«مىڭ جىلدا ءبىر بولاتىن توي» چەشەنستاندا ءوتتى

بىرەۋ ۇيلەنگەن ەكەن, وندا تۇرعان نە بار دەيمىز عوي. بىراق چەشەنستاندا اۋداندىق پوليتسيانىڭ باستىعى 47 جاستاعى ناجۋد گۋچيگوۆتىڭ 17 جاسار حەدا (لۋيزا) گويلابيەۆاعا ۇيلەنۋى قازىر اقپارات قۇرالدارىنىڭ, اسىرەسە, الەۋمەتتىك جەلىلەردىڭ ايعا جۋىق ۋاقىتتان بەرگى باستى تاقىرىبىنا اينالىپ وتىر. وسى جەردە چەشەن رەسپۋبليكا­سىنىڭ باسشىسى رامزان قادىروۆ­تىڭ ءسوزىن كەلتىرۋ قاجەت بولىپ تۇر: «مەن بۇگىنگە دەيىن عاسىر تويى دەپ مۇراگەر ۋيليام مەن كەترين ميدلتونداردىڭ نەكەلەسۋ سالتاناتىن ايتۋعا بولار دەپ ويلاۋشى ەدىم, – دەدى ول ءوزىنىڭ Instragram-ىن­دا. – بىراق سوڭعى ءبىراز كۇننىڭ وقي­عاسى ناجۋد گۋچيگوۆ پەن لۋيزا گوي­لابيەۆانىڭ ۇيلەنۋ تويى مىڭ­جىلدىق سالتاناتى بولاتىنىنا سەنىمدىمىن. بۇل ۇيلەنۋ تويىنا قىزىعۋشىلىق تانىتقان باق سانى قازىر 1,5 مىڭنان استى. اۆستراليادان, موناكودان حابارلاسىپ جاتىر. گروزنىي قالاسىندا وتەتىن ناجۋد پەن لۋيزانىڭ نەكەسىن قيۋ سالتاناتىنا كەلىڭىزدەر!». شاقىرۋعا رەسپۋبليكا باسشىسى جۇرگەن سوڭ, شاماسى كەلگەندەر باراتىنى انىق. قالىڭدىقتى سول سالتاناتقا رەسپۋبليكا باسشىسى اكىمشىلىگىنىڭ جەتەكشىسى ماحومەد داۋدوۆ قولتىقتاپ اپاردى. تويدا رامزان قادىروۆتىڭ ءوزى «لەزگينكانى» بيلەدى. سوندا باس­قالار قايتىپ تۇرسىن. ءبارى دە شابىلدى. راسىندا دا, توي داڭ­عازالىقتىڭ بيىك شىڭىنا كوتەرىلدى. سوندا بۇل تويعا جۇرتتىڭ نازارى نەگە اۋدى؟ وتكەن ءساۋىر ايىنىڭ سوڭعى كۇندەرىندە «نوۆايا گازەتا» باسىلىمىندا ونىڭ ءتىلشىسى ەلەنا ميلاشكينانىڭ چەشەنستاننىڭ نوۆو-يۋرت اۋدانىنداعى بايتاركي اۋىلىندا ءبىر مەكتەپ وقۋشىسىن جاسى بىرازعا كەلگەن اۋداندىق پوليتسيا باستىعى ايەل ۇستىنە الماق كورىنەدى, وعان قىزدىڭ اتا-اناسى امالسىز كونەدى ەكەن, ايتپەسە, بۇلارعا پوليتسيا باستىعى قيانات جاماساق دەگەن ماقالاسى شىعىپ, جۇرتتى ەلەڭ ەتكىزدى. بۇعان رامزان قادىروۆ ارالاسىپ, ايرىقشا بەلسەندىلىك كورسەتىپ, بۇل ۇيلەنۋدىڭ زاڭعا ەشقانداي قايشىلىعى جوقتىعىن, الەمدە بۇل ادەتتەگى جاعداي ەكەنىن ءتۇرلى مىسال­دارمەن «دالەلدەدى». ءتىپتى, اتاق­تى اللا پۋگاچەۆانىڭ وزىنەن ەكى ەسە جاس ماكسيم گالكينگە تيگەنىن ايتادى. اڭگىمە رەسەي كونستيتۋتسيا­سى بويىنشا نەكەگە تۇرۋ 18-دەن باستالاتىنىندا. قالىڭدىق – 17-دە. زاڭسىزدىق. راس, كامەلەتكە تول­ماعانداردىڭ نەكەگە تۇرىپ جاتا­تىنى بار. بارلىق جەردە دە ونداي­لارعا زاڭ دا كەڭشىلىك جاسايدى. ال قادىروۆ ءوز قىزمەتكەرىنىڭ ارەكەتىن زاڭعا ساي ەتىپ كورسەتكىسى كەلەدى. بۇل جەردە قادىروۆ جەكە ەمەس, ونى رەسەيدىڭ بالا قۇقى جونىندەگى وكىلى پاۆەل استاحوۆ تا قولداپ وتىر. كاۆكازدا ەمانسيپاتسيا جانە جىنىستىق جەتىلۋ ەرتە بولاتىنىن العا توسىپ, بۇل نەكەنى زاڭعا سىيىستىرعان. ءتىپتى, ەرتە ۇيلەنۋ كەرەك, ايتپەسە, 27 جاسىڭدا كەمپىر بولاسىڭ دەگەن پىكىر ايتىپ, ايەل قاۋىمنىڭ شامىنا دا تيگەنى بار. قازىر سول استاحوۆتى ورنىنان الۋ جونىندە 15 مىڭ ادام قول قويعان پەتيتسيا پرەزيدەنت پۋتينگە جولداندى. ءسىرا, بۇل ونىڭ تۇبىنە دە جەتەتىن شىعار. ءسوز باسىندا ايتقانداي, بىرەۋ ۇيلەنگەن ەكەن, وندا تۇرعان نە بار دەۋگە دە بولعانداي-اۋ. ءتىپتى, ىمى­رامەن دە بىتەتىن نارسە. سول چە­شەنستاندا بۇدان باسقا شەشە­تىن ماسەلە جوق پا دەيسىڭ. رام­زان قادىروۆتىڭ وسى ىستەگەنى بەلسەن­دىلىگى تاڭداندىرادى. زاڭسىزدىق­تى قولداعاندا نە تابادى؟ وسىدان ءبىراز بۇرىن قادىروۆ رەسەي­دىڭ باسقا ايماعىنان كەلگەن قۇقىق­­تانۋشىلاردى اتۋ كەرەك دەپ تە شۋ­لاتقان. ۋكراينانىڭ شىعىسىن­دا چەشەن ەرىكتىلەرى بار دەپ تە ماقتانعان. ەندى تەررورشى تسارناەۆ­تى زاڭسىز جازالادىڭدار دەپ اقش-قا دا قىر كورسەتەدى. ءسىرا, ايقاي-شۋ, داڭعازامەن بەدەل كوتەرىلمەس.