استانانىڭ كۇن ساناپ ءوسىپ, كوركەيىپ كەلە جاتقانىن كورگەندە كوڭىلىڭ مارقايىپ, مەرەيىڭ وسە تۇسەدى. مۇنداي ماقتانىش سەزىمى ءوز تاعدىرىن ەلىنىڭ بولاشاعىمەن بايلانىستىرا قارايتىن قازاقستاندىقتاردىڭ اربىرىندە كەزدەسەتىنىنە سەنىمدىمىز.
از عانا ۋاقىتتىڭ ىشىندە الەم تانىعان, تالايلار تامسانعان, ساياسي-ەكونوميكالىق, مادەني-رۋحاني ورتالىققا اينالىپ ۇلگەرگەن استانا جونىندە كوپ ايتۋعا بولادى. اسىرەسە, قالاداعى زاماناۋي ۇلگىدەگى عيماراتتار, دەمالىس الاڭدارى, حالىقتىڭ يگىلىگىنە ارنالعان الەۋمەتتىك نىساندار, ايناداي جارقىراعان كوشەلەر جانە باسقالار جونىندە تالماي سويلەي بەرگىڭ كەلەدى. اقوردا, سەنات, ءماجىلىس, ۇكىمەت ۇيلەرى, «بايتەرەك», تاۋەلسىزدىك سارايى, بەيبىتشىلىك جانە كەلىسىم سارايى, «حان شاتىر», «استانا ارەنا», «استانا وپەرا» تەاترى, «قازاقستان» كونتسەرت زالى, ۇلتتىق مۋزەي, نازارباەۆ ۋنيۆەرسيتەت, ەلباسى كىتاپحاناسى جانە تاعى باسقالار بولىپ تىزبەكتەلىپ كەتە بەرەدى. بۇل استانانىڭ ساياسي ءارى رۋحاني ءىرى ورتالىققا اينالعانىن انىق اڭعارتادى.
بۇگىن ءبىز جوعارىدا اتالىپ وتكەن عيماراتتاردىڭ اراسىنداعى ەلباسى كىتاپحاناسىنا كەڭىرەك توقتالماقپىز. ماقساتىمىز – وسىناۋ ايدىك تە اسەم, ءمان-ماڭىزى جوعارى, زاماناۋي ساۋلەت ونەرىنىڭ وزىق ۇلگىلەرىنىڭ ءبىرى ساناتىنداعى اتالعان نىسانمەن تانىستىرۋ. اتالعان مەملەكەتتىك مەكەمە ەلباسىنىڭ 2014 جىلدىڭ 13 ناۋرىزىنداعى «قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كىتاپحاناسى» مەملەكەتتىك مەكەمەسىنىڭ كەيبىر ماسەلەلەرى تۋرالى» جارلىعىمەن قۇرىلعان-دى. قۇرىلتايشىسى – قازاقستان رەسپۋبليكاسىنىڭ پرەزيدەنتى, وكىلەتتى ورگانى – قازاقستان رەسپۋبليكاسى پرەزيدەنتىنىڭ اكىمشىلىگى. ونى قۇرۋداعى نيەت – قازاقستان پرەزيدەنتىنىڭ جەكە كىتاپحاناسى مەن جەكە مۇراعاتىنىڭ جۇمىسىن ۇيىمداستىرۋ, ەلىمىزدىڭ قالىپتاسۋى مەن دامۋىن, وسىناۋ ۇدەرىستەگى تۇڭعىش پرەزيدەنتتىڭ جەتەكشى ءرولىن, ونىڭ جاسامپازدىق-شىعارماشىلىق يدەيالارى مەن باستامالارىنىڭ مازمۇنىن زەردەلەۋ جانە ەلباسىنىڭ باستامالارىن اقپاراتتىق-يميدجدىك تۇرعىدان ىلگەرىلەتۋ.
