قازىر شۇكىر, تالپىنعان ادامعا جۇمىس تابىلادى. تەك ىنتا -ىقىلاس بولسىن دە. وڭىردە ءىستىڭ ۇتىرىن تاۋىپ, ءوز كاسىبىن دوڭگەلەنتىپ كەتكەندەر قاتارى جىل وتكەن سايىن كوبەيىپ كەلەدى. بۇعان حالىقتىڭ نارىقتىق ەكونوميكانىڭ تالاپتارىن جەتە ءتۇسىنىپ, كاسىپكەرلىكتى يگەرۋگە تالاپتانۋى دا العىشارت جاساۋدا. سونداي-اق, ۇكىمەت تە بۇل باعىتتا ورتا جانە شاعىن بيزنەسپەن اينالىسۋشىلارعا قولداۋ-كومەك بەرەتىن باعدارلامالاردى جۇزەگە اسىرۋدا. وسىنداي جۇمىسسىزدارعا «ەكى قولعا ءبىر كۇرەك» تابۋعا مۇمكىندىك تۋدىرىپ وتىرعان «جۇمىسپەن قامتۋدىڭ جول كارتاسى-2020» مەملەكەتتىك باعدارلاماسىنىڭ يگىلىگىن كورۋشىلەردىڭ اراسىندا بۇرىن قازاققا توسىنداۋ كورىنەتىن كاسىپپەن اينالىسىپ, تۇرمىسىن تۇزەپ جاتقاندار دا بارشىلىق. سونىڭ ءبىرى وسى باعدارلامانىڭ ەكىنشى باعىتىنا قاتىسۋشى قوبدا اۋىلىنىڭ تۇرعىنى مايرا بيماشەۆا دەسەك قاتەلەسپەيمىز. ول كەزىندە قازاق قورەكتىك قۋاتى بار اسقا ساناماعان ساڭىراۋقۇلاق ءوسىرىپ, وتباسىنىڭ ناپاقاسىن ايىرىپ وتىر.
ارينە, ءبىزدىڭ وڭىرگە توسىنداۋ كاسىپپەن اينالىسۋ مايرا نۇرلانقىزىنا وڭايعا تۇسكەن جوق. باستاپقىدا جۇرەكسىنگەنى دا راس. وعان ساڭىراۋقۇلاق وسىرۋمەن اينالىسۋعا اپاسى اقمارال اقىل-كەڭەس بەرگەن ەكەن. ءوز ءىسىمدى اشسام دەپ جۇرگەن جاس كەلىنشەكتىڭ باستاماسىن جولداسى اماندىق تا قولداي كەتەدى. «كەڭەسىپ پىشكەن تون كەلتە بولماس» دەگەندەي, ەكى بىردەي ەت جاقىنىنان قولداۋ تاپقان مايرا بيماشەۆا 2014 جىلى شىلدە ايىندا قوبدا اۋدانىنىڭ جۇمىسپەن قامتۋ ورتالىعىنا كەلىپ, قالاي شاعىن نەسيە الۋعا بولاتىنى تۋرالى كەڭەس الادى. سول جىلى تامىز ايىندا كاسىپكەرلىك نەگىزدەرىنە وقىپ, قولىنا سەرتيفيكات تيىسىمەن شارۋانى جۇرگىزۋگە كىرىسەدى. ءوز كاسىبىن جۇرگىزۋدىڭ قىر-سىرىنا قانىققان ونىڭ بويىنا سەنىمدىلىك ۇيالاي تۇسەدى. وتكەن جىلى قىركۇيەك ايىندا ساڭىراۋقۇلاق ءوسىرۋ جانە وتكىزۋگە «جۇمىسپەن قامتۋدىڭ جول كارتاسى-2020 » مەملەكەتتىك باعدارلاماسىنىڭ ەكىنشى باعىتى اياسىندا 1,5 ميلليون تەڭگە نەسيەگە قول جەتكىزەدى. العان قاراجاتقا جالپى الاڭى 30 شارشى مەتر شاعىن جىلىجاي سالىپ, 100 كەلى