ەكونوميكانىڭ ءوسۋ جولدارى ءسوز بولدى

پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ ءVىىى استانا ەكونوميكالىق فورۋمىنىڭ ەكىنشى جۇمىس كۇنى شەڭبەرىندە وعان قاتىسۋشىلارمەن بىرقاتار ەكىجاقتى كەزدەسۋلەر وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى. اقش مەملەكەتتىك حاتشىسىنىڭ باس كومەكشىسى كۋرت تونگ پەن باقىتجان ساعىنتاەۆ كەزدەسۋ بارىسىندا ەۋرازيالىق ەكونوميكالىق وداق شەڭبەرىندە, سونداي-اق, ورتالىق ازيا وڭىرىندە ساۋدا كەدەرگىلەرىن جويۋ جانە تۇتىنۋشىلاردى قورعاۋ ماسەلەلەرىن تالقىلادى. سول سياقتى, تاراپتار «جىبەك جولىنىڭ ەكونوميكالىق بەلدەۋى» باستاماسى شەڭبەرىندەگى, سونىڭ ىشىندە, شەتەل كومپانيا­لارىن تارتا وتىرىپ, مۇمكىن دەگەن ينفراقۇرىلىمدىق جوبالارعا قاتىستى پىكىر الماستى. گارۆارد ۋنيۆەرسيتەتىنىڭ پروفەسسورى كەننەت س.روگوفف الەمدىك ەكونوميكا دامۋىنداعى وزگەرىستەرگە, سونداي-اق, ەكونوميكالىق ءوسۋ قارقىنىن ساقتاۋ ءۇشىن قازاقستان قابىلداۋى ءتيىس ناقتى قادامدارعا قاتىستى ءوز ويىمەن ءبولىستى. كەننەت س.روگوفف پەن باقىتجان ساعىنتاەۆ AIFC استانا حالىقارالىق قارجى ورتالىعىنىڭ بولاشاقتا جۇمىس ىستەۋى جانە قازاقستاندىق بيزنەسكە مەملەكەتتىك قولداۋ شارالارىن تالقىلادى. بۇۇ ەكونوميكالىق جانە الەۋمەتتىك ماسەلەلەر دەپارتامەنتىندەگى ەكونوميكالىق دامۋ ماسەلەلەرى بويىنشا باس حاتشىنىڭ اسسيستەنتى لەنني مونتەل كەزدەسۋ بارىسىندا قازاقستان پرەزيدەنتى نۇرسۇلتان نازارباەۆ رەفورمالارىنىڭ تۇراقتى دامۋ قاعيداتتارىنا سايكەس كەلەتىنىن اتاپ كورسەتتى. ونىڭ ايتۋىنشا, ول مەملەكەتتىك قىزمەت رەفورماسىن, سوت جۇيەسىنىڭ سالقىنقاندىلىعىن قاراستىرىپ, سونىمەن بىرگە, مەملەكەتتى ءوز ازاماتتارى الدىندا نەعۇرلىم ءمولدىر جانە ەسەپ بەرەتىندەي جاسايدى.