استانا مەن الماتى تمد-نىڭ تانىمال قالالارى قاتارىنا ەندى

استانا. 23 مامىر.Travel.ru پورتالى رەسەيلىكتەردىڭ 2015 جىلى تمد ەلدەرى اراسىندا قاي قالاعا بارىپ جازعى دەمالىسىن وتكىزۋگە نيەتتى ەكەنىن انىقتادى. اتالعان پورتال ءتىپتى رەسەي حالقى ەشقانداي تۋريستىك فيرمالاردىڭ كومەگىنسىز 1-ماۋسىم مەن 31-تامىز ارالىعىندا ساياحاتتايتىن قالالاردىڭ ءتىزىمىن جاريالاپ وتىر. بۇل تۋرالى zakon.kz حابارلادى. تمد ەلدەرىنىڭ ىشىندە العاشقى وندىقتىڭ كوشىن مينسكى, ەرەۆان, باكۋ, كيشينەۆ, الماتى, كيەۆ, استانا, ۆيتەبسكى, بىشكەك جانە ودەسسا قالالارى باستاپ تۇر. اتالعان پورتالدىڭ مالىمەتىنشە رەسەيلىك تۋريستەر مينسكى قالاسىنداعى قوناقۇيدىڭ ءبىر تاۋلىگىنە 80 دوللار تولەسە, ەرەۆاندا 55, باكۋدە 60 دوللارعا تۇنەپ شىعادى ەكەن. ال ەڭ ارزان قوناقۇي كيشينەۆتا (تاۋلىگىنە 35 دوللار) بولسا, دەمالۋشىلاردىڭ قالتاسىن قاعاتىن قىمبات جاتىن ورىن استانا (تاۋلىگىنە 93 دوللار) قالاسىنا تيەسىلى. سونداي-اق, پورتال جۇرگىزگەن ساۋالناما بويىنشا رەسەيلىكتەر اتالعان قالالاردا ءبىر كۇنگى دەمالىسى ءۇشىن 3 مىڭ رۋبل جۇمسايتىنى انىقتالدى. ايتا كەتەيىك, تۋريستەر تمد ەلدەرىنىڭ ىشىندە گرۋزياعا بارىپ قارا تەڭىزگە شومىلعاندى, قىرعىزستاننىڭ ىستىق-كولىنە, قازاقستانداعى بۋراباي مەن شىمبۇلاققا, ازەربايجانداعى كاسپي تەڭىزىنە, ارمەنيانىڭ سەۆان جانە بەلورۋسسياداعى ناروچ كولدەرىنە سۋعا ءتۇسىپ, دەمالعاندى ۇناتادى ەكەن. تالعات رايىمبەك. دەرەك, سۋرەت: zakon.kz.