«بارىس» ماسكەۋدە جەرگىلىكتى «دينامودان» باسىم ءتۇستى

استانا. 20 قازان. بۇگىن, 19 قازاننان 20-سىنا قاراعان ءتۇنى قۇرلىقتىق حوككەي ليگاسى شەڭبەرىندە استانانىڭ «بارىسى» ماسكەۋدە جەرگىلىكتى «دينامومەن» كەزدەسىپ, 2:1 ەسەبىمەن جەڭىسكە جەتتى. بۇل تۋرالى egemen.kz حابارلادى. العاشقى كەزەڭ ايدىن يەلەرىنىڭ باسىمدىعىمەن ءوتتى. تولاسسىز شابۋىلداعان دينامولىقتار بۇل بولىكتە ءبىزدىڭ قاقپاعا 14 سوققى جاساسا, «بارىس» حوككەيشىلەرى 4 سوققىمەن عانا جاۋاپ بەردى. ناتيجەسىندە ۇزىلىسكە ءبىر مينۋت قالعاندا مەت روبينسوننىڭ كومەگىمەن ماسكەۋلىكتەر ەسەپ اشتى. ەكىنشى كەزەڭ تەڭ جاعدايدا ءوربىدى. دەگەنمەن, «بارىستىڭ» ۇرىمتال ساتتەرى قارسىلاسىنا قاراعاندا كوبىرەك بولعانىن ايتا كەتەيىك. سوڭعى كەزەڭدە دە وسى قارقىنىنان تايماعان ەۆگەني كورەشكوۆتىڭ شاكىرتتەرى 47-مينۋتتا تارازى باسىن تەڭەستىردى. تالعات جايلاۋوۆتىڭ اسىرعان شايباسىن قاقپاعا تۋرا باعىتتاعان ۆاديم كراسنوسلوبودتسەۆ بولاتىن. گول جىبەرىپ العاننان كەيىن «دينامو» شابۋىلىن كۇشەيتىپ, تايلى-تۇياعىمەن العا ۇمتىلدى. سونىڭ سالدارىنان قورعانىسى ايتارلىقتاي سىر بەردى. وسىنى ءتيىمدى پايدالانعان استانالىقتار قارىمتا شابۋىلعا عانا يەك ارتۋدى ءجون سانادى. بۇل تاكتيكا 52-مينۋتتا ءوز جەمىسىن بەرىپ, نايدجەل دوۋس ەسەپتى ەسەلەدى. قالعان ۋاقىتتا رەسەيلىكتەر قانشا شابۋىلداسا دا تابلوداعى كورسەتكىش وزگەرگەن جوق. وسىلايشا, «بارىس» بيىلعى ماۋسىمداعى 8-ءشى جەڭىسىنە قول جەتكىزىپ وتىر. بۇگىندە 24 ويىننان 29 ۇپاي جيعان ءبىزدىڭ كوماندا شىعىس كونفەرەنتسياسىندا 12-ورىندا كەلەدى. ال 22 كەزدەسۋ وتكىزىپ, 41 ۇپاي ەنشىلەگەن «دينامو» باتىس كونفەرەنتسياسىندا 4-ورىندا تۇر. «بارىس» كەلەسى كەزدەسۋىن 21 قازاندا سىرت ايدىندا براتيسلاۆانىڭ «سلوۆان» كومانداسىمەن وتكىزەدى. ەلامان قوڭىر. دەرەك: egemen.kz. سۋرەت: dynamo.ru.