بۇگىن داڭقتى بوكسشىمىز گەننادي گولوۆكين ءوزىنىڭ كاسىپقوي رينگتەگى 34-جەكپە-جەگىن وتكىزىپ, بارشا قازاقستاندىقتاردىڭ كەزەكتى جەكسەنبىسىن جەڭىسپەن باستاپ بەردى. اتاپ ايتساق, ساڭلاق سپورتشىمىز كانادالىق داۆيد لەمەنى 8-راۋندتا تەحنيكالىق نوكاۋتپەن جەڭىپ, ورتا سالماقتا WBA (Super), IBO جانە WBC (Interim) نۇسقالارى بويىنشا چەمپيوندىق اتاعىن قورعاپ قانا قويماي, قارسىلاسىنا تيەسىلى بولعان IBF تۇجىرىمى بويىنشا دا چەمپيوندىق بەلدىكتى يەمدەندى. بۇل جەكپە-جەك تۋرالى تولىعىراق
مىنا سىلتەمە ارقىلى بىلە الاسىزدار. وسى رەتتە, ءبىز بوكسشىنىڭ بالالىق شاعى مەن ءجاسوسپىرىم كەزى تۋرالى بايانداۋدى ءجون سانادىق.
گەننادي گولوۆكين قاراعاندىنىڭ مايقۇدىق اۋدانىندا تۋىپ-ءوستى. بولاشاق چەمپيوننىڭ بالالىق شاعىندا بۇل اۋدان قىلمىستىڭ وشاعى سانالاتىن. سول اۋداندا بىرگە وسكەن قۇرداستارى ونىڭ سونداي قيىن احۋالعا قاراماستان, وتە سالقىنقاندى, قاراپايىم بولعانىن ايتادى. «ءتىپتى سول كەزدەگى الەۋمەتتىك جاعدايعا بايلانىستى ءبىر كەزدەرى وسىلاي الەم نازارىن وزىنە اۋداراتىن داڭقتى بوكسشى بولۋدى ارمانداۋدىڭ ءوزى مۇمكىن ەمەستەي كورىنەتىن», – دەيدى گەنامەن قاتار سىنىپتا وقىپ, ءبىر شاعىن اۋداندا تۇرعان قۇرداسى اسقار ابدراحمەتوۆ.
ول جونىندە اسقار: «بالا كۇنىمدە گەنامەن جاقىن دوس بولدىم دەي المايمىن. دەگەنمەن, ءبىر ورتادا ءجيى باسقوساتىن ەدىك. سونداي-اق, ەكەۋمىزدىڭ بوكس ۇيىرمەسىنە قاتار جازىلعانىمىز ەسىمدە. قاي جاستا ەكەنىمىز ناقتى ەسىمدە قالماپتى, ايتەۋىر سپورت سەكتسياسىنا بىرگە كەلدىك. جاتتىعۋ زالىمىز مايقۇدىقتاعى ءبىرىنشى «فازانكادا» ورنالاسقان. توبىمىزدا بىرنەشە بالا بولدىق. جاتتىعۋدىڭ العاشقى كۇنى-اق, گەنا ءوزىنىڭ تالانت يەسى ەكەنىن كورسەتە ءبىلدى. ولاي دەيتىنىم, ۇيىرمەگە كەلگەن كۇنى جاتتىقتىرۋشى ءبارىمىزدى كەزەكپەن رينگكە شىعارىپ, شاما-شارقىمىزدى تەكسەرىپ كوردى. سول كەزدە جەتەكشىمىز گولوۆكيننىڭ قابىلەتى مەن شەبەرلىگىنە ءتانتى بولىپ, ونىڭ فاميلياسىن ەرەكشە اتاعانى ەسىمدە», – دەيدى.
