بالاباقشاداعى مونتەسسوري ءادىسى

ونى وبلىستاعى وقۋ ۇدەرىسىنە كىرگىزەتىن مەزگىل جەتكەن سياقتى الدىمەن قۇلاعىمىزعا تاڭسىق ەستىلەتىن مونتەسسوري پەداگوگيكاسى نەمەسە مونتەسسوري جۇيەسى جايلى بىرەر ءسوز. ءار بالانىڭ جەكە تۇلعالىق قاسيەتىن وزىندىك ىرعاقتا دامىتۋعا نەگىزدەلگەن ادىستەمەنى يتاليالىق پەداگوگ ماريا مونتەسسوري ءحىح عاسىردىڭ ءبىرىنشى جارتىسىندا ويلاپ تاۋىپ, كوپشىلىككە ۇسىنعان. «التىن بەسىك» بالاباقشاسىنىڭ اشىلعانىنا كوپ بولا قويعان جوق. ونىڭ مەڭگەرۋشىسى ءمادينا دارباەۆا رەسەيدىڭ ومبى قالاسىندا وتكەن كونفەرەنتسيا كەزىندە جاڭاشىل باس­تاماعا ەرەكشە قىزىعۋشىلىق تا­نىتقان. ۋاقىتىنىڭ تىعىزدىعىنا قاراماستان مونتەسسوري جابدىق­تا­رىن شىعاراتىن فابريكاعا بارىپ, ساتىپ الۋعا كەلىسكەن. جاڭا ءادىس­تەمەنى مەڭگەرگەن مەكتەپكە دەيىنگى مەكە­مەلەردىڭ تاجىريبەسىمەن تانىسىپ, كورنەكى وقۋ قۇرالدارىن الا كەلگەن. جۋىردا بالاباقشاعا مونتەسسوري كاسىپورنىنىڭ ديرەكتورى الەكساندر ۆولوشين ارنايى كەلىپ, شەتەلدىك تاربيەنىڭ ەرەكشەلىكتەرى تۋرالى جان-جاقتى اڭگىمەلەپ بەردى. فابريكا 22 جىلدان بەرى جۇمىس ىستەپ كەلەدى. باستاپقىدا بالدىرعاننىڭ ويلاۋ قابىلەتىن, ەسەپتەۋ جىلدامدىعىن, باسقا دا تۇلعالىق قاسيەتتەرىن دا­مىتۋعا ارنالعان 60-قا جۋىق ويىن­شىق بولسا, بۇگىندە ولاردىڭ سانى 700-دەن اسىپ جىعىلادى. – بۇل ءادىستىڭ ءداستۇرلى تاربيەدەن ارتىقشىلىقتارى كوپ. كوپتەگەن ەلدەردە قولدانىلادى. رەسەي مەن قازاقستانعا دا ەنگىزىلۋدە,–دەدى الەك­ساندر ۆاسيلەۆيچ اتا-انالارمەن, تاربيەشىلەرمەن كەزدەسۋدە. وبلىستا العاش قولدانىلعانىنا قارا­ماستان بالاباقشا قىزمەت­كەر­­لەرىنىڭ ءبىراز تاجىريبە جيناق­تاپ قالعانى اڭعارىلادى. 1 ميلليون تەڭگەنىڭ جابدىقتارى ورنا­تىلعان مونتەسسوري كابينەتىنە ءتار­بيەلەنۋشىلەر قۇلشىنا كەلەتىن كورى­نەدى. مونتەسسوري كابينەتىندە ساباقتاردىڭ قىزىقتى دا مازمۇندى ۇيىم­داستىرىلاتىنىنا ءبىز دە كۋا بول­دىق. بالاقايدىڭ ءوز قالاۋىمەن تاڭداۋ جاساۋىنا, ءبىر-ءبىرىن سىيلاۋ مۇمكىندىكتەرىنە جول اشۋ مونتەسسوري جۇيەسىنە ءتان سيپاتتاردىڭ ءبىرى مە دەپ قالدىق. ءبىز بالاباقشاعا باس سۇق­قانىمىزدا مۇعالىم ايگەرىم ءشارى­پوۆا بۇلدىرشىندەرگە ماتەماتيكا ءپانىنىڭ زاڭدىلىقتارىن جانە جانارتاۋ لاۆاسىمەن تاجىريبە جاساۋدى ۇيرەتىپ جاتىر ەكەن. ال, جاس تاربيەشى, قالالىق سايىستىڭ جۇلدەگەرى اسەم قابدولوۆانىڭ مونتەسسوري پەدا­گوگي­كاسىنىڭ ەلەمەنتتەرىن ەرەسەك توپتاردا ساۋات اشۋ ساباعىندا قول­دانۋى قۇپتارلىق. ونىڭ توبىندا تاربيەلەنگەن ءمادينا ساكەن 1-سى­نىپقا ارنالعان تەست تاپسىرمالارىن ورىنداۋدا ەڭ جوعارى ۇپاي جيناعان. ءادىل قانىبەك ەسىمدى ازامات ەكى ۇلى­نىڭ مونتەسسوري كابينە­تىنە بارعالى جان-جاعىنداعى قۇبى­لىس­تاردى, زاتتاردى بىلۋگە, زەرتتەۋگە دە­گەن قۇلشىنىستارىنىڭ ارتقانىن, كوپ نارسەنى اتا-انانىڭ كومەگىنسىز اتقاراتىنىن سۇيسىنە جەتكىزدى. ولاي بولسا, بالاباقشاداعى مونتەسسوري جۇيەسىن وڭىردەگى ءبىلىم بەرۋ مەكەمەلەرىنە دە ۇسىنساق, ۇتا­رىمىز كوپ. ەرباقىت امانتاي ۇلى, جۋرناليست. پەتروپاۆل.