ۇلىمنىڭ وتانشىل بولىپ وسكەنىنە قۋانامىن

– دەيدى كاسىپقوي بوكستىڭ ءتورت نۇسقاسى بويىنشا الەم چەمپيونى گەننادي گولوۆكيننىڭ اناسى ەليزاۆەتا گولوۆكينا استانا قالاسىندا وتكەن «ماڭگىلىك ەل – بولاشاعى ءبىرتۇتاس ەل» اتتى جالپىۇلتتىق پاتريوتتار فورۋمى اياسىندا ۇيىمداستىرىلعان «جىل پاتريو­تى» بايقاۋىندا الەمگە ايگىلى بىلعارى قولعاپ شەبەرى گەننادي گولوۆكيننىڭ اناسى ەليزاۆەتا گولوۆكينا «انا جۇرەگى» اتالىمى بويىنشا جەڭىمپاز اتاندى. «ات – بيەدەن, الىپ – انادان» دەگەن. گولوۆكيندەي التىن ساقا ۇلدى قازاعىما سىيلاعان اناعا قانداي قۇرمەت كورسەتسە دە ارتىقتىق ەتپەيدى! شىنىن ايتقاندا, بالاسىنا جۇمسالعان ءاربىر سوققى اناسىنىڭ جۇرەگىنە قادالعان قانجار عوي. سونىڭ ءبارىن كوتەرىپ جۇرگەن انا جۇرەگىنىڭ مىقتىلىعىن ايتساڭىزشى! جۇرەگىنە مەيىرىم عانا تۇنباي, ەرلىك تە ۇيا سالعان انانى «انا جۇرەگى» سىيلىعىنىڭ اداس­پاي تاپقانىنا ءبىز دە قۋاندىق. – ەليزاۆەتا سەرگەەۆنا, «جىل پاتري­وتى» كونكۋرسىندا جەڭىسكە جەتكە­نىڭىزبەن شىن جۇرەكتەن قۇتتىق­تايمىز! جۇلدەنى الىپ تۇرىپ, قانداي سەزىمدى باستان كەشتىڭىز؟ – ەڭ الدىمەن مەنى توبەلەرىنە كوتەرىپ, سىي-قۇرمەتكە بولەگەن اسا قايىرىمدى جانە ءىلتيپاتتى جاندارعا انالىق العى­سىمدى ايتقىم كەلەدى. بۇل, ءسوز جوق, مەنىڭ قىمباتتى ۇلىم – گەنناديگە كورسەتىلگەن قۇرمەت. جۇلدەنى الىپ تۇرىپ مەن گەنناديدەي ءبۇتىن ءبىر ەلدىڭ ماقتانىنا اينالعان ۇلدى تاربيەلەپ وسىرگەنىمە قۋاندىم, ءارى ءوزىمدى باقىتتى سەزىندىم! – ءسىزدىڭ جۇلدەگە يە بولعا­نىڭىزدى گەننادي ەستىدى مە؟ – ءبىز تەلەفون ارقىلى ءجيى حابارلاسىپ تۇرامىز. سوندىقتان دا, ءبىر-ءبىرىمىزدىڭ قانداي جاڭالىقتارىمىز بار – ءبارىن دە سول زاماتتا ءبىلىپ وتىرامىز. بالام مەنى قۇتتىقتاپ, ءوزىنىڭ مەن ءۇشىن وتە قۋانىشتى ەكەنىن جەتكىزدى. ماعان گەنامنىڭ «انا, ءبىز بىرلىگى جاراسقان ەلدە تۇرامىز. قۇدايعا شۇكىر دەۋىمىز كەرەك», – دەگەن سوزدەرى ۇنادى. ول شىنىندا ءوزىنىڭ ەلىن, ەلباسىن وتە قاتتى قۇرمەتتەيدى. سودان كەيىن ۇلىم قازاننىڭ 17-ءسى كۇنى بولاتىن كەزەكتى جەكپە-جەككە تىڭعىلىقتى دايىندالىپ جاتقانىن ايتتى. «ءسىزدىڭ جەڭىسىڭىزگە مەن دە جەڭىسپەن جاۋاپ بەرەمىن. تەلەديداردىڭ الدىندا قاتتىراق ايقايلاساڭىز, داۋىسىڭىزدى ەستىپ, كۇش-قۋات الۋىم مۇمكىن», – دەپ قالجىڭداپ تا قويدى (سۇحبات 17 قازاننىڭ قارساڭىندا الىنعان بولاتىن – رەد.). – جالپى, گەننادي جاس كەزىندە قانداي بالا بولدى؟ بوكستى تاڭداۋىنا قارا­عاندا, تەنتەكتىگى ءبىر باسىنا جەتەر­لىك بولعان شىعار؟ – راس, جۇرتتىڭ ءبارى گەنناديدى جاس كەزىندە بۇزىق بولعان شىعار دەپ ويلايدى. شىنىن ايتسام, مەن ونىڭ اۋلاداعى بالالارمەن شەكىسىپ, نە بولماسا توبەلەسكەنىن كورمەپپىن. ول وتە باۋىرمال, كوپشىل بالا بولىپ ءوستى. اۋلاداعى, كوشەدەگى كەز كەلگەن بالامەن ءتىل تابىسىپ, دوس­تاسىپ كەتەتىن. ايتەۋىر, ۇنەمى جايراڭداپ, كوڭىلدى جۇرەتىن. گەننادي 11 جاسىندا بوكسقا باردى. نەگىزى, گەنا ەگىزدىڭ سىڭارى – ماكسيم ەكەۋىنىڭ كىندىگى ءبىر. گەنناديدىڭ باقى­تىنا وراي وعان جاقسى باپكەرلەر كەزدەستى. العاشقى باپكەرى ۆيكتور دميتريەۆ, ودان كەيىن عالىم كەنجەباەۆ ونىڭ بو­يىنا ىزگىلىكتىڭ, ىزەتتىلىكتىڭ ءدانىن سىڭىرە ءبىلدى. سپورت ادامدى جاقسى باعىتتا تاربيەلەيدى عوي. بوكسپەن ۇزبەي اينالىسىپ جۇرگەندەرىندە گەنا مەن ماكسيمنىڭ وزدىگىنەن بارىپ بىرەۋگە ۇرىنعاندارىن ەستىگەن ەمەسپىن. – ءبىر كەزدەرى كورشى ەلدىڭ سپورت كوممەنتاتورلارى گەننادي گولوۆكيندى وزدەرىنە يەمدەنىپ, ءبىزدىڭ نامىسىمىزعا شي جۇگىرتىپ قويدى. ءسىزدىڭ بۇل جونىندەگى پىكىرىڭىزدى بىلسەك دەپ ەدىك... – گەنناديگە قاتىستى مۇنداي داق­پىرتتى ەستىدىم. بۇعان مەن كۇلە قاراي­مىن. جاقسىنى اركىم وزىنە تارتىپ جۇرەدى عوي. جالپى, مۇنداي قاڭقۋ سوزدەرگە گەننا­دي­دىڭ ءوزى جاقسىلاپ تۇرىپ جاۋاپ بەر­دى دەپ ويلايمىن. «اكەم – ورىس, شە­شەم – كورەي, ال مەن ءوزىم قازاقپىن», دەگەن جوق پا؟! گەنا شىنىندا دا ءوز وتانىن جان-تانىمەن سۇيەدى. ول مۇنى قۇرعاق سوزبەن ەمەس, ىسىمەن دالەلدەپ ءجۇر. بالامنىڭ وتان­شىل بولىپ وسكەنىنە مەن دە قۋانىشتىمىن. – ەليزاۆەتا سەرگەەۆنا, ءوزىڭىز ءجو­نىندە, وتباسىڭىز تۋرالى ءبىر-ەكى اۋىز ايتا كەتسەڭىز... – مەنىڭ جۇبايىم گەننادي يۆانوۆيچ بىلتىرعى جىلدىڭ اقپان ايىندا دۇنيە سالدى. ول كىسى كومىر ونەركاسىبىنىڭ قۇرمەتتى قىزمەتكەرى بولعان. سپورتتى جاقسى كورەتىن. قىستا شاڭعى تەۋىپ, كۇندەلىكتى جاتتىعۋلارىن جاساپ, ءوزىنىڭ دەنساۋلىعىنا ىقتياتتى قاراۋشى ەدى. مەن ءوزىم دە جاس كەزىمدە جەڭىل اتلەتيكامەن اينالىستىم, ازداعان جۇيرىكتىگىم بار بولاتىن. كەيىن وتباسىن قۇرىپ, بالالى-شاعالى بولعاننان كەيىن قول ۇزۋگە تۋرا كەلدى. ۇزاق جىلدار حيميالىق زەرتحانادا اسسيستەنت بولىپ قىزمەت ەتتىم. ءبىز مايقۇدىقتا جەر ۇيدە تۇرىپ كەلدىك. جۇبايىم قايتىس بولعان سوڭ بالالارىمنىڭ ۇيعارىمىمەن قالاداعى جايلى پاتەرگە كوشتىم. ەندىگى قالعان عۇمىرىمدا ەلىمنىڭ اماندىعىن, بالالارىم مەن نەمەرەلەرىمنىڭ تىلەۋىن تىلەپ وتىرماقپىن. – اڭگىمەڭىزگە كوپ راحمەت. جۇرە­گى­ڭىزگە جۇك تۇسپەسىن. قايرات ءابىلدينوۆ, «ەگەمەن قازاقستان». قاراعاندى.