پروكۋراتۋرا جالعان كاسىپكەرلىككە قارسى شارالار قابىلداپ جاتىر

استانا. 30 تامىز. پروكۋراتۋرا ورگاندارى وزگە دە قۇقىق قورعاۋ جانە فيسقالدىق ورگاندارمەن بىرلەسىپ جالعان كاسىپكەرلىككە توسقاۋىل قويۋ بويىنشا ماقساتقا باعىتتالعان جۇمىستار جۇرگىزىپ كەلەدى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى. قابىلدانعان شارالاردىڭ ناتيجەسىندە بيىلعى جىلدىڭ وتكەن كەزەڭىندە پروكۋرورلاردىڭ ارىزدارى بويىنشا جالعان كاسىپكەرلىك بەلگىلەرى بار 197 زاڭدى تۇلعانىڭ مەملەكەتتىك تىركەۋىنىڭ كۇشى جويىلدى, 115 ارىز سوتتاردىڭ قاراۋىندا جاتىر. مەملەكەتتىك تىركەۋىنىڭ كۇشى جويىلعان زاڭدى تۇلعالاردىڭ كونتراگەنتتەرىنە قاداعالاۋ اكتىلەرى بويىنشا مەملەكەتتىك كىرىس ورگاندارى 31 ملرد. تەڭگە كىرىستى قايتا ەسەپتەدى, بۇگىنگى تاڭدا ولاردىڭ 6,9 ملرد. تەڭگەسى بيۋدجەتكە قايتارىلدى. سونىمەن قاتار, باس پروكۋراتۋرانىڭ ارنايى پروكۋرورلارىنىڭ وندىرىسىندەگى جالعان كاسىپكەرلىك فاكتىسى بويىنشا تەرگەلىپ جاتقان قىلمىستىق ءىستىڭ شەڭبەرىندە 4,2 ملرد.-تان استام تەڭگە كولەمىندەگى سالىقتىڭ مەملەكەت كىرىسىنە ءوندىرىلۋى قامتاماسىز ەتىلدى. ايدار ورىسباەۆ. دەرەك: باس پروكۋراتۋرانىڭ ءباسپاسوز قىزمەتى. سۋرەت: egemen.kz.