جوبا ماقساتى ء–تيىمدى باسقارۋشىلاردى قالىپتاستىرۋ

كەشە ەلوردادا «جاستاردىڭ كادرلىق رە­زەرۆى» (جكر) پارتيالىق جوباسىنىڭ ءىىى ءبىلىم بەرۋ ءمودۋلىنىڭ اشىلۋ سالتاناتى بولىپ, وندا جاس ۇمىتكەرلەردىڭ ءبىلىم-بىلىكتەرىن جەتىلدىرۋگە ۇلكەن مۇمكىندىكتەر اشىلدى. مۇنداي جوبا جاستاردىڭ تۇلعا رەتىندە قالىپتاسۋىنا وزىندىك سەرپىن بەرۋى ءتيىس. ۇستىمىزدەگى جىلى اتالعان جوباعا 3000-عا جۋىق ادام قۇجات تاپسىرسا, سونىڭ ىشىندە 32 ۇمىتكەر قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسى مەن «نۇر وتان» پارتياسى ساياسي مەنەدجمەنت مەكتەبىنىڭ اياسىندا بىلىمدەرىن جەتىلدىرەتىن بولادى. ولار ءۇشىن ءارتۇرلى كەزدەسۋلەر, پىكىرتالاستار, سەمينارلار مەن شەبەرلىك-ساباقتارى جانە دارىستەر ۇيىمداستىرىلادى. ال دارىستەردى ۇلتتىق كومپانيالاردىڭ توپ-مەنەدجەرلەرى, بىلىكتى باپكەرلەر, مەملەكەتتىك قىزمەتشىلەر مەن بەلگىلى باپكەرلەر, قوعام قايراتكەرلەرى جانە ەڭ تابىستى دەگەن كاسىپ يەلەرى جۇرگىزەدى دەپ كۇتىلۋدە. بۇل ورايدا, «جاستار كادرلىق رەزەرۆى» جوباسى جۇزەگە اسىرىلا باستاعالى بەرى كوپتەگەن قاتىسۋشىلار ءارتۇرلى جەتىستىكتەرگە قول جەتكىزىپ كەلە جاتقانىن ايتا كەتۋ كەرەك. «نۇر وتان» پارتياسى «جاس وتان» جاس­تار قاناتىنىڭ توراعاسى شاحماردان بايمانوۆتىڭ سوزىنە قاراعاندا, جوبانىڭ ارقاسىندا كوپتەگەن جاستاردىڭ قىزمەتتەرى جوعارىلاعان, سونىمەن قاتار, ولار بيزنەس سالاسىنىڭ جەتەكشىلەرى دە بولىپ, ءماسليحات دەپۋتاتتىعىنا دا قول جەتكىزىپتى. جاستاردىڭ كاسىبي دەڭگەيىن كوتەرەتىن جوباعا ىرىكتەۋ وڭىرلەردە ەكى كەزەڭ بويىنشا جۇرگىزىلىپ, وعان قاتىسۋشىلار ءوز جوبالارىن قورعاۋ ءۇشىن بارىن سالىپتى. جالپى, جوبا جاستارعا مەملەكەتتىك باسقارۋ سالاسىندا مول اقپارات بەرىپ, ولاردىڭ تۇلعا رەتىندە قالىپتاسۋى مەن مول مۇمكىندىكتەرىن اشۋعا, سونداي-اق, بىلىكتىلىكتەرىن تاجىريبەدە قولدانۋعا مول مۇمكىندىك بەرەدى. پارتيانىڭ جاستار قاناتى توراعاسىنىڭ سوزىنە قاراعاندا, بىلىمدەرىن جەتىلدىرگەن جاستار ارتىنان مەملەكەتتىك ورگاندارعا, ۇلتتىق كومپانيالارعا, بيزنەس سەكتورىنا تاعىلىمدامادان ءوتۋ ءۇشىن جىبەرىلەتىن بولادى. سونداي-اق, توراعا «جاستار كادرلىق رەزەرۆى» جوباسى كاسىبي ءوسۋ جولىنداعى ءتيىمدى ساتى ەكەندىگىن دە ەرەكشە اتاپ كەتتى. نەگىزىنەن, جوباعا قاتىسۋشىلار مامان رەتىندە قالىپتاسقان جانە بولاشاعى ءۇشىن كاسىبي جاعىنان دامۋعا بەت العان ازاماتتار ەكەنى دە اتالماي قالمادى. جانە دە جوباعا قاتىسۋشىلار ءبىلىم مەن تاجىريبە جيناقتاۋمەن قاتار, ءار سالا بويىنشا وزدەرىنىڭ قىزىقتى جوبالارىن دا جۇزەگە اسىرا الادى ەكەن. سونداي جوبالاردىڭ ءبىرىن «جكر»-ءدىڭ 2015 جىلعى تۇلەگى ەۆگەني كوچەتوۆ ەلىمىزدىڭ تاريحي كەزەڭىن سيپاتتايتىن «قازاقستاندى وزگەرتكەن سوزدەر» اتتى كىتابىن جارىققا شىعارىپتى. ءبىز دالىزدە شىعىس قازاقستان وبلىسىنىڭ ءۇرجار اۋدانىنان كەلگەن مەملەكەتتىك قىزمەتشى ەربولات مۇحامەدجاندى سوزگە تارتقان بولاتىنبىز. ونىڭ ايتۋىنشا, جوباعا قاتىسۋشىلاردىڭ كوبى قىزمەتى جاعىنان وسكەن نەمەسە وزگە سالالاردا جەتەكشى ماماندار رەتىندە قالىپتاسقان ازاماتتار. سوندىقتان دا, ول ءوزىنىڭ مەملەكەتتىك قىزمەتتەگى لاۋازىمىنىڭ وسۋىنە ىقپال ەتەدى دەگەن ماقساتپەن بىلىكتىلىگىن شىڭداۋعا كەلىپتى. ەگەر مالىمەت بەرە كەتسەك, «جاستاردىڭ كادرلىق رەزەرۆى» جوباسى «نۇر وتان» پارتياسىنىڭ جانىنداعى «جاس وتان» جاستار قاناتىنىڭ ۇيىمداستىرۋىمەن, ءبىلىم جانە عىلىم مينيسترلىگىنىڭ قولداۋىمەن جۇزەگە اسىپ كەلە جاتقان جوبا ەكەندىگىن تىلگە تيەك ەتە كەتكەن ءجون. جوبانىڭ نەگىزگى ماقساتى قازىرگى زامانعا لايىق باسقارۋشىلاردى قالىپتاستىرۋ بولىپ تابىلادى. اسقار تۇراپباي ۇلى, «ەگەمەن قازاقستان».