جالپى, تۇڭعىش پرەزيدەنت كىتاپحاناسى مەملەكەت باسشىسىنىڭ ورتالىعى بولىپ تۇرعانىمەن ەرەكشە. ياعني, بۇل مەكەمە كىتاپحانا, مۇراعات قىزمەتىمەن تىكەلەي اينالىسسا دا, قىزمەتتىك سيپاتى ادەتتەگى كوپشىلىكتىك كىتاپحانالاردان وزگەشە. ويتكەنى, بۇل نىسان – ەلباسىنىڭ جەكە كىتاپحاناسى, جەكە مۇراعاتى. پرەزيدەنتتىك كىتاپحانالاردىڭ تاريحىنا ۇڭىلسەك, بىزدەگىدەي تاجىريبە اقش-تا عانا, ونىڭ ءوزى ءبىر-اق رەت ورىن الىپتى. بيلىك باسىندا وتىرعان كەزىندە فرانكلين رۋزۆەلت ءوزىنىڭ پرەزيدەنتتىك ورتالىعىن جاساقتاعان. سونىڭ نەگىزىندە كەيىن ونىڭ ەسىمىمەن اتالعان كىتاپحانا-مۇراجاي بوي كوتەرگەن-ءدى.
ەلباسى كىتاپحاناسى ورنالاسقان كەشەن – استانا قالاسىنىڭ ماقتانىشىنا اينالعان ساۋلەتتىك تۋىندىلاردىڭ ءبىرى دەپ تولىق سەنىممەن ايتا الامىز. عيمارات 2013 جىلى بريتانيالىق تانىمال ساۋلەتشى نورمان فوستەردىڭ جوباسى بويىنشا سالىنعان. جالپى اۋماعى – 28 مىڭ شارشى مەتردەن استام. عيمارات اسپانعا, ياعني ۇشار بيىككە ۇمتىلعان كوز جانارى ءتارىزدى. ول وزىندىك ءزاۋلىم دە قايتالانباس سىرتقى كەلبەتىمەن قازاق ەلىنىڭ قارىشتاپ دامۋ باعدارىن, ومىرلىك جولىن, قۋاتىن كورسەتەدى. مۇندا مەملەكەت باسشىسىنىڭ قاتىسۋىمەن اسا اۋقىمدى ءارى زور ماڭىزعا يە حالىقارالىق, رەسپۋبليكالىق جيىندار وتكىزىلىپ تۇرادى. ماسەلەن, 2014 جىلدىڭ 11 قاراشاسىندا ەلباسى نۇرسۇلتان نازارباەۆ «نۇرلى جول – بولاشاققا باستار جول» جولداۋىن وسى نىساندا جاريالادى. سونىمەن قاتار, ەلباسى بيىل وتكەن پرەزيدەنتتىك سايلاۋدىڭ الدىن الا قورىتىندى مالىمەتتەرىن پارتيالاستارىمەن بىرگە وسى عيماراتتا تىڭدادى. وسىعان قاراپ, كىتاپحانانىڭ قازىردىڭ وزىندە-اق تاريحي ماڭىزدى نىسانعا اينالعانىن بايقاۋعا بولادى.
عيماراتتىڭ 1-قاباتىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ جەكە مۇراعاتى ورنالاسقان. ول ەلباسىنىڭ ومىرباياندىق, شىعارماشىلىق ماتەريالدارىنان, مەملەكەتتىك جانە قوعامدىق قىزمەت بارىسىندا جينالعان قۇجاتتاردان تۇرادى. جەكە مۇراعات قورىندا 127 مىڭنان استام بىرلىك قۇجات جيناقتالعان. ەلباسى كىتاپحاناسىنىڭ تاعى ءبىر ەرەكشەلىگى, وندا مەملەكەت باسشىسىنا سىيعا تارتىلعان ەكسپوناتتار دا ساقتالادى. بۇگىن قوردا 400-گە جۋىق ەكسپونات بار ەكەن. ولار – سىيلىقتار, ەلباسىنىڭ جەكە زاتتارى, ونەر ونىمدەرى, راريتەتتەر. دالىرەگى, مەملەكەت جانە ۇكىمەت باسشىلارىنىڭ, بىرقاتار ەلدەردىڭ رەسمي وكىلدەرىنىڭ, حالىقارالىق كومپانيالار مەن ۇيىمداردىڭ, اتاقتى مەملەكەت, ساياسي, قوعام جانە ونەر قايراتكەرلەرىنىڭ قازاقستان پرەزيدەنتىنە رەسمي ساپارلارى, ءىس-شارالار بارىسىندا بەرگەن سىيلىقتارى وسىندا ساقتاۋلى.
