«ەرتىس» جانكۇيەرلەرگە جاڭا قۇرامىن تانىستىردى

استانا. 12 ناۋرىز. «ەرتىس» فۋتبول كومانداسى جانكۇيەرلەرىنە جاڭا قۇرامىن تانىستىردى. جاڭا ماۋسىمعا تىڭعىلىقتى دايىندالعان پاۆلودارلىقتار قاتارىن بىرنەشە بەلگىلى فۋتبولشىمەن تولىقتىردى. بۇل تۋرالى egemen.kz حابارلادى. ماۋسىم الدىندا «ەرتىسكە» ەلىمىزدەگى ەڭ تانىمال فۋتبولشىلاردىڭ ءبىرى سامات سماقوۆ پەن داۆيد لوريا كەلدى. سونداي-اق, وزگە دە وتاندىق ويىنشىلار پاۆلودارعا قونىس اۋداردى. قازاقستاندىقتاردان بولەك, «ەرتىس» ساپىنا شەتەلدىك فۋتبولشىلار دا قوسىلدى. اتاپ ايتار بولساق, رەسەيدىڭ «انجي», «دينامو» (ماسكەۋ) جانە «لوكوموتيۆ» كوماندالارىندا ويناعان الان گاتاگوۆ بۇدان بىلاي «ەرتىستىڭ» ويىنشىسى. ودان بولەك, سەرگەي يگناتەۆ پەن ارتەم سامسونوۆ ەسىمدى تاعى ەكى رەسەيلىك «ەرتىستىڭ» نامىسىن قورعايتىن بولادى. شەتتەن كەلگەن فۋتبولشىلاردىڭ قاتارىندا يۆان گراف (حورۆاتيا), يزۋ ازۋكا (نيگەريا) جانە بۋركينا-فاسو ۇلتتىق قۇراماسىنىڭ ويىنشىسى اريستيد باسە بار. «ەرتىستىڭ» باس جاتتىقتىرۋشىسىنىڭ ايتۋىنشا, كومانداعا نەگىزىنەن جاس جانە بولاشاعىنان ءۇمىت كۇتتىرەتىن ويىنشىلار كەلگەن. بيىل پاۆلودارلىق كوماندا ءۇشىن مەرەيلى جىل. كلۋبتىڭ 50 جىلدىعىن اتاپ وتەتىن ۇجىم ماۋسىمدى ۇزدىك ناتيجەمەن اياقتاۋدى ماقسات تۇتادى. «ەرتىس» ەل چەمپيوناتىن بەس رەت جەڭىپ العان العاشقى كوماندا ەكەنىن ايتا كەتەيىك. ەلامان قوڭىر. دەرەك: egemen.kz. سۋرەت: fc-irtysh.kz.