پاۆلودار تۇرعىنى قارىنداسىن 500 مىڭ دوللارعا ساتپاق بولدى

پاۆلودار. 24 مامىر. پاۆلوداردا جەرگىلىكتى تۇرعىن قارىنداسىن ماسكەۋ كاسىپكەرىنە 500 مىڭ دوللارعا ساتپاق بولدى. بۇل تۋرالى قالالىق پروكۋراتۋراعا سىلتەمە جاساپ, egemen.kz ءتىلشىسى حابارلادى. پروكۋراتۋرانىڭ حابارلاۋىنشا, 18 جاستاعى قىزدى تۋىس اعاسى كۇشتەپ كۇيەۋگە بەرمەك بولعان. وسى ماقساتتا ول قارىنداسىن ۇرلاپ اكەتىپ, ءۇش كۇن ۇستاعان. سول ۋاقىتتىڭ ىشىندە قىزدىڭ 42 جاستاعى باي ماسكەۋلىككە كۇيەۋگە شىعۋعا كەلىسىمىن العان. مالىمدەمەگە سۇيەنسەك, پاۆلودار قالالىق ىشكى ىستەر باسقارماسىنىڭ وڭتۇستىك بولىمىنە 19 مامىردا ۇلكەن قىزىنىڭ ۇرلانعانىن ايتىپ, ايەل ادام ارىزدانعان. الايدا, پوليتسيا قىزمەتكەرلەرى بۇل ءىستى قابىلداۋدان باس تارتادى. سول كەزدە قىزدىڭ اناسى «نۇر وتان» پارتياسىنىڭ جەرگىلىكتى فيليالىنان كومەك سۇرايدى. پارتيا وكىلدەرى ايەلدى پروكۋراتۋراعا جىبەرەدى. «ءبىز قىزمەتكەرلەرىمىزدىڭ بىرىنە ارىزدانۋشىمەن بىرگە پوليتسيانىڭ وڭتۇستىك بولىمىنە بارۋدى تاپسىردىق. بۇل جولى ايەلدىڭ ارىزى قابىلدانىپ, «ادام ۇرلىعى» بابى بويىنشا بىرىڭعاي سوتقا دەيىنگى تەرگەۋ رەەسترىنە تىركەلدى», – دەيدى پروكۋروردىڭ ورىنباسارى ەرلان الماز ۇلى. ارادا 2 كۇن وتكەندە قىزدىڭ اناسى پوليتسەيلەردىڭ قامسىز وتىرعانىن ايتىپ, تاعى دا پروكۋراتۋراعا شاعىمدانۋعا ءماجبۇر بولادى. بۇل جونىندە پروكۋراتۋرانىڭ حابارلاماسىندا: «22 مامىردا ايەل پوليتسەيلەردىڭ قىزىن ىزدەۋگە قاتىستى ەشقانداي ارەكەت جاساماي وتىرعانىن ايتىپ كەلدى. كەيىن ءبىز قىزدىڭ قاي جەردە ەكەنىن انىقتاۋ ءۇشىن ارنايى تاپسىرما بەردىك. تەك سودان كەيىن پوليتسيا قىزمەتكەرلەرى شارا قولدانىپ, قىزدى وڭتۇستىك بولىمگە الىپ كەلدى. قازىر جابىرلەنۋشى مەن اناسى پوليتسيا بولىمىندە. جابىرلەنۋشىدەن تۇسىنىكتەمە الىنىپ, ول سۇراقتارعا جاۋاپ بەرۋدە. سونداي-اق, ۇرلاپ اكەتكەن ادامنىڭ كىم ەكەنى انىقتالۋدا. قىزدىڭ ايتۋىنشا, ءوزىن ۇرلاعان اكەسىنىڭ باۋىرى ەكەن. ول 42 جاستاعى ماسكەۋ كاسىپكەرىمەن ءوزىنىڭ قارىنداسىن قالىڭدىققا بەرۋ تۋرالى ءسوز بايلاسىپ, قالىڭ مالى رەتىندە 500 مىڭ دوللار العان», – دەلىنگەن. قىزدىڭ سوزىنە سۇيەنسەك, ول كۇيەۋ جىگىتتى ءبىر-اق رەت ينتەرنەت ارقىلى كورگەن. جەلى ارقىلى سويلەسكەن كەزدە كاسىپكەر كۇيەۋگە شىعۋ تۋرالى ۇسىنىس ايتادى. الايدا, قىز بىردەن قارسى ەكەنىن بىلدىرگەن. ناتيجەسىندە ونى جاقىن اعاسى ۇرلاپ اكەتىپ, كوندىرمەك بولعان. سونداي-اق, قىز كۇدىكتىلەردىڭ قوقاڭ-لوقى كورسەتكەنىن, ءتىپتى كەلىسپەسە اناسى مەن باۋىرىن ولتىرەتىندەرىن ايتىپ قورقىتقاندارىن جەتكىزدى. تۋعاندارىنىڭ ءومىرى ءۇشىن ول تۇرمىسقا شىعۋعا ءماجبۇرلى تۇردە كەلىسىم بەرگەن. فاريدا بىقاي. دەرەك: egemen.kz. سۋرەت: diapazon.kz.