تەلەارنا ۇجىمى وزدەرى وتىرعىزعان شىرشا اعاشىنىڭ تۇبىنە قۇتى-كاپسۋلاعا سالىپ امانات حات جازدى. بۇگىنگى اعا بۋىن وكىلدەرىنىڭ حاتىن ەندى 50 جىلدان سوڭ «قازاقستان-پاۆلودار» تەلەارناسى اقپاراتتىق ارناسىنىڭ تىلشىلەرى الىپ وقيتىن بولادى.
بيىل «قازاقستان-پاۆلودار» تەلەارناسى 50 جىلدىعىن اتاپ وتەدى.وسى ورايدا وبلىستىڭ باستى ارناسى مەرەكەلىك جىلعا ارنالعان «50 يگى ءىس» جوباسىن باستاپ تا كەتتى. ناۋرىز مەرەكەسىندە تەلەارنا اۋلاسىنا كيىز ۇيلەر تىگىلىپ, داستارقان باسىنا كوپبالالى جانە تۇرمىسى تومەن وتباسىلارى شاقىرىلدى. جوبا بارىسىندا جەڭىستىڭ 70 جىلدىعىنا وراي جەرلەس جاۋىنگەرلەر جايلى كوپ سەريالى بەينە-كىتاپ جارىققا شىقتى. وتكەن سەنبىلىك كۇنى «50 يگى ءىس» اياسىندا تەلەارنا ۇجىمى 85 ءتۇپ اعاش وتىرعىزدى. اعاشتاردىڭ اراسىندا وتە سيرەك كەزدەسەتىن ءسىبىردىڭ كوك شىرشاسى, قاراعاي, قايىڭ سياقتى باعالى كوشەتتەر بار. اللەيا اشىلىپ, بەلگىتاس ورناتىلدى. جەرگىلىكتى تەلەارنا ديرەكتورى باۋىرجان ايتقازيننىڭ ايتۋىنشا, الداعى ۋاقىتتا كوگەرىپ, كوبەيەتىن بۇل اللەيا قالا تۇرعىندارى مەن قوناقتارىنىڭ دەمالاتىن ورنىنا اينالادى.
– جۋرناليستەر ەككەن جاس قايىڭدار, كىشكەنە شىرشالار جىلدار وتكەن سوڭ جايقالىپ ءوسىپ, ۇلكەن اللەياعا اينالاتىنىنا سەنەمىز. ءبىز قالامىزدى كورىكتەندىرۋگە ۇلەس قوستىق دەپ بىلەمىز, – دەدى باۋىرجان ايتقازين. الداعى ۋاقىتتا «50 يگى ءىس» اتتى جوباسىنىڭ شەڭبەرىندە سوعىس ارداگەرلەرىنە, الەۋمەتتىك از قامتاماسىز ەتىلگەن وتباسىلارعا قولۇشىن بەرىپ, قولداۋ كورسەتىلەدى. سونداي-اق, ءومىر مەن ءولىمنىڭ اراسىندا جاتقان ناۋقاستارعا دونور بولۋ ۇيىمداستىرىلماق.
فاريدا بىقاي, «ەگەمەن قازاقستان».
پاۆلودار.