ەلباسى كىتاپحاناسىنىڭ 2-قاباتىندا ەكسپوزيتسيا-كورمە ورنالاسقان. مۇندا «الەمدى وزگەرتەتىن يدەيالار» اتتى ينتەراكتيۆتىك ءبىلىم بەرۋ ورتالىعى بار. ەلباسى كىتاپحاناسىنىڭ تاقىرىپتىق-ينتەراكتيۆتىك بولىگىنىڭ نەگىزگى وزەگى – «پرەزيدەنتتىك ەكسپوزيتسيا». بۇل بولىمدە نۇرسۇلتان نازارباەۆتىڭ تۇلعالىق قاسيەتتەرى تۋرالى جان-جاقتى مالىمەت ۇسىنىلعان. تۇراقتى ەكسپوزيتسيانىڭ مىندەتى – قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ يدەيالارىن كورسەتۋ.
عيماراتتىڭ 3-قاباتىندا ەلباسىنىڭ جەكە كىتاپحاناسى ورنالاسقان. ەلباسىنىڭ ەڭبەكتەرى قازاقستاننىڭ دامۋىنداعى ەلەۋلى وقيعالاردى, مەملەكەتىمىزدىڭ قارىشتى قادامدارىن ايقىن كورسەتەدى. ەكسپوزيتسيانى قازاقستان رەسپۋبليكاسىنىڭ تۇڭعىش پرەزيدەنتى ن.ءا.نازارباەۆ تۋرالى قازاقستاندىق جانە شەتەلدىك اۆتورلاردىڭ كىتاپتارى, سونداي-اق, ەلىمىزدىڭ سىرتقى ساياساتىنىڭ قالىپتاسۋى مەن دامۋى, شەت مەملەكەتتەرمەن ديپلوماتيالىق قارىم-قاتىناستارى تۋرالى كىتاپتار جالعاستىرادى. مادەني مۇرانى ساقتاۋ – مەملەكەت باسشىسىنىڭ اسا ماڭىزدى باستاماسى. سوندىقتان دا ەكسپوزيتسيادان «مادەني مۇرا» باعدارلاماسى بويىنشا شىعارىلعان كىتاپتار – «بابالار ءسوزى», «ورىس, تۇرىك, پارسى, موڭعول جانە قىتاي دەرەككوزدەرىندەگى قازاقستان تاريحى» ويىپ ورىن العان. مۇندا «الەم ادەبيەتى» گالەرەياسى دا بار.
ەلباسىنىڭ جەكە كىتاپحاناسى قورىندا نۇرسۇلتان نازارباەۆتىڭ 1960-جىلداردان باستاپ جيناعان كىتاپتارى ساقتاۋلى. «سيرەك قور» كوللەكتسياسىندا XVIII-XIX عاسىرلاردا ءار تىلدە جارىق كورگەن سيرەك كىتاپتار قويىلعان. «سىيعا بەرىلگەن كىتاپتار» توپتاماسىن ەلباسىمىزعا ءار جىلدارى كورنەكتى ساياسي جانە قوعام قايراتكەرلەرى تارتۋ ەتكەن باسىلىمدار قۇرايدى. كىتاپحانادا وقىرمانداردىڭ تىنىعىپ, دەمالۋى ءۇشىن بارلىق جاعداي قاراستىرىلعان.
جولدىباي بازار,
«ەگەمەن قازاقستان».
سۋرەتتەردى تۇسىرگەن ەرلان وماروۆ.
