استانا. 18 قازان. بۇگىن كاسىپقوي بوكستا ەل نامىسىن ابىرويمەن قورعاپ جۇرگەن وتانداسىمىز گەننادي گولوۆكين اقش-تىڭ نيۋ-يورك قالاسىندا كانادالىق داۆيد لەمەمەن كەزدەستى. تارتىستى جەكپە-جەك ناتيجەسىندە وتانداسىمىز 8-راۋندتا تەحنيكالىق نوكاۋتپەن جەڭىسكە جەتتى. بۇل تۋرالى egemen.kz حابارلادى.
جەكپە-جەك اتاقتى Madisson Square Garden ارەناسىندا ءوتتى. گولوۆكين العاشقى مينۋتتاردان باستاپ شابۋىلعا شىعىپ, لەمەنىڭ وسال تۇسىن ىزدەدى. ءۇشىنشى راۋندتا كانادالىق بىرنەشە قارىمتا شابۋىل ۇيىمداستىردى. الايدا, ساۋاتتى قورعانا بىلگەن گولوۆكين قارسىلاسىنىڭ جويقىن سوققىلارىن وزىنە دارىتپادى.
بەسىنشى راۋندتا وتانداسىمىزدىڭ بۇيىردەن جاساعان اۋىر سوققىسىنا شىداي الماعان لەمە تىزەرلەۋگە ءماجبۇر بولدى. الايدا, ول جەكپە-جەكتى ءارى قاراي جالعاستىرۋدىڭ امالىن تاپتى.
دەگەنمەن, كانادالىق بۇل جويقىن سوققىدان كەيىن ءوز-وزىنە كەلە الماي, قالعان ۋاقىتتا گولوۆكيننىڭ كەزەكتى نىساناسى عانا بولدى. ناتيجەسىندە مۇرنىنان قان توقتاماي, كوزى قاراۋىتقان لەمەگە جانى اشىعان تورەشى 8-راۋندتا كەزدەسۋدى توقتاتۋعا ءماجبۇر بولدى.
وسىلايشا, گەننادي گولوۆكين ورتا سالماقتا WBA (Super), IBO جانە WBC (Interim) نۇسقالارى بويىنشا چەمپيوندىق اتاعىن قورعاپ قانا قويماي, لەمەگە تيەسىلى بولعان IBF تۇجىرىمى بويىنشا دا چەمپيوندىق بەلدىكتى يەمدەندى.
CompuBox ۇسىنعان دەرەككە سۇيەنسەك, كەزدەسۋ بارىسىندا گولوۆكين 549 سوققى جۇمساپ, سونىڭ 280-ءنىن دىتتەگەن جەرىنە ءدوپ تيگىزگەن. ال لەمە 335 سوققىنىڭ 89-ىن عانا ءدال باعىتتاعان.
بۇل قازاقستاندىقتىڭ كاسىپقوي رينگتەگى 34-جەكپە-جەگى. سونىڭ بارىندە جەڭىسكە جەتكەن گولوۆكين 31 مارتە قارسىلاسىنان نوكاۋتپەن باسىم ءتۇستى. سونداي-اق, وتانداسىمىز قاتارىنان 21 رەت كەزدەسۋىن مەرزىمىنەن بۇرىن اياقتاعانىن اتاپ وتكەن ءجون.
تاعى ءبىر ەسكەرەتىن جايت, گولوۆكين مەن لەمەنىڭ ايقاسى HBO تەلەارناسىنىڭ اقىلى ترانسلياتسيا جۇيەسى (PPV) بويىنشا كورسەتىلدى. بۇل ەكى بوكسشى ءۇشىن دە PPV-دەگى العاشقى جەكپە-جەك. بۇگىنگى كەشتە گەنانىڭ سىياقىسى 2 ملن دوللار بولسا داۆيد 1,5 ملن دوللارعا يە بولدى.
ەندى گولوۆكين ورتا سالماق بويىنشا WBC نۇسقاسىنىڭ چەمپيوندىق بەلدىگىنەن مىندەتتى ۇمىتكەر اتاندى. قازىرگى تاڭدا بۇل بەلدىك پۋەرتوريكولىق ميگەل كوتتوعا تيەسىلى. ول چەمپيوندىق اتاعىن قورعاۋ ءۇشىن 21 قاراشادا اقش-تىڭ لاس-ۆەگاس قالاسىندا مەكسيكالىق ساۋل «كانەلو» الۆارەسپەن جۇدىرىقتاسادى.
ەلامان قوڭىر.
دەرەك: egemen.kz.
سۋرەت: vk.com.
