سىرداعى سونى سەرپىلىس

قىزىلوردا وبلىسىنىڭ اكىمى قىرىمبەك كوشەرباەۆ «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ پرەزيدەنتى ساۋىتبەك ابدراحمانوۆتى قابىلدادى. ەلباسىمىزدىڭ «سىر – الاشتىڭ اناسى» دەگەن ءسوزى بارشاعا بەلگىلى. ماعجان اقىننىڭ «كوپ تۇرىك ەنشى الىسىپ تاراسقاندا, قازاقتا قارا شاڭىراق قالعان جوق پا؟» دەيتىن جىر جولدارىنداعى وراسان وقيعالار سىر بويىندا وتكەن. تۇركى حالىقتارىنا ورتاق ۇلى ويشىل قورقىت اتا بەيىتىنىڭ وسىندا ەكەندىگى دە كوپ جايدى اڭعارتادى. ءار قازاقتىڭ سىر ەلىنەن جەتەتىن جاڭالىقتارعا قۇلاق تۇرە جۇرەتىنى دە سوندىقتان. شۇكىرشىلىك, سوڭعى جىلداردا قىزىلوردا وبلىسىنىڭ ومىرىندە ايتاتىن دا, جازاتىن دا, كورسەتەتىن دە جاقسى جاڭالىقتار كوبەيىپ كەلەدى. باس باسىلىم باسشىسى س.ابدراحمانوۆ وبلىس اكىمى قىرىمبەك كوشەرباەۆپەن  اڭگىمەنىڭ باسىندا قىزىلوردانىڭ كەلبەتى كوركەيە تۇسكەنىن, جەكە سەكتورداعى تۇرعىن ۇيلەردىڭ اۋماعى دا, ايشىعى دا حالىقتىڭ ءال-اۋقاتى اناعۇرلىم ارتقانىن اڭعارتاتىنىن رازىلىقپەن ايتىپ ءوتتى. وبلىس اكىمى وڭىردەگى وركەندى وزگەرىستەر ءبىر جاعىنان ەكونوميكانى ءارتاراپتاندىرۋدىڭ, ەكىنشى جاعىنان ينۆەستورلارمەن جەمىستى جۇمىستىڭ ناتيجەسى ەكەنىنە نازار اۋداردى. ەۋروپا قايتا قۇرۋ جانە دامۋ بانكىمەن 75 ميلليارد تەڭگەگە, ازيا دامۋ بانكىمەن 171 ميلليارد تەڭگەگە شارت جاسالىپ, ولاردىڭ ءبارى دە ينفراقۇرىلىمدىق جوبالارعا باعىتتالىپ وتىر. «جول توسەلىپ, سۋ تارتىلىپ, گاز جەتكىزىلسە بولدى, قالعان شارۋا حالىقتىڭ وزىنەن-اق ارتىلمايدى, ادامعا مۇمكىندىك بەرىلگەننەن كەيىن-اق جەكە قۇرىلىس توقتاۋسىز دامي بەرەدى, ونىڭ ءبارى اينالىپ كەلگەندە قۇرىلىس ماتەريالدارىنىڭ ونەركاسىبىنە دە, جۇرتتى جۇمىسپەن قامتۋعا دا, ەل تۇرمىسىن تۇزەۋگە دە تىكەلەي اسەر ەتەدى», دەدى قىرىمبەك ەلەۋ ۇلى. گازەت باسشىسى ىسساپارعا شىعاردىڭ الدىندا ءتيىستى ورىنداردان قاجەتتى مالىمەتتەر الدىرعانىن, سوندا سوڭعى ەكى جارىم جىلدىڭ ىشىندە قىزىلوردا وبلىسىنىڭ بيۋدجەتى 2 ەسە وسكەنىنە تاڭدانعانىن جاسىرعان جوق. ءيا, سىر وڭىرىندە ەكونوميكانى ءارتاراپتاندىرۋ ەرەكشە ناتيجە بەرۋدە. مىسالى, كەيىنگى ەكى جارىم جىل ىشىندە مۇندا وڭدەۋ ونەركاسىبىنىڭ كولەمى 76 پايىزعا ارتقان, بۇل كورسەتكىش بويىنشا سىر بويى ەل كوشىن باستاپ كەلەدى. قۇرىلىس قارقىنى ءتىپتى ەرەن. ءۇي سالۋ وبلىس بويىنشا 3,5 ەسە وسكەن, ال  قىزىلوردانىڭ وزىندە… 8 ەسە ارتقان! مال باسى دا كوبەيىپ كەلەدى. بيىل سىر بويىنداعى ءتورت ت ۇلىكتىڭ سانى وبلىستىڭ 1990 جىلعى كورسەتكىشى دەڭگەيىنە تەڭەستى. ال 1990 جىل – نەگىزىنەن ەگىن جانە مال شارۋاشىلىعىمەن اينالىساتىن وسى وبلىستىڭ لەنين وردەنىن العان جىلى. قىرىمبەك كوشەرباەۆ وبلىس ەكونوميكاسىنىڭ جاڭا باعىتتارى بولىپ تابىلاتىن فەرروقورىتپا زاۋىتى, شىنى زاۋىتى, شالقياداعى تاۋ-كەن زاۋىتى سياقتى ءىرى كاسىپورىنداردىڭ مۇمكىندىگى جونىندە اڭگىمەلەدى. رۋحاني دامۋ باعىتىندا دا ىرگەلى ىستەر اتقارىلۋدا. ايتقانداي, وسى كۇندەرى وبلىستىڭ شيەلى, جالاعاش, قارماقشى اۋداندارىن ارالاعان س.ابدراحمانوۆ ساۋلەت ونەرىنىڭ ايرىقشا ۇلگىسى بولىپ تابىلاتىن قورقىت اتا ەسكەرتكىشى تۇبەگەيلى جاڭارتىلعانىنا رازىلىق ءبىلدىردى. سىر بويىنداعى سونى سەرپىلىس قاي سالادا دا كەلىستى كورىنىپ وتىر. حالقىنىڭ سانى 675 مىڭنان عانا اساتىن وبلىستا ەلدىڭ باس گازەتىن جازىلىپ الدىرۋشىلاردىڭ قاتارى كەلەر جىلى 22 مىڭ داناعا جەتەدى دەگەن بولجامنىڭ نىق سەنىممەن ايتىلعانى دا سوندىقتان. ەرجان بايتىلەس, «ەگەمەن قازاقستان». سۋرەتتى تۇسىرگەن باعدات ەسجانوۆ. قىزىلوردا وبلىسى.