اۋداندىق گازەتتىڭ ءوز سايتى بار

بۇگىنگى كۇن بيىگىنەن قاراعاندا رەسپۋبليكاداعى اۋداندىق گازەت­تەردىڭ جاي-كۇيى اجەپتاۋىر تۇزەلىپ قالعانىن كورەمىز. تاۋەلسىزدىكتىڭ العاشقى جىلدارىندا, سول تۇستاعى وتپەلى كەزەڭدە ەڭ الدىمەن ەلىمىزدەگى اۋداندىق گازەتتەر قيىن دا كۇردەلى جاعدايعا تاپ بولعانى بەلگىلى. وقىرمانعا ەڭ جاقىن بولىپ تابىلاتىن بۇل باسىلىمداردىڭ شىعۋ جيىلىگى ءبىر ايعا دەيىن شەگەرىلدى. ال كەڭەستىك كەزەڭدە اۋداندىق گازەتتەر اپتاسىنا ءۇش رەت شىعىپ تۇرعان بولاتىن. بۇعان مىسال رەتىندە ەلىمىزدىڭ ەڭ شالعاي وڭىرلەرىنىڭ ءبىرى – بوكەي ورداسى اۋداندىق «وردا جۇلدىزى» گازەتىن اتاۋعا بولادى. تاياۋدا وسى گازەتتىڭ شىعا باستاعانىنا 85 جىل تولدى. وسى داتاعا بايلانىس­تى گازەت رەداكتورى باۋىرجان بيسە­ن­وۆتەن شاقىرۋ العان كەزدە جەردىڭ شالعايلىعىنا قاراماستان وعان ارنايى بارىپ, اۋداندىق بۋىنداعى ارىپتەستەرىمىزدىڭ قۋانىشىنا ور­تاقتاسقاندى ءجون كوردىك. مۇندا ەڭ الدىمەن بايقاعا­نى­مىز جەردىڭ شەتى مەن جەلدىڭ وتىندە ورنالاسقان اۋداندا گا­زەتتىڭ جاي-كۇيىنىڭ جاقسى دەڭ­گەيدە ەكەندىگى. رەداكتسياعا سۋ جاڭا اۆتوكولىك بەرىل­گەن. شىعار­ماشىلىقپەن جۇمىس ىستەۋگە قاجەتتى باسقا دا جاعدايلار تۋعى­­زىلىپتى. ەڭ باستىسى «جايىق پرەسس» مەدياحولدينگىنىڭ قۇرا­مىن­داعى «وردا جۇلدىزى» گازە­تىنىڭ ءوز سايتى اشىلعان. مۇنىڭ ءوزى اۋداندىق گازەتتە جاريالانعان ماتەريالدار تورتكۇل دۇنيەگە تارالادى دەگەن ءسوز. – وبلىستاعى اۋداندىق گا­زەتتەردىڭ اراسىندا بوكەي ورداسى اۋداندىق «وردا جۇلدىزى» گازەتى العاش رەت ينتەرنەت جەلىسىنە قوسىلىپ وتىر. وسى ارقىلى مۇندا جاريالانعان ماتەريالدارمەن تانىسقىسى كەلەتىندەرگە كەڭ جول اشىلدى. ويتكەنى, ونىڭ ءوز سايتى بار. بۇل بۇگىنگى ءومىر تالابى. الداعى كەزدە وڭىردەگى بارلىق اۋداندىق گازەتتەردىڭ سايتتارىن اشۋدى ويلاس­تىرىپ وتىرمىز, – دەدى بۇل جونىندە گازەت تىلشىسىنە «جايىق پرەسس» جشس-ءنىڭ باس ديرەكتورى جان­تاس سافۋللين. تەمىر قۇسايىن, «ەگەمەن قازاقستان». باتىس قازاقستان وبلىسى, بوكەي ورداسى اۋدانى.