قيال پاتشالىعىنىڭ پىراعى

م.اۋەزوۆ اتىنداعى ادەبيەت جانە ونەر ينستيتۋتى وتكىزگەن قازاق فولكلوريستيكاسى تۋرالى حالىقارالىق كونفەرەنتسيا اكادەميك سەيىت قاسقاباسوۆتىڭ مەرەيتويىنا ورايلاس­تىرىلدى. «عىلىم ورداسى» كىشى ءماجىلىس زالىنىڭ ءبىر قابىرعاسىن تۇتاس الىپ جاتقان كىتاپ كورمەسى بۇگىندە حا­لىق مۇراسىنىڭ شىراقشىسى, بابالار ءسوزىنىڭ ءباھادۇرى اتانعان اسا ءىرى فولكلوريست عالىمنىڭ شىعارماشىلىعىنا ارنالىپتى. قىرىق جىلدىق ەڭبەكتىڭ قورمال قورداسىنداي. اكادەميكتىڭ بارلىق دەرلىك عىلىمي شىعارمالارى, عالىم حاقىنداعى ومىرباياندىق دەرەككوزدەرى. ونىڭ رەداكتسياسىمەن شىققان ەڭبەكتەر. سەيىت اسقار ۇلىنىڭ ءوز زامانداستارى تۋرالى تولعاعان تولىمدى تۋىندىلارى. زەينوللا قابدولوۆ, رىمعالي نۇرعاليەۆ, اقسەلەۋ سەيدىمبەكوۆ سەكىلدى تۇلعالارمەن بىرگە تۇسكەن جادىگەر سۋرەتتەر. وسىنىڭ ءبارى عيبراتتى ويلارعا جەتەلەيتىندەي. مەملەكەتتىك سىيلىقتىڭ لاۋرەاتى, اتاقتى عالىم تۋرالى العاشقى ءسوزدى ادەبيەت جانە ونەر ينستيتۋتىنىڭ ديرەكتورى, ۇعا كوررەسپوندەنت-مۇشەسى ءۋاليحان قاليجانوۆ ايتتى. سەيىت قاسقاباسوۆتىڭ دارىندى عالىمدىعىمەن قوسا عىلىمداعى قارىمدى ۇيىمداستىرۋشىلىعى, قايراتكەرلىگى, الاش ارىستارىن اقتاۋ كەزىندەگى ەرەسەن ەڭبەگى مەن اقجولتاي ازاماتتىعى ەلگە ءمالىم. فولكلورتانۋ مەكتەبىنىڭ جاڭا باعىتتاعى نەگىزىن قالاعان ادام. 100 تومدىق «بابالار ءسوزى» سەرياسىن شىعارۋ الەمدە بالاماسى جوق ەرلىك ءىس دەپ باعالاندى. وسى جوباعا جەتەكشىلىك ەتكەن سەيىت قاسقاباسوۆ ەلباسى باستاعان «مادەني مۇرا» باعدارلاماسىنىڭ تابىستى ىسكە اسۋى­نا ۇلكەن ۇلەس قوستى. مۇنىڭ سىرتىندا «قازاق ادەبيەتى تاريحىنىڭ» 10 تومدىعى, ادەبي جادىگەرلەردىڭ 20 تومى, م.اۋەزوۆ شىعارمالارىنىڭ 50 تومدىق جيناعى قايراتكەر عالىم س.قاسقاباسوۆتىڭ ادەبيەت جانە ونەر ينستيتۋتىن باسقارعان كەزدەگى ۇلاعاتىنان حابار بەرگەندەي. كونفەرەنتسيادا فيلولوگيا عىلىمدارىنىڭ دوكتورى كەنجەحان ماتىجانوۆ «بابالار ءسوزىنىڭ ءباھادۇرى», فيلولوگيا عىلىمدارىنىڭ دوكتورى, پروفەسسور باقىتجان ازىباەۆا «جاڭا كوزقاراستى عالىم», فيلولوگيا عىلىمدارىنىڭ دوكتورى نۇرداۋلەت اقىش «س.قاسقاباسوۆ جانە تاۋەلسىزدىك ءداۋىر ادەبيەتى», فيلولوگيا عىلىمدارىنىڭ دوكتورى رايحان ەرعاليەۆا «كۋلتۋرولوگيچەسكيە يسسلەدوۆانيا اكادەميكا س.كاسكاباسوۆا» اتتى تاقىرىپتاردا تارتىمدى باياندامالار جاسادى. اكادەميك كوپجاسار نارىباەۆ مەرەيتوي يەسىنە ۇلتتىق عىلىم اكادەمياسىنىڭ قۇرمەت گراموتاسىن تابىس ەتىپ, قاراپايىمدىلىعىن, پاراساتتىلىعىن تىلگە تيەك ەتكەن جىلى لەبىز ارنادى. سونداي-اق, فولكلورتانۋ عىلىمىنىڭ كوشىن باستاۋشى عۇلاما عالىمدى ءال-فارابي اتىنداعى قازۇۋ رەكتورى, اكادەميك عالىم مۇتانوۆ, الماتى قالاسى اكىمىنىڭ اتىنان تىلدەردى دامىتۋ باسقارماسىنىڭ باسشىسى ماماي احەت, قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى, اقىن عالىم جايلىباي, مەملەكەتتىك سىيلىقتىڭ لاۋرەاتى شەريازدان ەلەۋكەنوۆ, ر.سۇلەيمەنوۆ اتىنداعى شىعىستانۋ ينستيتۋتىنىڭ ديرەكتورى ءابساتتار دەربىسالى, اقىن ءشومىشباي ساريەۆ جانە باسقالار قۇتتىقتاپ, فولكلور دەيتىن قيال پاتشالىعى پىراعىنىڭ يىعىنا شاپان جاۋىپ قۇرمەتتەدى. تۇستەن كەيىن كونفەرەنتسيا جۇمىسى «فولكلورتانۋ مەن ادەبيەتتانۋدىڭ وزەكتى ماسەلەلەرى» ءھام «مادەني مۇرا جانە ونەرتانۋ» اتتى جەكە سەكتسيالاردا جالعاستى. قورعانبەك امانجول, «ەگەمەن قازاقستان». الماتى. سۋرەتتى تۇسىرگەن يۋري بەككەر.