قوستانايدا اقبوكەندەر قىرىلعان ايماقتان بەلگىسىز زات تابىلدى

قوستاناي. 23 مامىر. قوستاناي وبلىستىق پروكۋراتۋراسىندا وتكەن ءباسپاسوز ءماسليحاتىندا باسقارما باستىعى اسقار سىزدىقوۆ امانگەلدى اۋدانىنداعى  اقبوكەندەر قىرىلعان ايماقتان شار سەكىلدى دومالاق زات تابىلعانىن مالىمدەدى. بۇل تۋرالى ng.kz سايتىنا سىلتەمە جاساپ, egemen.kz ءتىلشىسى حابارلادى. پروكۋرور اسقار سىزدىقوۆ: «شار سەكىلدى زاتتىڭ تابىلعانى راس. ديامەترى 60 سم. بىراق ساراپتاۋ قورىتىندىسى كورسەتكەندەي, وندا ەشقانداي جوعارى رادياتسيا بايقالماعان. شار قازىر امانكەلدى اۋداندىق اكىمدىگىنە جەتكىزىلدى. بۇل عارىش كەمەسىنىڭ ءبىر بولشەگى بولۋى مۇمكىن», – دەدى. ءماسليحات بارىسىندا بۇگىنگە دەيىن امانگەلدى اۋدانىندا 40 مىڭنان اسا ولەكسە جينالىپ, جويىلعانى بەلگىلى بولدى. توتەنشە جاعداي سالدارىن جويۋ جۇمىستارى ءالى جالعاسۋدا. جەرگىلىكتى تۇرعىندارعا اقبوكەندەر قىرىلعان وڭىرگە مال جايۋعا رۇقسات بەرىلگەن جوق. دالا جانۋارىنىڭ قىرىلۋىنا بايلانىستى امانگەلدى اۋداندىق ىشكى ىستەر بولىمىندە سوتقا دەيىنگى تەكسەرۋ-تەرگەۋ جۇمىستارى جۇرگىزىلۋدە. وقيعا ورنىندا توتەنشە جاعدايلار دەپارتامەنتىنىڭ جانە تابيعات قورعاۋ پروكۋراتۋراسىنىڭ قىزمەتكەرلەرى جۇمىس ىستەۋدە. الدىن الا دەرەكتەر بويىنشا, بۇل اپاتقا پاستەرەللەز اۋرۋى سەبەپ دەگەن بولجام ايتىلۋدا. قوزعالعان قىلمىستىق ءىستىڭ شەشىمى سىنامالاردى ساراپتاۋشىلاردىڭ سوڭعى قورىتىندىسىنا بايلانىستى بولادى. اسقار سىزدىقوۆ جۋرناليستەرگە ولەكسەلەردىڭ قالاي جويىلىپ جاتقاندىعىن ايتىپ بەردى. سونداي-اق, ول «ولگەن اقبوكەندەردىڭ ءمۇيىزىن كەسىپ الىپ جاتىر» دەگەن الىپ-قاشپا اڭگىمەگە قاتىستى تۇسىنىكتەمە بەردى. بۇل جونىندە پروكۋرور: «ونداي اڭگىمەلەردىڭ بار ەكەنى رس. قازىر جۇمىس ىستەپ جاتقان ارنايى كوميسسيا سونشالىقتى اشكوزدىككە جول بەرمەيدى. ونىڭ ۇستىنە, ولگەن كيىكتەر تەكەسى ەمەس, ىلعي ەشكىسى مەن جاڭا تۋعان قۇرالايلارى», – دەدى. ءنازيرا جارىمبەتوۆا. دەرەك, سۋرەت: egemen.kz.