اقتوبەدە وزگە ۇلتتىڭ جاستارى مەملەكەتتىك تىلدە شەبەرلىك سىناستى

اقتوبە. 19 قازان. اقتوبەدە قازاقستان حالقى اسسامبلەياسىنىڭ 20 جىلدىعى اياسىندا ءتىل مەرەكەسىنە وراي اباي قۇنانباەۆتىڭ 170 جىلدىعىنا ارنالعان ەتنومادەني بىرلەستىكتەردىڭ جاستارى اراسىندا «ءتىلىم مەنىڭ – بايلىعىم» اتتى بايقاۋ وتكىزىلدى. بۇل تۋرالى egemen.kz ءتىلشىسى حابارلادى. وبلىستىق مادەنيەت, مۇراعاتتار جانە قۇجاتتاما باسقارماسى مەن دوستىق ءۇيى بىرلەسىپ ۇيىمداستىرعان بۇل بايقاۋعا 15-20 جاس ارالاعىنداعى قازاق مەكتەبىندە وقىمايتىن وزگە ۇلتتاردىڭ سەگىز ۇمىتكەرى قاتىستى. بايقاۋ شىمىلدىعىن تاحاۋي احتانوۆ اتىنداعى وبلىستىق دراما تەاترىنىڭ ءارتىسى اسەت ورازالين ابايدىڭ مونولوگىن وقۋمەن اشتى. سودان كەيىن بايقاۋعا قاتىسۋشىلار «سالەمدەسۋ پارىزىڭ» اتتى كەزەڭدە ءوزىن مەملەكەتتىك تىلدە تانىستىرسا, « ۇلى اباي شىعارماشىلىعى» بولىمىندە ابايدىڭ قارا ءسوزىن نەمەسە ءبىر ولەڭىن جاتقا وقىدى. ال «اباي جولى» كەزىڭىندە روماننان ءۇزىندى كەلتىردى. سونداي-اق, «اباي – حالىقتىڭ ۇلى پەرزەنتى» دەگەن تاقىرىپتا ءوزى جازىپ الىپ كەلگەن شىعارمانى ۇسىندى. ءتورت كەزەڭدە وزگەلەردەن وزىق ونەر كورسەتكەن تاتار ەتنومادەني بىرلەستىگىنىڭ وكىلى روزاليا يسحاكوۆا باس جۇلدەنى جەڭىپ السا, ءبىرىنشى ورىندى ازەربايجان ەتنومادەني بىرلەستىگىنىڭ نامىسىن قورعاعان گۋللارا ابيلوۆا يەلەندى. ەكىنشى ورىن باشقۇرت ەتنومادەني بىرلەستىگىنەن كەلگەن رۋفينا يارلىكاپوۆاعا بۇيىرسا, بولگار قىزى ليليا مارينوۆا ءۇشىنشى ورىننان كورىندى. جەڭىمپازدار مەن جۇلدەگەرلەرگە العىس حات پەن باعالى سىيلىقتار تاپسىرىلدى. بايقاۋعا قاتىسۋشىلاردىڭ قاي-قايىسىسى دا قۇر قول قايتقان جوق, ءتۇرلى ماراپاتتارعا يە بولدى. شارا سوڭى ادەمى ءان مەن كۇمبىرلەگەن كۇيگە ۇلاستى. ساتىبالدى ءساۋىرباي. دەرەك, سۋرەت: egemen.kz.