بيىل ۇلى جەڭىستىڭ 70 جىلدىعىنا وراي شىعىس قازاقستاندا كوپتەگەن تاعىلىمدى جوبالار جۇزەگە اسىرىلۋدا. بۇل تۋرالى باسىلىمنىڭ بىرنەشە ساندارىندا جانە گازەت سايتىندا جازعان بولاتىنبىز.
وبلىستىڭ قالالارى مەن اۋداندارىندا جوعارى دەڭگەيدە ۇيىمداستىرىلعان مەرەيتويلىق شارالار قاھارماندىق كورسەتىپ, قان مايداننان قايتپاعان بوزداقتار مەن ەل-جەرىن جاۋدان قورعاپ قالعان حاس باتىرلارىمىزدى ارداقتاۋعا ارنالدى. ايتا كەتەر بولساق, كوكپەكتى اۋدانىنىڭ پودگورنوە اۋىلىندا وسى ەلدى مەكەندە تۋىپ-وسكەن ءۇش بىردەي كەڭەس وداعىنىڭ باتىرىنا جانە بارشا مايدانگەرلەرگە ارنالعان مەموريالدىق كەشەن بوي كوتەردى. وبلىس ورتالىعىنداعى ەرتىس پەن ءۇلبى وزەندەرىنىڭ تۇيىسكەن تۇسىندا قايتا جاڭعىرتىلعان داڭق مەموريالىندا 7199 وسكەمەندىك ۇلى وتان سوعىسىنىڭ ارداگەرىنە ارنالعان 7199 شىراق جاعىلدى. شىعىسقازاقستاندىق مايدانگەرلەر استانادا وتكەن اسكەري شەرۋگە قاتىستى. كوپتەگەن ارداگەرلەرگە شيپاجايلارعا جولداما بەرىلدى. سەمەي قالاسى مەن باسقا دا اۋدانداردا «ماڭگىلىك پولك» اكتسياسى ۇيىمداستىرىلىپ, ارداگەرلەرگە ارنالعان سپەكتاكلدەر, كينو كورسەتىلىمدەرى ءوتتى. وسىنداي ۇرپاققا ۇلاعات بولار شارالاردىڭ ءبىرى – شىعىسقازاقستاندىق ارداگەرلەرگە ارنالعان اقپاراتتىق پورتالدىڭ اشىلۋى دەۋگە بولادى. جاقىندا ا.پۋشكين اتىنداعى وبلىستىق كىتاپحانادا اتالعان سايتتىڭ سالتاناتتى تۇساۋكەسەرى ءوتتى. ەندى عالامتور ارقىلى ۇلى وتان سوعىسىنىڭ ارداگەرلەرى, تىل ەڭبەكككەرلەرى مەن كونتسلاگەر تۇتقىندارى تۋرالى, ولاردىڭ وتتى جىلداردا باستان وتكەرگەن قيىندىقتارى مەن ەرلىككە تولى ومىرلەرى جونىندەگى بارلىق اقپاراتتار اتالعان سايتقا ورنالاستىرىلاتىن بولادى. شىعىس وڭىرىندە اشىلعان veteranvko.kz سايتى وسكەلەڭ ۇرپاققا ەلەكتروندى فورماتتا جاۋىنگەر جەرلەستەرى جونىندە مول ماعلۇماتتار ۇسىنۋىمەن ەرەكشەلەنبەك. – بۇل جوبانى ۇلى جەڭىستىڭ 70 جىلدىق مەرەيتويىنا ورايلاستىرىپ جاسادىق. سايتتىڭ ءتۇرلى بولىمدەرىندە شىعىسقازاقستاندىق ارداگەرلەر جونىندە بارلىق اقپاراتتى تاۋىپ, وقۋعا بولادى. سونداي-اق, بەينەسيۋجەتتەر, ەرلىك داڭقى تۋرالى ارداگەرلەردىڭ ءوزى اڭگىمەلەگەن بەينە جانە اۋديوماتەريالدار, ولاردان الىنعان سۇحباتتاردى تابا الاسىزدار. بۇگىنگى تاڭدا ءبىزدىڭ وڭىرىمىزدە كوزى ءتىرى ءۇش كەڭەس وداعىنىڭ باتىرى تۇرادى. شەتەلدەردە تۇراتىندارى دا بار. وسى باتىرلار تۋرالى اقپاراتتى دا ورنالاستىرۋعا جانە سۇحبات الىپ, سايتقا سالۋعا تىرىساتىن بولامىز. سونىمەن بىرگە, سايتقا سوعىس جىلدارىندا جۇمىس ىستەگەن وندىرىستىك كاسىپورىندار مەن مايدان شەبىنەن الىستا, جەڭىس ءۇشىن تەر توككەن تىل ارداگەرلەرى دە قامتىلادى. داڭق وردەنىنىڭ تولىق يەگەرى اتانعان باتىرلارىمىز تۋرالى مالىمەتتەر دە قالىس قالمايدى. سايت جان-جاقتى ءارى وقىرماندارعا قىزىقتى بولۋى ءۇشىن سوعىس جىلدارىنداعى اۋديوماتەريالدارمەن, فوتوسۋرەتتەرمەن ۇدايى تولىقتىرىلىپ وتىرادى, – دەدى اتالعان تۇساۋكەسەردە وبلىس اكىمىنىڭ ورىنباسارى جاقسىلىق ومار. سونداي-اق, سايتتا جاۋىنگەر حاتتارى, مۇراعاتتىق قۇجاتتار مەن مايدانگەرلەر ەسىمىمەن اتالاتىن كوشە, مەكەمە اتاۋلارى, سوعىس جىلدارىنداعى گازەت تىگىندىلەرى, جاڭالىقتار مەن وقيعالارعا ارنالعان بولىمدەر بار. اقپاراتتىق پورتال وبلىستىق مادەنيەت, مۇراعاتتار جانە قۇجاتتاما باسقارماسىنىڭ كومەگىمەن قۇرىلدى. ايتا كەتكەن ءلازىم, ۇلى وتان سوعىسىندا شىعىس وڭىرىنەن 109 كەڭەس وداعىنىڭ باتىرى مەن 22 داڭق وردەنىنىڭ تولىق يەگەرى شىققان.
دۋمان اناش, «ەگەمەن قازاقستان».
وسكەمەن.
