ستەپنوگورسك قالاسىنا جاڭا اكىم تاعايىندالدى

استانا. 24 مامىر. اقمولا وبلىسىنىڭ اكىمى سەرگەي كۋلاگين ستەپنوگورسك قالاسىنا جاساعان ءىسساپارى بارىسىندا ءماسليحاتتىڭ كەزەكتەن تىس سەسسياسىن وتكىزىپ, وندا قالانىڭ جاڭا باسشىسىن تاعايىندادى. دەپۋتاتتاردىڭ الدىندا وبلىس اكىمى جاڭا قىزمەتكە وتىرعان ءانۋار كۇمپەكەەۆتى تانىستىردى. بۇل تۋرالى zakon.kz حابارلادى. سەرگەي كۋلاگين ءماسليحات دەپۋتاتتارىنا پرەزيدەنت اكىمشىلىگىنىڭ كەلىسىمىمەن ستەپنوگورسك قالاسىنىڭ اكىمى بولىپ ءانۋار كۇمپەكەەۆ تاعايىندالعانىن مالىمدەدى. سەسسيادا وبلىس اكىمى جاڭا باسشىنىڭ مول تاجىريبەلى, جەتەكشىلىك قابىلەتى جوعارى, ىسكەر ازامات ەكەنىننە ەرەكشە توقتالدى. سونداي-اق, سەرگەي كۋلاگين جاڭا اكىم قالانىڭ دامۋىنا ايانباي ەڭبەك ەتىپ, حالىقپەن تىعىز بايلانىس ورناتىپ, جۇمىس جاسايدى دەپ سەنىم ءبىلدىردى. ايتا كەتەيىك, ءانۋار كۇمپەكەەۆ 1984 جىلى تۋعان. 2005 جىلى ماسكەۋدەگى ميحايل لومونوسوۆ اتىنداعى مەملەكەتتىك ۋنيۆەرسيتەتتىڭ ەكونوميست باكالاۆر ماماندىعىن بىتىرگەن. ال 2007 جىلى ۇلىبريتانيانىڭ برەدفور ۋنيۆەرسيتەتىندە ەكونوميكا سالاسى بويىنشا ماگيستراتۋرانى تامامداعان. سونىمەن قاتار, «بولاشاق» باعدارلاماسىنىڭ تۇلەگى. ءانۋار كۇمپەكەەۆ ەڭبەك جولىن 2005 جىلى قازاقستان رەسپۋبليكاسى دەنساۋلىق ساقتاۋ مينيسترلىگى قارجى جانە ەكونوميكا دەپارتامەنتىندە جەتەكشى مامان بولىپ باستاعان. سونداي-اق, ول ءتۇرلى قىزمەتتەردە ابرويلى جۇمىس ىستەگەن. 2012 جىلدان وسى كۇنگە دەيىن ستەپنوگورسك قالاسى اكىمىنىڭ ورىنباسارى قىزمەتىن اتقارىپ كەلدى. سەسسيادان سوڭ وبلىس اكىمى سەرگەي كۋلاگين قالا اكتيۆتەرىمەن جيىن وتكىزىپ, جاڭا باسشىنى تانىستىردى. تالعات رايىمبەك. دەرەك, سۋرەت: zakon.kz.