مادەنيەت جانە سپورت ءمينيسترى بوكسشى گولوۆكيندى جەڭىسىمەن قۇتتىقتادى

استانا. 19 قازان. كەشە اقش-تىڭ نيۋ-يورك قالاسىندا وتانداسىمىز, بوكسشى گەننادي گولوۆكين كانادالىق داۆيد لەمەمەن جۇدىرىقتاسىپ, 34-جەڭىسىنە قول جەتكىزدى. وسىعان وراي ەلىمىزدىڭ مادەنيەت جانە سپورت ءمينيسترى ارىستانبەك مۇحامەدي ۇلى جەرلەسىمىزدى جارقىن جەڭىسىمەن قۇتتىقتادى. بۇل تۋرالى مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءباسپاسوز قىزمەتى حابارلادى. قۇتتىقتاۋ جەدەلحاتىندا: «ءسىزدىڭ بۇل جەڭىسىڭىز قازاقستان بوكس مەكتەبىنىڭ الەم بويىنشا ۇزدىكتەر قاتارىندا ەكەنىن تاعى ءبىر دالەلدەدى. ءبىز ءسىزدىڭ وسىنداي جارقىن جەڭىستەرىڭىزدى ماقتان تۇتامىز! ءسىز, تاۋەلسىز قازاقستان سپورتى ءۇشىن ماڭىزى اسا جوعارى بيىكتەردى باعىندىردىڭىز. كاسىپقوي رينگتەگى شەبەرلىگىڭىز قازاقستان سپورتىنىڭ داڭقىن بۇرىنعىدان دا اسقاقتاتا ءتۇستى. ال اتاقتى Madison Square Garden ارەناسىندا ورتا سالماقتا IBF تۇجىرىمى بويىنشا چەمپيوندىق بەلدىكتىڭ يەگەرى بولعان كانادالىق داۆيد لەمەنى جەڭۋىڭىز بارشا قازاقستاندىقتارعا تاماشا كوڭىل-كۇي سىيلادى. بۇل جەڭىس وسكەلەڭ ۇرپاقتىڭ وتانعا دەگەن سۇيىسپەنشىلىگىن ارتتىرىپ, پاتريوتتىق سەزىمىن تۋدىرادى. قازاقستان بوكسىنىڭ جانكۇيەرلەرى الداعى ۋاقىتتا سىزدەن تەك وسىنداي جارقىن جەڭىستەر مەن قىزىقتى جەكپە-جەكتەر كۇتەدى. جەڭىسىڭىز قۇتتى بولسىن!», – دەلىنگەن. ايتا كەتەيىك, اتالعان ايقاس ناتيجەسىندە ءبىزدىڭ سايىپقىران 8-راۋندتا قارسىلاسىن تەحنيكالىق نوكاۋتپەن جەڭىپ, ورتا سالماقتا WBA (Super), IBO جانە WBC (Interim) تۇجىرىمى بويىنشا چەمپيوندىق اتاعىن قورعاپ قانا قويماي, قارسىلاسىنا تيەسىلى بولعان IBF نۇسقاسىنىڭ چەمپيوندىق بەلدىگىن يەمدەندى. ەلامان قوڭىر. دەرەك: مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءباسپاسوز قىزمەتى. سۋرەت: vk.com.