وقۋلىقتارمەن قامتۋ ويداعىداي

ءبىلىم جانە عىلىم مينيسترلىگىندە ۆەدومستۆو باسشىسى اسلان ءسارىنجىپوۆتىڭ قاتىسۋىمەن مەكتەپتەردى وقۋلىقتارمەن قامتاماسىز ەتۋ ماسەلەسى بويىنشا ەلىمىزدىڭ بارلىق وبلىستارى, استانا مەن الماتى قالاسى ءبىلىم باسقارمالارى وكىلدەرىنىڭ قاتىسۋىمەن سەلەكتورلىق ەسەپ تىڭداۋ باسقوسۋى بولىپ ءوتتى. الدىن-الا الىنعان ءمالى­مەتتەر بويىنشا, ەلىمىزدىڭ بار­لىق وڭىرلەرىندەگى مەكتەپتەر وقۋلىقتارمەن تولىقتاي قامتاماسىز ەتىلىپتى. بيىلعى 2015-2016 وقۋ جىلىنداعى وقۋ بارىسىندا 4, 5, 6 جانە 11-سىنىپتارعا ارنالعان قايتا شىعارىلعان وقۋلىقتار پايدالانىلاتىن بولادى. ول وقۋلىقتاردى جەرگىلىكتى اتقارۋشى ورگانداردىڭ ساتىپ الۋى ءۇشىن وڭىرلىك بيۋدجەتتەن شامامەن 13 ملرد. تەڭگە بولىنگەن. وبلىستىق جانە استانا مەن الماتى قالالارىنىڭ ءبىلىم باسقار­مالارىنان الىنعان اقپاراتقا سايكەس, بۇگىندە ەلىمىزدىڭ بارلىق وڭىرلەرىنە جاڭا وقۋلىقتار تاراتىلىپتى. ال 1, 2, 3, 7, 8, 9, 10-سىنىپ وقۋشىلارى الدىڭعى جىلدارى شىققان وقۋلىقتارمەن قامتاماسىز ەتۋ مەكتەپ كىتاپحانالارىنىڭ قورىنان جوسپارلى تۇردە جۇزەگە اسىرىلادى. باسقوسۋ بارىسىندا مينيستر بارلىق وڭىرلەر وقۋلىقتارمەن تولىقتاي قامتاماسىز ەتىل­گەندىكتەن ولارعا جەكە-جەكە توق­تالىپ وتپەي, تەك كەمشىلىك ورىن الىپ, شاعىم تۇسكەن ءبىرلى-جارىم وڭىرلەردەگى جاعدايلاردى سۇراپ ءبىلدى. ماسەلەن, اقتوبە وڭىرىندەگى مەكتەپتەر وقۋلىقتارمەن 50% عانا قامتىلىپتى. كۇنى كەشەلەر قيىندىققا تاپ بولعان الماتى وبلىسىنىڭ تالعار اۋدانىنداعى جاعدايدىڭ تۇزەلگەنى بەلگىلى بولدى. سونداي-اق, الماتى قالاسىنداعى №65 مەكتەپ شاعىمىنىڭ قانا­عاتتاندىرىلعانى ايتىلدى. شىعىس قازاقستان وبلىسىنىڭ وقۋلىقپەن قامتاماسىز ەتىلۋى 88%-دى قۇراپ وتىرعانى ءمالىم بولدى. وڭىرلەرمەن بايلانىستا بولعان مينيستر ءبىلىم باسقارمالارى وكىلدەرىنە 1 قىركۇيەككە دەيىن بارلىق مەكتەپتەردىڭ وقۋلىقپەن قامتاماسىز ەتىلۋى كەرەكتىگىن باسا ايتىپ, الداعى دەمالىس كۇندەرىندە باسپا, وقۋلىق دۇكەندەرىمەن تىعىز بايلانىستا قارقىندى جۇمىس جۇرگىزىلۋى كەرەكتىگىن ەسكەرتىپ ءوتتى. سونداي-اق, وقۋلىقتاردى الداعى جىلدارعا ساقتاپ وتىراتىن مەكتەپ كىتاپحاناسى قورىنىڭ جۇمىسىن نازاردا ۇستاۋ, دۇكەندەردەگى ساتىلىپ جاتقان وقۋ قۇرالدارى باعاسىنىڭ قىمباتتاماۋىن قاداعالاۋ كەرەكتىگىن دە نازارعا سالدى. ال وقۋلىقتارمەن قامتاماسىز ەتە الماعان ايماقتىڭ ءتيىستى باسشىلارىنا جەرگىلىكتى اكىمشىلىك تاراپىنان شارا قولدانىلاتىنىن جەتكىزدى. بەرىك سادىر, «ەگەمەن قازاقستان».