ابدۋللا گۇل: «نۇرسۇلتان نازارباەۆ – تۇركى ينتەگراتسياسىنىڭ ۇيىتقىسى»

«نۇرسۇلتان نازارباەۆ – تۇركى ينتەگراتسياسىنىڭ ۇيىتقىسى. تۇركى كەڭەسىنىڭ قۇرىلۋىنا, وسى يدەيالاردىڭ جۇزەگە اسىرىلۋىنا, اسىرەسە, پرەزيدەنت نۇرسۇلتان نازارباەۆتىڭ سىڭىرگەن ەڭبەگى زور بولدى دەپ ايتا الامىن». تۇركيا رەسپۋبليكاسىنىڭ 11-ءشى پرەزيدەنتى, كورنەكتى مەملەكەت قايراتكەرى ابدۋللا گۇل كەشە حالىقارالىق تۇركى اكادەمياسىندا وتكەن كەزدەسۋدە وسىلاي دەدى. «ودان كەيىن تۇركى كەڭەسىنىڭ شەڭبەرىندە تۇركپا سياقتى ينستيتۋتتاردى قۇردىق. سونىڭ ىشىندە پرەزيدەنت نۇرسۇلتان نازارباەۆتىڭ ۇلكەن ءمان بەرگەن ينستيتۋتى  – تۇركى اكادەمياسى. ونىڭ بۇل يدەياسىن مەن دە قولداپ, استانانىڭ تورىندە, وسىنداي ادەمى عيماراتتا اكادەميانى اشتىق. قازاقستاندا ورنالاسقانىمەن بۇل اكادە­ميانىڭ جۇمىسى بۇگىندە كۇللى تۇركى دۇنيەسىن قامتىپ وتىر. قىسقا عانا ۋاقىتتا كوپ­تەگەن ما­ڭىزدى ءىس-شارالار وتكىز­دىڭىز­دەر», – دەدى ابدۋللا گۇل مىرزا. ونىڭ ايتۋىنشا, تۇركىلەر ادامزاتتىڭ دامۋىنا ولشەۋسىز ۇلەس قوسىپ, باعا جەتپەس مۇرالار قالدىرعان. ولاردى تۇگەندەۋ, الەم جۇرتشىلىعىنا پاش ەتۋ وسى اكادەميانىڭ جۇمىسى ارقىلى مۇمكىن بولىپ وتىر. كەزدەسۋگە بەلگىلى عالىمدار, مەملەكەت جانە قوعام قايرات­كەرلەرى مىرزاتاي جولداسبەكوۆ, ءادىل احمەتوۆ, سەيىت قاسقاباسوۆ, ساۋىتبەك ابدراحمانوۆ, ەرلان سىدىقوۆ, عاريفوللا ەسىم, شاكىر يبراەۆ جانە باسقا بىرقاتار زيالى قاۋىم وكىلدەرى قاتىسىپ, ءوز پىكىرلەرىمەن ءبو­لىستى. اكادەميا باسشىسى ءمار­تەبەلى مەيماندارعا تۇركى ءدۇ­نيەسىنىڭ ءبىلىم جانە عىلىم سالاسىن ۇيلەستىرۋشى ۇيىمداعى اتقارىلعان ماڭىزدى ءىس-شارالار جونىندە بايانداپ ءوتتى. قازاقستاندىق عالىمدار اتىنان ءسوز العان مىرزاتاي جول­داسبەكوۆ ناحيچەۆان سام­ميتىنەن باستاۋ العان تۇركى ينتەگراتسيالىق ۇدەرىستەرىنىڭ ماڭىزدىلىعىنا توقتالدى. ءوز كەزەگىندە ابدۋللا گۇل مىرزا قۇرىلعانىنا بەس جىل تولىپ وتىرعان اكادەميا ۇجى­مىنا ريزاشىلىعى مەن تىلەگىن ءبىلدىردى. جيىن سوڭىندا حالىقارالىق تۇركى اكادەمياسى تاراپىنان مارتەبەلى مەيمانعا قۇرمەت كورسەتىلدى. «ەگەمەن-اقپارات».