رەكۆيەم

رۋحاني كەلىسىم كۇنى قۇرمەتىنە «استانا وپەرا» تەاترىنىڭ ۇلكەن زالىندا دج. ۆەرديدىڭ 200 جىلدان بەرى ءومىر ءسۇرىپ كەلە جاتقان ومىرشەڭ تۋىندىسى ورىندالماق. مۋزىكالىق قۋاتىمەن قايران قالدىراتىن جارقىن شىعارما وپەرا ونە­رىنىڭ بەلگىلى شەبەرلەرى قاتىسۋىمەن جۇزەگە اسىرىلماق. وعان ايرىقشا ءمان بەرىلىپ وتى­رۋ­ى­نىڭ تاعى ءبىر سەبەبى, مۇنداعى باستى پارتيانى ارمەنيانىڭ حالىق ءارتىسى بارسەگ تۋمانيان شىرقايدى. مەتس­تسو-سوپرانو پارتياسىندا – قازاق­ستاندىق كورەرمەننىڭ سۇيىكتى سو­ليستى, قازاقستاننىڭ ەڭبەك سىڭىرگەن قايراتكەرى دينا حامزينا. سونىمەن قاتار, الەمدىك دەڭگەيدەگى باسقا دا تەاتر­لاردىڭ سپەكتاكلدەرىندە جەتەك­شى پارتيالاردى ورىنداۋشى جۇپار عابدۋللينا – سوپرانو پارتياسىندا. ماريا تەاترىنان شاقىرىلعان تەنور ميحايل ۆەكۋا جوعارىدا اتالعان جۇلدىزدار ءتىزىمىن تۇيىندەيدى. ونىڭ جىبەكتەي ەسكەن تاماشا داۋىسىنا يس­پانيا, فرانتسيا, المانيا, نورۆەگيا, نيدەرلاند, اۆستريا جانە, ت.ب. ەلدەردىڭ جۇرتشىلىعى ەتەنە قانىق. سولاردىڭ ىشىنەن, ءانشىنىڭ وتكەن جىلى «استانا وپەرا» ساحناسىندا ر.ۆاگنەردىