كورەرمەننىڭ كوڭىلىن كوتەرگەن

ەلوردا كۇنى مەرەكەسىنىڭ كوركىن قىزدىرۋعا, ءسويتىپ, قالا تۇرعىندارى مەن جان-جاقتان كەلگەن قوناقتاردىڭ كوڭىلىن كوتەرۋگە ۇرمەلى اسپاپتار وركەسترلەرى دە اتسالىسىپ كەلەدى. كەشە جىل سايىن وتكىزۋ داستۇرگە اينالعان «استانا سامالى» حالىقارالىق ۇرمەلى وركەسترلەردىڭ VI فەستيۆالى باستاۋ الدى. استانا كۇنىنە ورايلاستىرىلىپ وتكىزىلەتىن اتالعان شارا بيىل دا جۇرتشىلىق نازارىن وزىنە اۋداردى. اۋا رايىنىڭ سالقىنداۋ بولعانىنا قاراماستان, ۇرمەلى وركەسترلەردىڭ ونەرلەرىن تاماشالاۋ ءۇشىن كەلۋشىلەردىڭ اياعى سايابىرسي قويعان جوق. الدىمەن قالا تۇرعىندارى مەن قوناق­تارىنىڭ الدىنا مەملەكەت­تىك كۇزەت قىزمەتىنىڭ پرەزيدەنتتىك ۇرمەلى اسپاپتار وركەسترى شىقتى. پرەزيدەنتتىك ۇرمەلى وركەستردىڭ باستىعى پودپولكوۆنيك تىلەك ەرعاليەۆتىڭ ديريجەرلىك ەتۋىمەن ۇرمەلى اسپاپتاردىڭ ىرعاعى قولداعى قارۋلاردىڭ ۇنىمەن ۇندەسىپ جاتتى. تارسىلداعان بارا­بانداردىڭ دىبىسى مەن سارت-سۇرت ەتكەن قارۋلاردىڭ ءۇنى جاراسىمدى-اق كورىندى. سوڭىنان اۋەگە قاراي وق اتىلىپ, كورەرمەندەردى ءبىر سەرپىلتىپ تاستادى. بۇدان كەيىن ورتاعا مايور الەكسەي تەرەششەنكونىڭ ديري­جەرلىگىمەن ۇلتتىق ۇلاننىڭ ورتالىق ۇرمەلى اسپاپتار وركەسترى (استانا قالاسى) شىقتى. وركەستر نەگىزىنەن ويناقى مانەردەگى شىعارمالاردى ورىنداپ, كوڭىلدى اۋان قالىپتاستىردى. ارتىنشا الاڭ تورىندە قىزىل گۋسارلىق اسكەري كيىنگەن ومبى قالاسى فيلارمونياسىنىڭ ۇرمەلى اسپاپتار وركەسترى كورىنىپ, ءوز ونەرلەرىن پاش ەتتى. وركەستردىڭ كوركەمدىك جەتەكشىسى ءارى ديريجەرى ولەگ روجانوۆ باستاعان توپ قيمىلعا كوبىرەك ەرىك بەرىپ, جينالعان جۇرتشىلىقتى ەلىكتىرىپ اكەتتى. اتالعان وركەستر الاڭدى بوساتار ساتتە دۋ قول شاپالاقتالىپ, وركەستردىڭ ونەرى جوعارى باعا­لاندى. شىنىندا دا, بۇل كەز كون­تسەرتتىڭ ناعىز قىزعان كەزى ەدى. كەلەسى بولىپ الاڭعا شىققان دار­حان راقىمعاليەۆ ديريجەرلىك ەتكەن ۇلتتىق ۇلان اسكەري ينستي­تۋتىنىڭ ۇرمەلى اسپاپتار وركەسترى (پەتروپاۆل قالاسى) كورەرمەنگە شاتتىق كوڭىل كۇي سىيلادى. ۇرمەلى اسپاپتاردىڭ سۇيەمەلدەۋىمەن دومبىرا ءۇنى كوكتى شارلادى. سوڭىنان كونتسەرتتى استانا قالاسى اكىمدىگىنىڭ مەملەكەتتىك اكادەميالىق فيلارمونياسى ۇرمەلى اسپاپتار وركەسترى جال­عاس­تىردى. ەرەكشە مانەردە كيىنگەن ۇرمەلى وركەستردىڭ ءىس-قيمىل­دارىن ءبيشى قىزدار قولداپ, ەرەكشە وزىندىك سارىن كورسەتە ءبىلدى. وسىلايشا, بىرىنەن ءبىرى اسقان ونەر ۇجىمدارى كوپشىلىككە مەرەكەلىك كوڭىل كۇي سىيلاپ, ءبىر قۋانتىپ تاستادى. ۇيىمداستىرۋ جۇمىستارىمەن جۇرگەن استانا قالاسى اكىمدىگىنىڭ مەملەكەتتىك اكادەميالىق فيلارمونياسى ۇيىم­داستىرۋ ءبولىمىنىڭ جەتەك­شىسى و.رىسماعانبەتوۆپەن سويلەس­كەن كەزىمىزدە ول جىل سايىن كەلۋ­شىلەردىڭ قاتارىن جاڭارتىپ وتىرامىز دەگەندى باسا ايتتى. ونىڭ سوزىنە قاراعاندا, اتالعان شارا 4-6 شىلدە ارالىعىندا جالعاسادى. «تاڭەرتەڭگىسىن شارا قالالىق اكىمدىك الدىنداعى الاڭدا پلاتس-كونتسەرت تۇرىندە وتسە, تۇستەن تەيىن ۇرمەلى وركەسترلەر ءوز ونەرلەرىن قالا ساياباقتارىندا جالعاستىرىپ, ال كەشكىسىن بەند-مارافون تۇرىندە «بايتەرەك» الدىنداعى الاڭدا كوپشىلىك كوڭىلىن كوتەرەتىن بولادى. فەستيۆال كەلەسى كۇنى پارادپەن كارتينا گالەرەياسىنان جاستار سارايىنا دەيىن ارالىقتى ءجۇرىپ ءوتىپ, فەستيۆالدىڭ رەسمي جابىلۋى سوندا ورىن الادى», دەدى ورال ەربوسىن ۇلى. فەستيۆالدىڭ وتۋىنە مۇرىندىق بولعان استانا قالالىق اكىمدىگى بولسا, ال ۇيىمداستىرۋ استانا قالاسى اكىمدىگىنىڭ مەملەكەتتىك اكادەميالىق فيلارمونياسىنا جۇكتەلىپتى. اسقار تۇراپباي ۇلى, «ەگەمەن قازاقستان».