قۇقىق قورعاۋ ورگاندارى اكادەمياسىنىڭ باسشىلىعى تانىستىرىلدى

استانا. 1 قىركۇيەك. باس پروكۋرور اسحات داۋىلباەۆ باس پروكۋراتۋرا جانىنداعى قۇقىق قورعاۋ ورگاندارى اكادەمياسىنىڭ باسشىلىعىن تانىستىردى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى. وتكەن اپتادا مەملەكەت باسشىسىنىڭ وكىمىمەن ۇلان بايجانوۆ وسى اكادەميانىڭ رەكتورى بولىپ تاعايىندالعان بولاتىن. سونىمەن قاتار, پرەزيدەنت جانىنداعى كادر ساياساتى جونىندەگى كوميسسيانىڭ كەلىسىمىنەن كەيىن باس پروكۋروردىڭ بۇيرىعىمەن ءبىرىنشى پرورەكتور لاۋازىمىنا ەركىن وڭعارباەۆ جانە پرورەكتور لاۋازىمىنا روزا دوسىمبەكوۆا تاعايىندالدى. ا.داۋىلباەۆ جوعارى وقۋ ورنىنىڭ باسشىلىعىن تانىستىرا وتىرىپ, بارلىق قۇقىق قورعاۋ ورگاندارى ءۇشىن بىرىڭعاي اكادەميا قۇرۋ جونىندەگى باستامانى ەلىمىزدىڭ پرەزيدەنتى قولداعانىن ەرەكشە اتاپ كورسەتتى. جوعارى وقۋ ورنىنىڭ قىزمەتى قۇقىق قورعاۋ ورگاندارىنىڭ جۇمىسىن بىرىڭعاي عىلىمي قامتاماسىز ەتۋگە, سونداي-اق قۇقىق قولدانۋ قىزمەتىندە پايدالانۋعا بولارلىق قولدانبالى زەرتتەۋلەر جۇرگىزۋگە مۇمكىندىك بەرەدى. وسىعان وراي, تۇڭعىش رەت ءبىر جوعارى وقۋ ورنىندا بارلىق قۇقىق قورعاۋ ورگاندارىنىڭ باسشى كادرلارىن دايارلاۋ جانە وسى سالاداعى عىلىمي زەرتتەۋلەر جۇرگىزۋ شوعىرلاندىرىلعان. بۇگىندە اكادەميانىڭ ماتەريالدىق بازاسى تىڭداۋشىلاردىڭ بىرنەشە توبىن ءبىر ۋاقىتتا ورنالاستىرۋعا مۇمكىندىك بەرەدى. اكادەميانىڭ جارعىسى, ونىڭ قۇرىلىمى, شتاتتىق كەستەسى, قىزمەتكەرلەرگە قويىلاتىن بىلىكتىلىك تالاپتارى, ماگيستراتۋرا مەن دوكتورانتۋراعا قابىلداۋ ەرەجەلەرى بەكىتىلگەن. ءبىلىم بەرۋ قىزمەتىمەن اينالىسۋعا ليتسەنزيا الىنعان. باس پروكۋرور اكادەميانىڭ باسشىلىعىنا عىلىمي-ءبىلىم بەرۋ قىزمەتىنىڭ باسىم باعىتتارىن بەلگىلەپ, سونداي-اق ۇيىمداستىرۋشىلىق مىندەتتەردىڭ كەشەنىن انىقتاپ, مەملەكەت باسشىسىنىڭ قۇقىق قورعاۋ ورگاندارى كادرلىق قۇرامىنىڭ ساپاسىن ارتتىرۋ جونىندەگى مىندەتتەرىن ءتيىمدى جۇزەگە اسىرۋدى قاماتاسىز ەتۋدى تاپسىردى. قازاقستان رەسپۋبليكاسى قۇقىق قورعاۋ ورگاندارى باسشىلىعىنىڭ پرەزيدەنتتىك رەزەرۆىندە تۇرعانداردى قوسا العانداعى قۇقىق قورعاۋ ورگاندارى قىزمەتكەرلەرىنىڭ كاسىبي دەڭگەيىن ارتتىرۋ, قۇقىق قورعاۋ قىزمەتى سالاسىنداعى ۆەدومستۆوارالىق عىلىمي زەرتتەۋلەردى جۇرگىزۋ جانە ولاردى ۇيلەستىرۋ, جوعارى وقۋ ورنىنان كەيىنگى ءبىلىم بەرۋ باعدارلامالارىن جۇزەگە اسىرۋ اكادەميا قىزمەتىنىڭ نەگىزگى باعىتتارى رەتىندە بەلگىلەنگەن. ۇ.بايجانوۆ ار جىلدارى مەملەكەتتىك ورگاندار مەن ۇلتتىق كومپانيالاردا باسشىلىق لاۋازىمداردا قىزمەت اتقارعان. اتاپ ايتقاندا, الماتى قالالىق اتقارۋ كوميتەتىنىڭ مەملەكەتتىك-قۇقىقتىق ءبولىمىنىڭ مەڭگەرۋشىسى, الماتى قالاسى ادىلەت باسقارماسىنىڭ باستىعى, مەملەكەتتىك كىرىستەر ۆيتسە-ءمينيسترى, «قازمۇنايگاز» ۇك» اق ۆيتسە-پرەزيدەنتى, «سامۇرىق-قازىنا» ۇاق» اق باسقارۋشى ديرەكتورى, قازاقستان رەسپۋبليكاسى باس پروكۋرورى اپپاراتىنىڭ باسشىسى لاۋازىمدارىندا قىزمەت ىستەگەن. ە.وڭعارباەۆ ۇلتتىق قاۋىپسىزدىك كوميتەتىنىڭ قاراعاندى جوعارى مەكتەبى باستىعىنىڭ عىلىمي جۇمىس جونىندەگى ورىنباسارى, ۇلتتىق قاۋىپسىزدىك كوميتەتىنىڭ باسقارما باستىعى, ءبىلىم جانە عىلىم مينيسترلىگىنىڭ عىلىم كوميتەتىنىڭ توراعاسى, قازاق گۋمانيتارلىق-زاڭ ۋنيۆەرسيتەتىنىڭ پرورەكتورى, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى بولىپ قىزمەت ەتكەن. ر.دوسىمبەكوۆا پارلامەنت اپپاراتىندا, پرەمەر-ءمينيستردىڭ كەڭسەسىندە, پروكۋراتۋرا ورگاندارىندا جاۋاپتى لاۋازىمدار اتقارعان. تاعايىندالعانعا دەيىن باس پروكۋراتۋرانىڭ كادر جۇمىسى دەپارتامەنتىن باسقارعان. ايدار ورىسباەۆ. دەرەك: باس پروكۋراتۋرانىڭ ءباسپاسوز قىزمەتى. سۋرەت: today.kz.