ميتسەلي, قوسىمشا تىڭايتقىشتار جانە باسقا قاجەتتى زاتتاردى ساتىپ الادى. جولداسى اماندىق قاجەتتى قۇرال-جابدىقتاردى ورناتۋعا قولعابىس بەرەدى. ءسويتىپ, قوبدالىقتار ءۇشىن تىڭ شارۋا – ساڭىراۋقۇلاق وسىرۋگە كىرىسىپ كەتەدى. – «ۆەشەنكا» ساڭىراۋقۇلاعىن بىزدە دە وسىرۋگە بولاتىنىن ەستىگەندە بويىمدا وسى كاسىپپەن اينالىسۋعا دەگەن قۇلشىنىس پايدا بولدى. ۇلكەن جەر تەلىمى مەن باستاپقى كاپيتالى جوق كاسىپكەرگە ءتيىمدى تەحنولوگيا ەكەن. بۇل ساڭىراۋقۇلاقتاردى ۇيدە, شاعىن جىلىجايدا وسىرۋگە بولادى. قارا ەسەپكە سالىپ قاراسام, ونىڭ وتكىزۋ باعاسى كارتوپ, قىرىققابات, قياردان الدەقايدا قىمبات بولىپ شىقتى. ءسويتىپ, تاۋەكەلگە بەل بۋىپ, جۇمىستى باستادىم, – دەيدى جاس كاسىپكەر مايرا بيماشەۆا قازىر. الايدا, ءبارى وڭتايىنان كەلە قويماعانى دا شىندىق. ونىڭ ايتۋىنشا, قىستىڭ كوزى قىراۋدا ساڭىراۋقۇلاق وسىرۋگە قاجەتتى استىق سابانىن تابۋ قيىنعا ءتۇسىپتى. سۋبستراتتى دايىنداۋ ءۇشىن تۋرالعان ساباندى ىستىق سۋعا بۋلاندىرىپ, سۋىعاننان كەيىن پوليەتيلەن قاپشىقتارعا سالىپ, ميتسەليمەن ارالاستىرعان. ساڭىراۋقۇلاق تۇقىمىن ىستىق سۋعا شىلانعان زالالسىزداندىرىلعان ۇساقتالعان سابانعا وتىرعىزادى, قوسىمشا مينەرالدى تىڭايتقىشتارمەن قورەكتەندىرەدى. – سودان كەيىن بارىپ وزدەرىمىز اۋلاداعى ۇيشىكتە جاسالعان جىلىجايداعى سورەلەرگە قويامىز, ءۇش كۇن وتكەننەن كەيىن بارىپ, ءوسىپ شىعۋى ءۇشىن قاپتاردىڭ بەس-التى جەرىنەن تىلىمدەر جاسالادى. 15-20 كۇننەن كەيىن قاپتارداعى تىلىمدەردەن ساڭىراۋقۇلاقتار ءوسىپ شىعا باستايدى. ول ءۇشىن ونى ءوسىرۋ تەحنولوگياسىن قاتاڭ ساقتاۋ قاجەت. ءبىر قاپتان 3 كەلىگە دەيىن «ۆەشەنكا» ساڭىراۋقۇلاعىن جيناۋعا بولادى. بۇل ءوزى ۇڭعىل-شۇڭعىلى كوپ شارۋا. ساڭىراۋقۇلاق جىلۋدى سۇيەدى, بولمەدەگى بولماشى اۋا وزگەرىسىنە دە سەزىمتال. كەزدەيسوق باكتەريادان قىرىلىپ قالۋى دا مۇمكىن. كوپ ادامنىڭ ساڭىراۋقۇلاق ءوسىرۋدەن بويىن اۋلاق سالاتىنى دا سوندىقتان, – دەيدى كاسىپكەر كەلىنشەك. مايرا قارىنداسىمىز ساڭىراۋقۇلاق تۇقىمى – ميتسەليدى شىمكەتتەن ساتىپ اكەلگەن. ءبىر ساڭىراۋقۇلاق بلوگىن جاساۋ ءۇشىن 200 گرامم ميتسەلي