گەننادي مەن اسقاردىڭ بالالىق جانە ءجاسوسپىرىم كەزى مايقۇدىقتىڭ 14-شاعىن اۋدانىندا ءوتتى. ول كەزدە اتالعان اۋدانداعى جاعدايدىڭ قانداي بولعانىن جوعارىدا نازارعا الدىق. سودان دا بولار, گولوۆكين ءبىر سوزىندە بالا كۇنىندە ادىلدىگىن دالەلدەۋ ءۇشىن ءجيى جۇدىرىق جۇمساۋعا تۋرا كەلگەنىن ايتقان ەدى. ءوزى بۇل جاعدايدى سول كەزدەگى قالىپتى ءومىر سالتى دەپ اتادى. ودان باسقا دا قىزىقتى جايتتاردى اسقار بىلاي ەسكە الادى:
«بالا كۇنىمىزدە قازىرگىدەي ويىن-ساۋىق ورتالىقتارى بولعان جوق. ءبىز ءۇشىن سول كەزدەگى ەڭ قىزىقتى ساۋىق تۇرلەرىنىڭ ءبىرى توبەلەسىپ ويناۋ ەدى. سول ءۇشىن قالىڭ كيىنىپ الاتىنبىز. ەسكى كۇپايكىلەر مەن ت ۇلىپتاردى كيىپ, ءبىر-بىرىمىزگە جۇدىرىق سىلتەپ, ۇيرەنگەن ءادىس-تاسىلدەرىمىزدى قولدانامىز. مۇنىڭ ءبارى ويىن بولعاندىقتان, ەشكىم جاراقات المايدى. ارينە, اۋدانىمىزدا ناشاقورلار مەن ىشىمدىككە سالىنعاندار بولدى. الايدا, سپورتقا اڭسارى اۋعان بىزدەر ءۇشىن ونىڭ ءبارى ەش قىزىقسىز بولدى. كەيدە ءسويتىپ ويناپ ءجۇرىپ شىنداپ توبەلەسىپ قالامىز. بۇل ەندى كەز كەلگەن بالالىق شاقتىڭ جازىلماعان زاڭدىلىعى عوي» – دەگەن اسقار, جالپىلاي العاندا, مايقۇدىقتىڭ سونشالىقتى ادام شوشىرلىقتاي ەمەستىگىن, ونىڭ دا سول كەزدەگى كوپ اۋدانداردىڭ ءبىرى بولعانىن تىلگە تيەك ەتتى.
سونىمەن قاتار, ول اتى شىققان اۋدان تۋرالى: «مايقۇدىق – ادەتتەگى اۋدانداردىڭ ءبىرى. كەرەمەت مەكتەبىمىز بولاتىن. ايتەۋىر ءبىز تۇرعان 14-شاعىن اۋداندا بارلىعى جاقسى بولدى. راس, كەيبىر كورشى شاعىن اۋدانداردا جانتۇرشىگەرلىك جايتتار تىركەلىپ جاتتى. مىسالى, اۋىلدىق جەرلەردەن كەلگەندەردى پىشاقتاپ كەتىپتى دەگەندەردى ەستيتىنبىز. مۇمكىن ءبىزدى ونداي تەرىس ارەكەتتەردەن سپورت قۇتقارىپ قالعان شىعار. سپورتتى سەرىك ەتكەنىمىز ءۇشىن جولىمىز بولدى دەپ سانايمىن. سەبەبى, ءبىزدىڭ بالالىق شاعىمىز كوشەدە ءوتتى. شىنى كەرەك, ول كەزدە ۇيدە وتىرىپ ويناۋ دەيتىن تۇسىنىك بولمادى. ۋاقىتىمىزدىڭ كوبى دالادا, بالالاردىڭ ورتاسىندا وتەتىن. ءبىزدىڭ اۋداندا وزىمىزدەن ۇلكەن بالالار قاتال بولدى. ەگەر ولار تەمەكى شەككەنىمىزدى كورسە, سازايىمىزدى بەرەتىن. سوندىقتان كوشەنىڭ جازىلماعان تارتىبىنە باعىناتىنبىز. مەن ءۇشىن سول ءتارتىپتىڭ ءبىرى سپورت بولعانداي. ويتكەنى, سول ورتاعا ءسىڭىسۋ ءۇشىن ۇيىرمەگە جازىلعاندار از بولعان جوق», – دەدى.
