىن كەڭەيتۋدى ۇسىندى. توراعا, سونداي-اق, بۇۇ وكىلىنە ءبىزدىڭ ەلىمىزدەگى رەفورمالار تۋرالى ايتتى جانە كورنەكتى رەفورماتور, يادرولىق قارۋدى تاراتپاۋعا ءارى حالىقارالىق قاۋىپسىزدىكتى نىعايتۋعا زور ۇلەس قوسقان مەملەكەت قايراتكەرى رەتىندە شەتەلدەردە جاقسى بىلەتىن ەلباسىنىڭ كوشباسشىلىق ءرولىن اتاپ ءوتتى. ق.توقاەۆ الەمدىك جانە ءداستۇرلى دىندەر ليدەرلەرىنىڭ سەزدەرى تۋرالى جۇزدەسۋشىنى ەگجەي-تەگجەيلى حاباردار ەتتى. ا.ءال-ماتۋك بۇۇ باس حاتشىسى پان گي مۋننىڭ ىزگى تىلەكتەرىن جەتكىزدى جانە يادرولىق قارۋدى تاراتپاۋ, حالىقارالىق قاۋىپسىزدىكتى نىعايتۋ مەن دىنارالىق ۇنقاتىسۋدى دامىتۋ سالاسىنداعى پرەزيدەنت ن.نازارباەۆتىڭ حالىقارالىق كۇش-جىگەرىنە قولداۋ ءبىلدىردى. بۇۇ باس حاتشىسىنىڭ وكىلى شيەلەنىس سالدارىنان اۋقىمى زور گۋمانيتارلىق اپاتقا ۇشىراعان سيرياعا كومەك كورسەتۋ ءۇشىن دونورلاردىڭ ءتورتىنشى كونفەرەنتسياسىنا ازىرلىك تۋرالى حابارلادى. كۋۆەيت ءامىرىنىڭ شتاتتان تىس كەڭەسشىسى بولىپ تابىلاتىن ا.ءال-ماتۋك تاياۋ ارادا سيريا بوسقىندارى 15 ميلليونعا جەتۋى ىقتيمال دەپ سانايدى. 24 قازاندا اتالىپ وتەتىن بۇۇ-نىڭ 70 جىلدىعى قارساڭىندا جۇزدەسۋشىلەر حالىقارالىق وزەكتى ماسەلەلەردى رەتتەۋدەگى وسى امبەباپ ۇيىمنىڭ جەتەكشى ءرولىن نىعايتۋدىڭ ماڭىزىن اتاپ ءوتتى.