تەننيس. «رولان گارروس». تەننيسشىلەرىمىزدىڭ قارسىلاستارى بەلگىلى

استانا. 23 مامىر. ەرتەڭ تەننيستەن «ۇلكەن دۋلىعا» ساناتىنداعى 4 ءتۋرنيردىڭ ءبىرى, فرانتسيا اشىق بىرىنشىلىگى – «رولان گارروس» جارىسى باستالادى. وعان قازاقستان اتىنان 5 تەننيسشى قاتىسادى. بۇل تۋرالى egemen.kz حابارلادى. تۋرنيردە ايەلدەر اراسىندا ەلىمىزدىڭ ءبىرىنشى راكەتكاسى زارينا دياس پەن ياروسلاۆا شۆەدوۆا جانە يۋليا پۋتينتسەۆالار باق سىنايدى. ال ەرلەر باسەكەسىندە ميحايل كۋكۋشكين مەن اندرەي گولۋبەۆ كۇش سىناسادى. كەشە پاريجدە اتالعان جارىستىڭ جەرەبە تارتۋ ءراسىمى ءوتىپ, ءبىرىنشى كەزەڭدەگى قارسىلاستار بەلگىلى بولدى. سوعان سايكەس زارينا العاشقى ويىنىن گەرمانيا تەننيسشىسى دينا پفيتسەنمايەرگە قارسى وتكىزەدى. 21 جاستاعى قازاق قىزى بۇگىندە WTA رەيتينگىندە 32-ورىندا كەلەدى. سونداي-اق, «رولان گارروس» تۋرنيرىنە دە 32-تەننيسشى رەتىندە قاتىسۋدا. ال 23 جاستاعى پفيتسەنمايەر الەمنىڭ 142-راكەتكاسى. ەكى تەننيسشىنىڭ جولى العاش رەت ءتۇيىسىپ وتىر. ياروسلاۆا ءبىرىنشى كەزەڭدە الەمنىڭ 7-راكەتكاسى, سەربيا سپورتشىسى انا يۆانوۆيچپەن وينايدى. ال يۋليا تاعى ءبىر سەربيا تەننيسشىسى الەكساندرا كرۋنيچكە قارسى كورتقا شىعادى. كۋكۋشكيننىڭ قارسىلاسى يزرايل سەنىم ارتقان دۋدي سەلا بولسا, گولۋبەۆ ەكىنشى كەزەڭ جولداماسىن يسپان توممي روبرەدومەن ساراپقا سالادى. ەلامان قوڭىر. دەرەك: egemen.kz. سۋرەت: lidertennis.ru.