گەننادي گولوۆكين مايقۇدىقتاعى ەڭ ۇلكەن ءبىلىم ورداسى – №65 مەكتەپتە وقىدى. بۇگىندە بۇل مەكتەپتە 1435 وقۋشى قازاق جانە ورىس تىلدەرىندە ءبىلىم الۋدا. بوكسشىنىڭ مەكتەپ قابىرعاسىنداعى ساتتەرى تۋرالى اسقار ابدراحمەتوۆ بىلاي دەيدى: «مەكتەبىمىز وتە ۇلكەن بولدى. ول جەردە ءتارتىپ وتە قاتال ەدى. ءبىلىم الۋ ءۇشىن بارلىق جاعداي جاسالعان جانە كەز كەلگەن شارا جۇيەلى ۇيىمداستىرىلاتىن. بىردە كورشى اۋدانداعى مەكتەپ جابىلىپ, ول جاقتاعى وقۋشىلاردىڭ بارلىعىن بىزگە اۋىستىردى. سول كەزدە جاڭادان كەلگەن وقۋشىلارمەن از-كەم كيكىلجىڭدەر بولعانى راس. بىراق ول قاقتىعىستار تەز باسىلىپ قالدى. ال گەناعا كەلەتىن بولساق, ول ەكەۋمىز قاتار سىنىپتا وقىدىق. ونىڭ سىنىپ جەتەكشىسى – اننا بوريسوۆنا تسوي دەيتىن مۇعالىم. ونى ءبىز ابتس دەيتىنبىز. اننا بوريسوۆنا وزىندىك ەرەكشەلىگى بار ۇستاز. ول گەنانى ءاردايىم «بوكسەر» دەپ شاقىراتىن. مەكتەبىمىزگە قاتىستى تاعى ءبىر ەسكەرە كەتەتىن جايت, بەسىنشىنى بىتىرگەن سوڭ ءار سىنىپ بىلگىلى ءبىر باعىتتى تاڭدايدى. ماسەلەن, ءبىزدىڭ سىنىپ كوممەرتسيالىق باعىتتا ءبىلىم الاتىن بولسا, گەنالار بيومەديتسينالىق سالانى تاڭدادى. سوعان سايكەس, تاڭداعان باعىت بويىنشا, تەرەڭدەتىلگەن باعدارلاما قولدانىلادى. ايتسە دە, جاسىراتىنى جوق, ول كەزدە بۇل تاڭداۋدىڭ ماڭىزىن تولىق تۇسىنبەدىك. بار بولعانى كۇندەلىكتى ساباعىمىزعا بارىپ, ادەتتەگىدەي وقىپ جۇردىك. گەنا سپورتتى سەرىك ەتكەن كوپ وقۋشىلار سياقتى ورتاشا وقىدى. ەسەسىنە ول ءوزىن سپورتتا بيىكتەردەن كورسەتىپ ءجۇردى. مىسالى, گولوۆكين بوكستان بولەك, فۋتبول مەن باسكەتبولدى وتە شەبەر وينايدى. ءسويتىپ ءجۇرىپ مەكتەپ بىتىردىك. ءبارىمىز سوڭعى ەمتيحاننان سۇرىنبەي وتتىك. ەشقانداي بۇرا تارتۋ نەمەسە باعانى كوتەرمەلەۋ بولعان ەمەس. وعان سول كەزدەگى جۇيە – ەمتيحاندى اۋىزشا جانە جازباشا تاپسىرۋدىڭ دا اسەرى بولعان شىعار».
№65 مەكتەپ مايقۇدىقتىڭ اۆتوستانساسىندا ورنالاسقان. ستانسا اۋىل ورتالىعىنان ايتارلىقتاي الىس. قاراعاندى اۆتوبۋستارىنىڭ باسىم بولىگى ءۇشىن بۇل ستانسا سوڭعى ايالداما بولىپ سانالادى. وسىدان-اق, مەكتەپتىڭ تىم شالعاي ورنالاسقانىن بىلە بەرىڭىز. ال گەنناديدىڭ ءۇيى مەكتەپتەن تاياق تاستام جەردە بولدى. وقۋ ورداسىندا كىرەبەرىس جاقتا ورنالاسقان سپورت زالى كوزىڭە بىردەن تۇسەدى.
«ارينە, گەننادي گولوۆكيننىڭ ءبىزدىڭ مەكتەپتە وقىعانىن ءبارى بىلەدى. ءبىز ونىمەن ماقتانامىز. ونىڭ قۇرمەتىنە اشىلعان تاقتا دا بار. الايدا, ول مەكتەپ بىتىرگەلى ءبىرتالاي ۋاقىت ءوتتى. قازىر گەناعا ساباق بىرگەن مۇعالىمدەردىڭ بارلىعى زەينەتكەرلىككە شىعىپ كەتكەن. سىنىپ جەتەكشىسى اننا بوريسوۆنا قالادا تۇرادى, ول دا قۇرمەت دەمالىسىندا», – دەيدى ۇستازدارىنىڭ ءبىرى. بۇگىندە مەكتەپتە گەنناديگە ساباق بەرگەن جالعىز مۇعالىم قالعان ەكەن. ول – ينفورماتيكا ءپانىنىڭ مۇعالىمى گالينا پەتروۆنا.
