اقتوبەلىك ءونىم كورسەتىلدى

كەشە اقتوبەگە ينۆەستيتسيالار جانە دامۋ ءمينيسترى اسەت يسەكەشەۆ جۇمىس ساپارىمەن كەلدى. مينيستر جۇمىس ساپارىن وڭىردەگى قازاقستاننىڭ يندۋستريالاندىرۋ كارتاسىنا ەنگەن بىردەن-ءبىر ءىرى نىسان – «قازحروم» تۇك» اق فەرروقورىتپا زاۋىتىمەن تانىسۋدان باستادى. جوبانىڭ قۇنى 843 ميلليون اقش دوللارى تۇرادى, جىلدىق قۋاتى 440 مىڭ توننا جوعارى ساپالى فەرروحروم وندىرۋگە مۇمكىندىك بەرەدى. جوبانى پايدالانۋعا بەرۋدىڭ ناتيجەسىندە 290 جاڭا جۇمىس ورنى اشىلدى. سودان كەيىن اسەت يسەكەشەۆ وبلىس اكىمى بەردىبەك ساپارباەۆتىڭ باستاۋى­مەن «تەحنودوم» جشس جانە اقتوبە مۇناي قوندىرعىلارى زاۋىتىندا بولىپ, ءوندىرىستىڭ قازىرگى تاڭداعى جاعدايىمەن تانىستى. ءمينيستردىڭ كەلەسى بارعان نىسانى – اقتوبە رەلس ارقالىعى زاۋىتى. بۇل كاسىپورىن دا قازاقستاننىڭ يندۋستريالاندىرۋ كارتاسى اياسىندا سالىنعان. ونىڭ قۇنى 82,7 ميلليارد تەڭگە تۇرادى. زاۋىت تولىق قۋاتىنا شىققاندا جىلىنا 430 مىڭ توننا ءونىم شىعارادى. بارىنەن بۇرىن مۇندا جوعارى جىلدامدىقتاعى ماگيس­ترالداردا پايدالانىلاتىن ر65 ماركالى ۇزىندىعى 120 مەتر تەرموتوزىمدى رەلستەر شىعارىلادى. قالعان 230 تونناسى سورتتى پروكات تەمىر ونىمدەرى بولىپ كەلەدى. ناتيجەسىندە «قازاقستان تەمىر جولى» اق رەلس ونىمدەرىنە دەگەن سۇرانىسىن تولىق قامتاماسىز ەتەدى. سونداي-اق, وزبەكستان, ازەربايجان, تۇرىكمەنستان نارىعىنا شىعۋ دا قاراستىرىلۋدا. بۇدان باسقا زاۋىت قۇرىلىس يندۋسترياسىنىڭ اناعۇرلىم ءوسىپ وتىرعان سۇرانىسىن دا قامتاماسىز ەتەدى. اسەت يسەكەشەۆ, بەردىبەك ساپارباەۆ, سونداي-اق, «قازاقستان تەمىر جولى» اق پرەزيدەنتى اسقار مامين, «Siemens S.p.A» كومپانياسىنىڭ باس ديرەكتورى دجۋزەپپا فەرراريو, پارلامەنت دەپۋتاتتارى, مەملەكەتتىك ورگانداردىڭ, تمد جانە بالتىق ەلدەرى تەمىرجول اكىمشىلىكتەرىنىڭ وكىلدەرى زاۋىتتاعى رەلستىڭ شىعارىلۋ ۇدەرىسىنە قاتىستى. سالتاناتتى ساتتە «اقتوبە رەلس ارقالىعى» زاۋىتى» جشس ديرەكتورى اندرەي كۋزمين شاراعا قاتىسۋشىلارعا تەحنولوگيالىق ۇدەرىستى تەرەڭىرەك اڭگىمەلەدى. – ەلباسىنىڭ تاپسىرماسىمەن ين­دۋستريالاندىرۋ كارتاسى اياسىندا قىسقا مەرزىمدە قازاقستاندا جاڭا تەمىر­جول ماشينالارىن جاساۋ سالاسى قۇرىلدى. «General Electric», «Alstom», «Talgo», «Siemens» سياقتى