ۆەلوسپورت. «تۋر دە فرانس» كوپكۇندىگىنىڭ ەكى كەزەڭى ارتتا قالدى

استانا. 6 شىلدە. فرانتسيادا ۆەلوسپورتتان اتاقتى «تۋر دە فرانس» كوپكۇندىگى وتۋدە. بۇگىنگە دەيىن جارىستىڭ ەكى كەزەڭى اياقتالدى. سونىڭ قورىتىندىسى بويىنشا ازىرگە Trek ۆەلوكومانداسىنىڭ وكىلى, شۆەيتساريالىق فابيان كانچەللارا كوش باستاپ كەلەدى. بۇل تۋرالى egemen.kz حابارلادى. العاشقى كەزەڭدە سپورتشىلار جەكەلەي جارىستا باق سىنادى. بۇل سايىستا اۆستراليا سپورتشىسى روان دەننيس توپ جاردى. ول 13,8 شاقىرىمعا سوزىلعان سورە مەن مارە اراسىن 14 مينۋت 56 سەكۋندتا ءجۇرىپ ءوتتى. ال ەكىنشى كەزەڭدە قاتىسۋشىلار 166 شاقىرىمعا سوزىلعان ۋترەحت پەن نەلتە يانس قالالارى اراسىن ءجۇرىپ ءوتتى. بۇل جولى Lotto ۆەلوكومانداسىنىڭ وكىلى, نەمىس سپورتشىسى اندرە گرايپەلدىڭ مەرەيى ۇستەم بولدى. ونىڭ كورسەتكەن ناتيجەسى 3 ساعات 29 مينۋت 03 سەكۋندتى قۇرادى. سلوۆاكيا سەنىم ارتقان پەتەر ساگان (Tinkoff-Saxo) مارە سىزىعىن ەكىنشى بولىپ قيسا, ف.كانچەللارا ۇزدىك ۇشتىكتى تۇيىندەدى. بۇگىن ۆەلوسپورتشىلار ءۇشىنشى كەزەڭ ءۇشىن جارىس جولىنا شىعادى. انتۆەرپەن مەن ميۋر-دە-يۋي اراسىن جالعايتىن بۇل كەزەڭ 159,5 شاقىرىمنان تۇرادى. اتالعان دوداعا قازاقستاننىڭ Astana pro team كاسىبي ۆەلوكومانداسى دا قاتىسۋدا. ازىرگە كوماندامىزدىڭ ساپىنان ۇزدىك كورسەتكىش كاپيتان ۆينچەنتسو نيباليگە تيەسىلى. جالپى ەسەپتە 33-ورىندا تۇرعان ول كوش باسىنداعى كانچەللارادان 2 مينۋت 9 سەكۋندقا قالىپ كەلەدى. وتاندىق كوماندانىڭ قۇرامىندا نيباليدەن بولەك, لارس بۋم, ليۋۆە ۆەسترا (ەكەۋى دە – نيدەرلاندى), ياكوب فۋلسانگ (دانيا), اندرەي گريۆكو (ۋكراينا), تانەل كانگەرت, رەين تاارامياە (ەكەۋى دە – ەستونيا), ميكەلە سكارپوني (يتاليا) جانە دميتري گرۋزدەۆ (قازاقستان) بار. ەلامان قوڭىر. دەرەك: egemen.kz. سۋرەت: letour.fr.