«مەن ول كەزدە جۇمىسقا ەندى عانا ورنالاسىپ جاتقان ەدىم. گەننادي گولوۆكين جوعارعى سىنىپتا وقىپ ءجۇردى. جارىستارعا قاتىسام دەپ, ساباقتان ءجيى قالادى. ايتەۋىر جارىستارى بىتپەيتىن. ونىڭ ەڭ ەرەكشە قاسيەتى – ەشقاشان دورەكىلىك كورسەتپەيدى جانە ۇلكەندى سىيلاي بىلەدى. قاتارلاستارى دا ونى سول ءۇشىن قاتتى قۇرمەتتەۋشى ەدى», – دەپ ەسكە الدى مۇعالىمى.
«سپورت الاڭىندا گولوۆكين ءوزىن سۋداعى بالىقتاي سەزىنەدى. ول كەز كەلگەن جارىستا بارلىق ءادىستى قازىرگىدەي وتە شەبەر ورىندايتىن. فۋتبول ويناعان كەزدە شابۋىل شەبىندە ءجۇرىپ, وتە كوپ گول سوقتى. مەكتەپتە كەشكىسىن جاتتىعۋ بولاتىن. ارينە, گەنا سپورتشى رەتىندە فۋتبولدى جاقسى وينادى. ول ءاردايىم جەڭگىسى كەلەتىن. كەيدە ءبىز ويلاعانداي بولماسا, سابىرسىزدانىپ كەتەدى. ءبارىمىزدىڭ جوعارى دەڭگەيدە ويناپ, بارىمىزدى سالعانىمىزدى قالايدى. ويتكەنى ءوزى سونداي. ءالى ەسىمدە, بىردە مەكتەپتە باسكەتبولدان جارىس ءوتتى. ەكەۋمىز ءبىر كوماندادا وينادىق. مەن ءۇشىن ول ءبىرىنشى ويىن ەدى. سوندىقتان قاتتى تولقىدىم. ونىڭ ۇستىنە, بۇكىل مەكتەپ بىزگە قاراپ وتىر. سونىڭ سالدارىنان بولار, دوپپەن ەكى قادام جاساپ قويدىم. ارينە, تورەشى بىردەن ىسقىرىق شالدى. سول ساتتە گەنانىڭ ماعان ايقايلاپ بەرگەنى بار. سودان كەيىن عانا ءوز-وزىمە كەلىپ, ءتاۋىر ويىن كورسەتە باستادىم», – دەگەن اسقار ابدراحمەتوۆ بوكسشىمەن ءبىر كوماندادا ويناعان ساتتەرىن ك ۇلىپ ەسكە الدى.
بالا كەزىندە گەنناديدىڭ دەنە ءبىتىمى سونشالىقتى شىمىر بولدى دەۋگە كەلمەيتىن. قاجىر-قايرات پەن تولاسسىز جاتتىعۋدىڭ ارقاسىندا بۇگىنگىدەي «نوكاۋت پاتشاسىنا» اينالدى. بۇل جونىندە قۇرداسى: «كەرىسىنشە سىڭارى ماكسيم بالالىق شاعىندا بويى ۇزىن ءارى ىرىلەۋ بولدى. ونىڭ دەنە ءبىتىمى مىعىم, ال گەنا ارىق ءارى بويى دا قىسقالاۋ ەدى. بىراق توعىزىنشى سىنىپتان كەيىن ول تەز ءوسىپ كەتتى. ماكسيم دە سپورتتان الىس ەمەس. ول فۋتبولدى جاقسى وينايتىن. ايرىقشا اتاپ وتەتىن جايت, ولار بالا بولىپ ەشقاشان ءبىر-بىرىمەن توبەلەسكەن ەمەس. ءتىپتى رينگتەگى سپاررينگتەن دە باستارىن الىپ قاشاتىن», – دەدى.