الەمدىك كوشباسشى كومپانيالارمەن ارىپتەستىكتە جۇك جانە جولاۋشى تەپلوۆوزى, ەلەكتروۆوز, ۆاگوندار, ءىرى ۆاگوندىق قۇيمالار, قۇرىلىمنىڭ تەحنيكالىق قۇرالدارى ءوندىرىسى بويىنشا جاڭا زاۋىتتار   ىسكە قوسىلدى, – دەدى «قازاقستان تەمىر جولى» اق پرەزيدەنتى اسقار مامين. اقتوبە رەلس ارقالىعى زاۋىتىندا قازاقستانداعى تەمىرجول ماشينالارىن جاساۋدى دامىتۋ جانە حالىقارالىق ىنتىماقتاستىققا ارنالعان دوڭگەلەك ۇستەل بولدى. تالقىلاۋ بارىسىندا «تۇلپارتالگو», «ەلەكتروۆوز قۇراستىرۋ زاۋىتى» «لوكوموتيۆ قۇراستىرۋ زاۋىتى» سياقتى تەمىرجول ونىمدەرىن شىعا­راتىن كاسىپورىنداردىڭ جانە «قازاق­ستان دامۋ بانكى» اق قولداۋىنىڭ ەكسپورت­تىق تەتىكتەرىنىڭ تۇساۋكەسەرى بولدى. ءدوڭ­گەلەك ۇستەل اياسىندا اقتوبە رەلس ارقا­لىعى زاۋىتىنىڭ دايىن ونىمدەرىن جەتكى­زۋگە ازەربايجان, بەلورۋسسيا, گرۋزيا, وزبەكستان, تاجىكستان جانە قىرعىز­ستان تەمىرجول اكىمشىلىكتەرىمەن ىنتى­ماق­تاس­تىق تۋرالى مەموراندۋمعا قول قويىلدى. اسەت يسەكەشەۆ جانە وبلىس اكىمى بەردىبەك ساپارباەۆ باستاعان توپ يندۋستريالىق ايماققا باردى. مۇندا ونەركاسىپ ءوندىرىسى جانە 2015 -2019 جىلدارى ۇدەمەلى يندۋستريالىق-يننوۆاتسيالىق دامۋدىڭ مەملەكەتتىك باعدارلاماسىن جۇزەگە اسىرۋ ماسەلەلەرى بويىنشا كوشپەلى جيىن ءوتتى. جيىندا وبلىس اكىمىنىڭ ورىنباسارى عالي ەسقاليەۆ ەلىمىزدىڭ يندۋستريالاندىرۋ كارتاسىنا وڭىردەن جالپى سوماسى 799,9 ملن. تەڭگە بولاتىن 12,8 مىڭ جۇمىس ورنى اشىلاتىنداي 91 ينۆەستيتسيالىق جوبا ەنگىزىلگەنىن تىلگە تيەك ەتتى. ونىڭ ايتۋىنشا, ۇدەمەلى يندۋستريالىق-يننوۆاتسيالىق دامۋ باعدارلاماسىنىڭ العاشقى بەسجىلدىعىندا جالپى قۇنى 552,6 ميلليارد تەڭگە بولاتىن 71 جوبا ىسكە قوسىلىپ, 6,6 مىڭ جاڭا جۇمىس ورنى اشىلعان. يندۋستريالاندىرۋ كارتاسىنىڭ ەكىنشى بەسجىلدىعىندا جالپى سوماسى 247,3 ميلليارد تەڭگە تۇراتىن, 6,2 مىڭ جۇمىس ورنى اشىلاتىن 20 جوبا جۇزەگە اسىرىلۋدا. بيىلعى جىلى جالپى سوماسى 9,4 ميلليارد تەڭگە تۇراتىن, 689 جۇمىس ورنىن اشۋعا مۇمكىندىك بەرەتىن 8 ينۆەستيتسيالىق جوبا جۇزەگە اسىرىلۋدا. كوشپەلى جيىندا ينۆەستيتسيالىق جوبالاردى جۇزەگە اسىرۋ بارىسىندا قول بايلاۋ بولىپ وتىرعان كەيبىر ماسەلەلەر دە ورتاعا سالىندى. ساتىبالدى ءساۋىرباي, «ەگەمەن قازاقستان». اقتوبە وبلىسى.