فۋتبول. قازاقستان كۋبوگى. جارتىلاي فينالدىق جۇپتار بەلگىلى بولدى

استانا. فۋتبولدان قازاقستان كۋبوگىنىڭ جارتىلاي فينالى ءۇشىن جەرەبە تارتۋ ءراسىمى ءوتىپ, قارسىلاستار بەلگىلى بولدى. بۇل تۋرالى قازاقستان فۋتبول فەدەراتسياسىنىڭ ءباسپاسوز قىزمەتىنە سۇيەنىپ, egemen.kz حابارلادى. جەرەبە قورىتىندىسىنا سايكەس, اتالعان كەزەڭدە الماتىنىڭ «قايراتى» قوستانايدىڭ «توبىلىمەن» كۇش سىناسادى. ال ەكىنشى جارتىلاي فينالدىق جۇپتى «اقتوبە» مەن «استانا» كوماندالارى قۇرادى. بۇل ساتىداعى تارتىس ەكى ويىننان تۇرادى. العاشقى ماتچ 2 ماۋسىمدا وتسە, قارىمتا كەزدەسۋ 23 قىركۇيەككە جوسپارلانعان. «اقتوبە» مەن «توبىل» ءبىرىنشى ويىندارىن ءوز الاڭدارىندا وتكىزەدى. ءبىرىنشى ويىن. 2 ماۋسىم. «توبىل» (قوستاناي) – «قايرات» (الماتى). «اقتوبە» (اقتوبە) – «استانا» (استانا). قارىمتا ويىن. 23 قىركۇيەك. «قايرات» (الماتى) – «توبىل» (قوستاناي). «استانا» (استانا) – «اقتوبە» (اقتوبە). قازاقستان كۋبوگىنىڭ قازىرگى يەگەرى «قايرات» كومانداسى ەكەنىن ايتا كەتەيىك. ەل كۋبوگىن يەمدەنگەن كلۋب ۋەفا ەۋروپا ليگاسىنىڭ ىرىكتەۋ كەزەڭدەرىنە قاتىسۋعا مۇمكىندىك الادى. ەلامان قوڭىر. دەرەك: egemen.kz. سۋرەت: kaztrk.kz.