جۇمسالادى ەكەن. – تەك تەز ارادا استا-توك پايدا تابۋدى كوزدەسەڭ, تابىسقا جەتە المايسىڭ. بار ىنتا-ىقىلاسىڭمەن جۇمىس ىستەۋ قاجەت. شارۋانى جۇرگىزۋ بارىسىندا كوپ نارسەنى وقۋعا, ىزدەنۋگە تۋرا كەلدى, – دەيدى ول ءسوز اراسىندا. «ۆەشەنكا» ساڭىراۋقۇلاعى كەرەمەت دامىمەن دە, قورەكتىك قۋاتىمەن دە ەرەكشەلەندى. ونىڭ ادام اعزاسىنان رادينۋكليدتەردى شىعاراتىن, ىسىك جاسۋشالارىمەن كۇرەسەتىن شيپالىق قاسيەتى دە بار ەكەنىن ايتادى بىلەتىندەر. ۇستىمىزدەگى جىلدىڭ قاڭتار ايىندا شاعىن جىلىجايدا ءوسىرىلگەن ساڭىراۋقۇلاقتان ەكى رەت ءونىم الىنعان. كاسىپكەر بۇل ساڭىراۋقۇلاقتاردى اقتوبە قالاسىنداعى مەيرامحانالار مەن ءدامحانالارعا, قوعامدىق تاماقتاندىرۋ ورىندارىنا وتكىزگەن. بولاشاقتا دۇكەندەر مەن بازارلارعا دا شىعارۋدى كوزدەۋدە. ءوز كاسىبىنىڭ كوزىن تاپقان, تابىستىڭ ءدامىن تاتقان كاسىپكەر كەلىنشەكتىڭ بولاشاققا باعىتتالعان جوبا-جوسپارى دا جوق ەمەس. ول الداعى ۋاقىتتا ساڭىراۋقۇلاقتى تۇزداپ, مارينادتاپ, وڭدەپ, قالبىرعا سالىپ ساۋداعا شىعارۋدى ويلاستىرۋدا. ءتۇرلى سالاتتار جاسايتىن, ساڭىراۋقۇلاق قوسىلعان مانتى, تۇشپارا, پاشتەت شىعاراتىن تسەح اشۋدى قاراستىرۋدا. ساڭىراۋقۇلاق تۇقىمىن زەرتتەيتىن زەرتحانا كەرەكتىگى دە ويىندا ءجۇر. – تىڭ كاسىپتىڭ قىر-سىرىن ۇعىنىپ ءىس قىلىپ جاتقان جاس كاسىپكەردىڭ ونەگەسى وزگەلەرگە دە قوزعاۋ سالارى ءسوزسىز. بيىل وسى باعدارلاماعا قاتىسۋعا تىلەك ءبىلدىرگەن 98 ادامنىڭ 52-ءسى الەۋمەتتىك كەلىسىمشارتقا قول قويدى. باعدارلامانىڭ ءبىرىنشى باعىتى بويىنشا 20,7 ميلليون تەڭگە ءبولىنىپ, 10 جاڭا جۇمىس ورنى اشىلدى, ال ەكىنشى باعىتى بويىنشا 10 ادام قايتا قارجىلاندىرۋدان 20,2 ميلليون تەڭگە شاعىن نەسيە الدى, 8 ادامدى كاسىپكەرلىك نەگىزدەرىنە وقىتۋ جوسپارلانۋدا. ءۇشىنشى باعىت بويىنشا 27 جۇمىسسىز الەۋمەتتىك جۇمىستارعا ورنالاستىرىلدى, 25 ادامدى جاستار تاجىريبەسىنەن وتكىزۋ كوزدەلۋدە, – دەيدى اۋداندىق جۇمىسپەن قامتۋ ورتالىعى ديرەكتورىنىڭ مىندەتىن اتقارۋشى ءىنجۋ اەتوۆا.
ساتىبالدى ءساۋىرباي, «ەگەمەن قازاقستان».
اقتوبە وبلىسى, قوبدا اۋدانى. سۋرەتتە: جاس كاسىپكەر مايرا بيماشەۆا.