«گەنا سانقوي جىگىت. بالا كەزىمىزدە مايقۇدىقتا «گورنياك» دەيتىن بازار بولدى. سپورت كيىمدەرىن – شالبار, كروسسوۆكيدى سول جەردەن ساتىپ الاتىنبىز. مەكتەپكە وقۋلىقتارىمىزدى دورباعا سالىپ اپاراتىنبىز. بىردە گەنانىڭ مەكتەپكە دجينسى كومبينەزون كيىپ كەلگەنى ەسىمدە. ول كەز دجينسى ەندى عانا سانگە اينالا باستاعان ءسات. ارينە, ءبارىمىز وعان قىزىعا دا قىزعانا قارادىق. ول سول كەزدىڭ وزىندە-اق ترەندكە اينالىپ ۇلگەردى», – دەگەن اسقار سوعان قاراماستان, گەنناديدىڭ قاراپايىمدىلىعى ەرەكشە سەزىلىپ تۇراتىنىن نازارعا الدى. «ءتىپتى تالاي سپورتتىق جەتىستىكتەرگە قول جەتسىزسە دە ول قازىرگى مىنەزىنەن تانعان ەمەس», – دەيدى.
اڭگىمە بارىسىندا اسقار سپورتشىنىڭ تاعى ءبىر قىرىن اشىپ بەردى. «گەنا گيتارادا وتە جاقسى وينايدى. بۇل ايتارلىقتاي تاڭسىق تا ەمەس شىعار. سەبەبى, سول ۋاقىتتا بىزدە بۇل اسپاپتا ويناۋ جاقسى ۇردىسكە اينالدى. ءار ءۇيدىڭ اۋلاسىندا توپ بولىپ جينالىپ الىپ, گيتارامەن ءان سالاتىنبىز. ءبارى بىركەلكى وينايدى. ءبىرلى-ەكىلى اككورد ەكىنىڭ ءبىرىنىڭ قولىنان كەلەتىن. سول كەزدەر ءبىزدىڭ ساعىنىشپەن ەسكە الاتىن التىن ۋاقىتتارىمىز ەكەن عوي. ايتپاقشى, گەنانىڭ نەمىس وۆچاركاسى دا بولدى. ونىڭ قاراپايىمدىلىعى تۋرالى كوپ ايتۋعا بولادى. سونىڭ ءبىرى قانشا جەردەن مىقتى بولسا دا ول ەشقاشان ءبىرىنشى بولىپ كيكىلجىڭ باستاعان ەمەس».
سونداي-اق, اسقار بۇگىندە كوپشىلىكتىڭ نازارىن ەرىكسىز اۋداراتىن گەننادي گولوۆكيننىڭ وتانشىلدىعى تۋرالى: «گەنانىڭ قازاقستانعا دەگەن وسىنشالىق ءپاتريوتيزمى مەن ماحابباتى جونىندە ءجيى ايتىلادى. ونىڭ كىندىك قانى قاراعاندىدا تامدى. ول وسى توپىراقتا تاربيەلەندى, اتا-اناسى دا وسى جەردە تۋىپ-ءوستى. ەلگە دەگەن ماحابباتىنىڭ ماڭگىلىك بولۋىنىڭ سەبەبى سول. مەن بوكستى تەك گەنانىڭ جەكپە-جەكتەرى ءۇشىن كورەمىن. جەرلەسىڭنىڭ جەڭىسىن كورۋدىڭ ءوزى كەرەمەت كوڭىل-كۇي سىيلايدى. مەن وعان تەك جەڭىس تىلەيمىن! الداعى ۋاقىتتا ونى بۇدان دا اتىشۋلى جەكپە-جەكتەر مەن جوعارى سىياقىلار كۇتىپ تۇرعانىنا سەنىمىم مول. ول بۇعان بۇرىننان لايىق!», – دەدى.
قازىر مايقۇدىق مۇلدە وزگەرگەن. بۇل اۋداننىڭ جاستارىن بۇرىنعىداي قىلمىستىق وقيعالاردىڭ ورتاسىنان ەمەس, تەر سىڭگەن جاتتىعۋ زالدارىنان ءجيى كەزدەستىرەسىڭ. بارلىعىنىڭ ۇلگى تۇتاتىنى – اتاقتى جەرلەستەرى. ءبارى دە گەنانىڭ جولىمەن ءجۇرۋدى قالايدى. سەبەبى, گەننادي گولوۆكين ولارعا كەنشىلەر قالاسى – قاراعاندىنىڭ شەتىندەگى شاعىن اۋداننان الەم استاناسى – نيۋ-يورككە جەتۋدىڭ ۇلگىسىن كورسەتىپ بەردى.
ەلامان قوڭىر.
سۋرەت: vk.com, vesti.kz.
