جاقىندا وڭتۇستىك قازاقستان وبلىستىق سوتىنىڭ توراعاسى نۇرسەرىك ءشارىپوۆتىڭ باستاماسىمەن كونستيتۋتسيانىڭ 20 جىلدىعى مەرەكەسىنە وراي «بيلەرگە تاعزىم» اتتى ۆەلوشەرۋ ءوتتى.
قىرىق سۋديا قاتىسقان ۆەلوسيپەدشىلەر ساپارى وبلىستىق سوتتىڭ عيماراتى الدىنداعى «ءۇش ءبيدىڭ» ەسكەرتكىشى جانىنان باستاۋ الىپ, 40 شاقىرىم جولدى ارتقا تاستاعاننان كەيىن ورداباسى تاۋىندا ورنالاسقان «بىرلىك» مونۋمەنتىنە تابان تىرەدى.
ساپار الدىنداعى جيىنعا قاتىسۋشىلاردىڭ اتىنان ءسوز سويلەگەن وبلىستىق سوتتىڭ ءتوراعاسى ن.ءشارىپوۆ: «2015 جىل ەلىمىز ءۇشىن مەرەيلى دە مەرەكەلى جىل بولىپ باستالدى. بيىل ەلىمىزدە قازاق حاندىعىنىڭ 550 جىلدىعى مەن ۇلى جەڭىستىڭ 70 جىلدىعى جانە قازاقستان حالقى اسسامبلەياسى مەن كونستيتۋتسيانىڭ 20 جىلدىقتارىنا وراي ءتۇرلى ءىس-شارالار ۇيىمداستىرىلۋدا. ەڭ الدىمەن, بۇگىنگى تاۋەلسىز مەملەكەتىمىزگە تۇعىر بولعان قازاق حاندىعىنىڭ 550 جىلدىعىن اتاپ وتۋگە بارىنشا كوڭىل بولىنۋدە. سوعىس ارداگەرى, «ءۇش بي» توسبەلگىسىنىڭ يەگەرى, قازاقستاننىڭ «قۇرمەتتى سۋدياسى», ماقتاارال اۋدانىنىڭ «قۇرمەتتى ازاماتى» ايتجان بەكنازاروۆپەن, سوعىس جىلدارى ورداباسى اۋدانىندا سۋديالىق قىزمەت اتقارعان, تىل ارداگەرى جامال شويبەكوۆامەن اۋداندىق, وبلىستىق سوتتاردا كەزدەسۋلەر وتكىزىلدى. وبلىستاعى ەكىنشى دۇنيەجۇزىلىك سوعىسقا قاتىسۋشى 24 سۋدياعا «داڭق تاقتاسى» ورناتىلدى. سونىمەن قاتار, قازاق حاندىعىنىڭ 550 جىلدىعىنا وراي تۇركىستان قالاسىنداعى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىندە «ەسىم حاننىڭ ەسكى جولى – اۋىزشا قاعيدالار جيىنتىعىنىڭ وزىق ۇلگىلەرى» اتتى ايماقتىق عىلىمي كونفەرەنتسيا وتسە, ونىڭ اياسىندا «قازاق حاندىعىنىڭ تاريحىنداعى تۇركىستاننىڭ ورنى» تاقىرىبىندا جانە وعان قوسا سۋرەت, كىتاپ كورمەلەرى ۇيىمداستىرىلدى. كونفەرەنتسيادا قازاق حاندىعى تۇسىنداعى مەملەكەتتىك بيلىك, بيلەر سوتى مەن قازاقتاردىڭ ءداستۇرلى قۇقىعى تاقىرىبىندا بەلگىلى تاريحشى, زاڭگەر, ءتىلشى عالىمدار مەن زەرتتەۋشىلەردىڭ باياندامالارى تىڭدالىپ, ونىڭ قورىتىندىسى رەتىندە كونفەرەنتسيا ماتەريالدارى ءوز الدىنا كىتاپ بولىپ باسىلىپ شىقتى. ەندى, مىنە, كونستيتۋتسيانىڭ 20 جىلدىعىنا ارنالعان مىنا شارا سول جوبالاردىڭ جالعاسى ىسپەتتى. مۇنى وتكىزۋدەگى ماقسات بيىلعى مەرەيلى مەرەكەلەردى سالاماتتى ءومىر سالتىمەن ۇشتاستىرا وتىرىپ, بىرلىكتىڭ باستاۋى بولعان ورداباسى تاۋىنىڭ مارتەبەسىن قازاق حاندىعىنىڭ 550 جىلدىعىندا تاعى ءبىر مارتە جاڭعىرتۋ بولىپ تابىلادى», دەدى توراعا ءوز سوزىندە.
وسىدان كەيىن وڭتۇستىك قازاقستان وبلىسى اكىمىنىڭ ورىنباسارى ە.ايتاحانوۆ پەن وبلىستىق سپورت سالاسى ارداگەرلەرى كەڭەسىنىڭ توراعاسى ا.اسقار قۇتتىقتاۋ ءسوز سويلەپ, سۋديالارعا ءساتتى ساپار تىلەدى.
تۇسكە تاياۋ ۆەلوسيپەدشىلەر 40 شاقىرىم جولدى باسىپ ءوتىپ, رەسپۋبليكالىق «ورداباسى» ۇلتتىق تاريحي-مادەني قورىعىنداعى» مارەگە جەتتى. ولاردى ورداباسى اۋدانىنىڭ باسشىلارى مەن سپورت قايراتكەرلەرى جانە اۋىل تۇرعىندارى سالتاناتتى جاعدايدا قارسى الىپ, «نۇر وتان» پارتياسىنىڭ اۋداندىق فيليالىنىڭ توراعاسى ج.بوستاندىق ۆەلوشەرۋگە قاتىسۋشىلاردى قۇتتىقتاپ, ءسوز سويلەدى. ورداباسى تاۋىندا ورناتىلعان «بىرلىك» مونۋمەنتىنە گۇل شوقتارى قويىلىپ, تولە, قازىبەك جانە ايتەكە بيلەرگە تاعزىم ەتىلگەننەن كەيىن, ورداباسى اۋدانىنىڭ اكىمى س.ساپارباەۆ, وبلىستىق سوتتىڭ سۋدياسى ا.ەلشىباەۆ جانە اۋداننىڭ «قۇرمەتتى ازاماتى», ەڭبەك ارداگەرى ر.بيتۋعانوۆ ۆەلوشەرۋگە قاتىسۋشىلارعا العىستارىن جەتكىزدى. جوبا سوڭىندا وبلىستىق سوتتىڭ توراعاسى ن.ءشارىپوۆ مۇنداي ءىس-شارالاردىڭ, اسىرەسە, كەيىنگى جاستار ءۇشىن تاربيەلىك ءمانى وتە زور ەكەندىگىن اتاپ ءوتتى.
قابىل دۇيسەنبي,
وقو سوتىنىڭ اقپاراتتىق قامتاماسىز ەتۋ ءبولىمىنىڭ
باسشىسى.
