مەملەكەت باسشىسى نۇرسۇلتان نازارباەۆ «قازاقستان-2050» ستراتەگياسىن جاريالاعاننان بەرى ەلىمىزدى الەمدەگى دامىعان وتىزدىقتىڭ قۇرامىنا ەنگىزۋ بارشا قازاقستاندىقتاردىڭ ورتاق ماقساتىنا, ۇلتتىق يدەياسىنا اينالدى. وسى ماقساتقا جەتۋ ءۇشىن جاسالاتىن 100 ناقتى قادامدى ەلباسى ايقىنداپ بەردى. مۇندا ۇلت جوسپارىندا قوعامنىڭ بارلىق سالاسىن ودان ءارى جەتىلدىرۋ بويىنشا ناقتى ءىس-شارالار قامتىلعان.
دەگەنمەن, باستى نازار – كاسىبي مەملەكەتتىك اپپاراتتى قۇرۋعا باعىتتالعانىن ەرەكشە ايتا كەتكەنىمىز ابزال. سەبەبى, ءوز ءىسىن جەتىك بىلەتىن, ءبىلىمدى ءارى بىلىكتى, تالانتتى, ادال دا ەلجاندى مەملەكەتتىك قىزمەتشىلەر ەلگە قىزمەت ەتپەيىنشە, بۇل رەفورمالاردى ءىس جۇزىنە اسىرۋ مۇمكىن ەمەستىگى بارشامىزعا بەلگىلى. 100 قادامنان قۇرالعان ۇلت جوسپارىندا دامىعان ەلدەردىڭ وزىق تاجىريبەلەرىنىڭ نەگىزىندە ەلىمىزدىڭ مەملەكەتتىك قىزمەت سالاسىن رەفورمالاۋ بويىنشا جاڭا مىندەتتەر قويىلدى. ەندى مەملەكەتتىك قىزمەتشىلەر مەملەكەتتىك قىزمەتكە تومەنگى لاۋازىمداردان باستاپ تاعايىندالادى. بۇل ءوز كەزەگىندە مەملەكەتتىك قىزمەتشىنىڭ, ءبىرىنشىدەن, مامان رەتىندە قالىپتاسۋىنا, ەكىنشىدەن, حالىقپەن تىعىز جۇمىس ىستەۋگە, تۇرعىنداردىڭ مۇڭ-مۇقتاجىن تۇسىنۋگە ۇيرەتەدى. بۇگىندە جوعارى وقۋ ورىندارىن تامامداعان جاس ماماندار نەمەسە ءومىر بويى باسقا سالادا ەڭبەك ەتكەن ازاماتتار بىردەن جوعارى لاۋازىمدارعا تاعايىندالىپ جاتاتىنىن بايقاۋعا بولادى. مەملەكەتتىك قىزمەتتىڭ قايناعان قازانىندا پىسپەگەن, تاجىريبەسىز ماماننىڭ ساپالى, كاسىبي جۇمىس ىستەۋى ەكىتالاي دۇنيە. سونداي-اق, عايىپتان پايدا بولعان باسقارۋشىعا قاراعاندا, ءوز ىسىمەن, ادال قىزمەتىمەن ەل اراسىندا ابىرويعا يە بولعان باسقارۋشىعا حالىقتىڭ سەنىمى دە ارتاتىندىعى ايدان انىق. ۇلت جوسپارىنىڭ كەلەسى ءبىر يگى قادامى – تومەنگى لاۋازىمدارعا كانديداتتاردى رەتتەۋ جانە ولاردىڭ ودان ءارى لاۋازىمدىق ءوسۋى ىسكەرلىك قاسيەتتەرى نەگىزىندە جۇزەگە اسىرىلادى. مەريتوكراتيا قاعيداتىنا نەگىزدەلگەن مەملەكەتتىك قىزمەتشىلەردى تاعايىنداۋدىڭ وسىنداي جۇيەسىنە كوشۋ – مەملەكەتتىك اپپاراتتىڭ ساپاسىن جاقسارتاتىنى ءسوزسىز. بۇل مەملەكەتتىك قىزمەتتەگى كادر ساياساتىنىڭ اشىقتىعىن قامتاماسىز ەتۋمەن قاتار, مەملەكەتتىك قىزمەتشىلەردى ىنتالاندىرۋ قۇرالىنا اينالادى. مەملەكەتتىك قىزمەتشىنىڭ ءىسكەرلىك قاسيەتتەرى تەك زاڭنامانى ءبىلۋ بويىنشا تەستىلەۋ ءناتيجەسىمەن عانا ەمەس, سونداي-اق, ادامگەرشىلىك قاسيەتتەرىن انىقتاۋعا باعىتتالعان قاتاڭ سىناقتاردان وتكىزۋ, ءجۇز جىلدان استام قۇقىق قورعاۋ ورگاندارىنىڭ قىزمەتكەرلەرىنە قاتىستى قولدانىلىپ كەلە جاتقان پوليگرافيانى ەنگىزۋ ارقىلى انىقتالۋ قاجەت. بۇل ءوز كەزەگىندە تەرىس قىلىقتارعا جاقىن, ماسەلەن, ىشىمدىككە, ناشاقورلىققا, الاياقتىققا بەيىمدىلىگى بار نەمەسە دەنساۋلىعىندا ولقىلىقتارى بار, ياعني پسيحولوگيالىق اۋىتقۋلارعا شالدىققانداردىڭ مەملەكەتتىك قىزمەتكە ورنالاسۋىنا توسقاۋىل بولار ەدى. مەملەكەتتىك قىزمەتتىڭ مارتەبەسىنە دەگەن قۇرمەتتىڭ تومەن ساتىلى قىزمەتتىك ورىنداردان باستالۋى لاۋازىمدى تۇلعانىڭ قانداي قيىندىقتا دا وڭتايلى, تىعىرىقتان الىپ شىعار شەشىم قابىلداۋىنا, ۇجىمدى ۇيىتا بىلۋىنە نەگىز قالايدى. سوندىقتان, اتالعان جوسپاردىڭ 2-قادامىندا ەلباسى بۇل جايت تۋرالى ناقتى تاپسىرما جۇكتەپ وتىر. بۇل بارلىق مەملەكەتتىك قۇرىلىمداردا جۇزەگە اسىرىلادى. ءار مەملەكەتتىك ورگانداردا اعا, ورتا جانە كىشى بۋىننىڭ بىرگە جۇمىس ىستەۋى قوعامدىق دامۋدا دا ايرىقشا ماڭىزعا يە. سوندىقتان, ءبىز مەملەكەتتىك قىزمەتتە ءوسۋدىڭ بۇل مەكتەبىن قالىپتاستىرۋعا ءتيىسپىز.
توقتامىس جۇماعۇلوۆ, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى شىعىس قازاقستان وبلىستىق دەپارتامەنتى باسشىسىنىڭ ورىنباسارى – وبلىستىق تارتىپتىك كەڭەس توراعاسى.
وسكەمەن.
