مىسىردا قۇرىلعان قوعامدىق بىرلەستىك

قازاقستاننىڭ كاير قالاسىنداعى ەلشىلى­گىن­دە ەلىمىزدىڭ ديپلوماتتارى جانە مىسىر قاۋىم­داستىعى وكىلدەرىنىڭ اراسىندا قازاق­ستان-مىسىر ىنتىماقتاستىعىن دامىتۋ جولدا­رى تۋرالى پىكىر الماسۋ ءۇشىن ءداستۇرلى كەزدەسۋ ءوتتى. اتالعان شاراعا مىسىردىڭ كورنەكتى قوعام جانە مەملەكەت قايراتكەرلەرى, ساراپتامالىق جانە عىلىمي ورتالاردىڭ, ىسكەر توپتاردىڭ وكىلدەرى, سونداي-اق, جەتەكشى باق جۋرناليستەرى قاتىستى. كەزدەسۋدە قازاقستان ەلشىسى بەرىك ارىن قوناقتاردى قازاقستاننىڭ ىشكى ساياسي ومىرىندەگى اسا ماڭىزدى وقيعالارمەن, اتاپ ايتقاندا, ەلىمىزدە جۋىردا وتكەن پرەزيدەنتتىك سايلاۋدىڭ ناتيجەلەرى تۋرالى حاباردار ەتتى. ساۋدا-ەكونوميكالىق بايلانىستاردى كەڭەيتۋ ماسەلەلەرىن تالقىلاۋ بارىسىندا قاتىسۋشىلارعا پرەزيدەنت نۇرسۇلتان نازارباەۆتىڭ «نۇرلى جول – بولاشاققا باستار جول» جولداۋى مەن «قازاقستان- 2050» ستراتەگياسىن ىسكە اسىرۋ شەڭبەرىندە ۇكىمەتتىڭ داعدارىسقا قارسى جانە ىنتالاندىرۋ شارالارىن قولعا الىپ جاتقاندىعى, سونىمەن قاتار, ەلباسى باستاماسىمەن ايقىندالعان بەس ينستيتۋتتىق رەفورما تۋرالى اقپارات بەرىلدى. ءىس-شاراعا قاتىسۋشىلار ەلىمىزدىڭ مادەني-الەۋمەتتىك ومىرىندەگى جاڭالىقتار مەن حالىقارالىق باستامالارىنا, سونىڭ ىشىندە, الداعى وتەتىن الەمدىك جانە ءداستۇرلى دىندەر كوشباسشىلارىنىڭ V سەزىنە قىزىعۋشىلىق تانىتتى. ولار قازاقستاننىڭ تاۋەلسىزدىك جىلدارى قول جەتكىزگەن جەتىستىكتەرىن جوعارى باعالاپ, مۇندا پرەزيدەنت ن.ءا. نازارباەۆتىڭ وراسان زور ەڭبەگى بار ەكەنىن اتاپ ءوتتى. قاتىسۋشىلار قازاقستان مەن مىسىر اراسىنداعى ەكىجاقتى قارىم-قاتىناستاردى نىعايتۋدى جانە ودان ءارى دامىتۋدى كوزدەي­­تىن «قازاقستان-مىسىر دوستىعىنىڭ قاۋىم­داستىعى» اتتى قوعامدىق بىرلەستىك قۇرۋ تۋرالى باستاما كوتەرىپ, ونى ءبىراۋىزدان قولدادى. قاۋىمداستىق توراعالىعىنا «قىزىل تەڭىز» (حۋرگادا قالاسى) پروۆينتسياسىنىڭ باسشىسى ا.ابدۋللا سايلاندى. مىسىر قوعامىنىڭ بەلگىلى وكىلدەرى «ءال-ازھاردىڭ» جانىنان قۇرىلعان ۇنقاتىسۋ ورتالىعىنىڭ توراعاسى, مىسىردىڭ بۇرىنعى ۋاقىفتار ءمينيسترى ح.زاقزۇق, «ءال-ازھار» ۋنيۆەرسيتەتىنىڭ بۇرىنعى رەكتورى, دوكتور ۋ. ءال-ابدي, ءار جىلدارى مىسىردىڭ قازاقستاندا ەلشىلەرى بولعان ابداللا ءال-ارنۋسي مەن نابيلا سالياما, «ءال-احرام» مەن «ءال-گۋمحۋريا» مەديا-حولدينگتەرىنىڭ جانە وزگە دە باق-تاردىڭ جۋرناليستەرى, «رەحانا گرۋپپ» كومپانياسىنىڭ باسشىسى يا.ابباس پەن باسقا دا بىرقاتار ءىرى كاسىپكەرلەر, بەلگىلى قوعام قايراتكەرلەرى مەن عالىمدار قاۋىمداستىقتىڭ قۇرمەتتى مۇشەلەرى بولىپ كىردى. «ەگەمەن-اقپارات».