استانا. 24 مامىر. قىزىلوردا وبلىسى جاڭاقورعان اۋدانى قاقپا جايلاۋىندا ءبىرىنشى وبلىستىق مالشىلار سلەتى ءوتتى. شاراعا وبلىس اكىمى قىرىمبەك كوشەرباەۆ پەن قازاقستان رەسپۋبليكاسى اۋىل شارۋاشىلىعى ۆيتسە-ءمينيسترى ساپارحان وماروۆ قاتىستى. بۇل تۋرالى قىزىلوردا وبلىسى اكىمدىگىنىڭ ءباسپاسوز قىزمەتى حابارلادى.
تالاي جىلدان بەرى ۇمىت بولا باستاعان بۇل سلەت سىر وڭىرىندە سوڭعى رەت 1996 جىلى ۇيىمداستىرىلعان بولاتىن. سوندىقتان دا, مالشىلار مەرەكەسىنە ەلىمىزدىڭ بارلىق وڭىرىنەن اتا كاسىپتى تىرشىلىگىنىڭ وزەگىنە اينالدىرىپ وتىرعان مىڭداعان شارۋالار قاتىستى. ەكى كۇنگە سوزىلعان اۋقىمدى شارادا شارۋالار ءوزارا تاجىريبە الماستى.
اۋىل شارۋاشىلىعى ۆيتسە-ءمينيسترى ساپارحان وماروۆ: «مالشىلار سلەتىن ەگەمەندىك العالى العاشقى بولىپ قىزىلوردا وبلىسى وتكىزىپ وتىر. مۇنداي يگى باستاما ەلىمىزدەگى مال شارۋاشىلىعىن وركەندەتۋگە ۇلكەن سەپتىگىن تيگىزەتىنى ءسوزسىز. جالپى, اتالعان شارۋاشىلىقتى دامىتۋعا باعىتتالعان بىرنەشە مەملەكەتتىك باعدارلامالار بار. ونىڭ يگىلىگىن شارۋالار كورىپ وتىرعاندىعىنا كۋامىز. ايتىپ ءوتۋ كەرەك, قىزىلوردا وبلىسى قازىر «سىباعا» باعدارلاماسىن ءتيىمدى جۇزەگە اسىرىپ وتىرعان ايماقتاردىڭ كوشىن باستاپ تۇر»,– دەدى.
ال ايماق باسشىسى قىرىمبەك كوشەرباەۆ: «ەلباسىمىز نۇرسۇلتان نازارباەۆتىڭ اۋىل شارۋاشىلىعىنا دەگەن ەرەكشە ىقىلاسىنىڭ ارقاسىندا مال شارۋاشىلىعى بۇگىندە دامۋدىڭ جاڭا داڭعىلىنا شىعىپ كەلەدى. قىزىلوردادا ءىرى قارا, جىلقى جانە تۇيە باسىنىڭ سانى ەڭ بەرەكەلى 90-شى جىلعى دەڭگەيدەن اسىپ ءتۇستى. قويدىڭ سانى جاقسى قارقىنمەن وسۋدە. وسىعان سايكەس 100 توننا ءىرى قارا مال ەتىن ەكسپورتتاۋ جونىندە اۋىل شارۋاشىلىعى مينيسترلىگىمەن مەموراندۋمعا قول قويىلدى», – دەدى.
ايتا كەتەيىك, سلەتتە اۋىل شارۋاشىلىعىنىڭ ءار سالاسىندا ەڭبەك ەتىپ جۇرگەن شارۋالار ماراپاتتالدى. سونداي-اق, مەرەكەگە 50-گە جۋىق كيىز ۇيلەر تىگىلىپ, ۇلتتىق ءداستۇر ۇلىقتالىپ, ۇمىت بولعان سالتتار قايتا جاڭعىرتىلدى. شارا بارىسىندا قىز قۋ, اۋدارىسپاق, تەڭگە ءىلۋ مەن قول كۇرەسى جانە ارقان تارتۋ سياقتى ۇلتتىق ويىنداردان جارىستار ۇيىمداستىرىلسا, پالۋاندار بوز كىلەمدە كۇش سىناسىپ, تويدىڭ كوركىن كەلتىردى. مۇنان سوڭ ەڭبەككەرلەر مەرەكەسى كونتسەرتتىك باعدارلاماعا ۇلاستى.
تالعات رايىمبەك.
دەرەك, سۋرەت: قىزىلوردا وبلىسى اكىمدىگىنىڭ ءباسپاسوز قىزمەتى.
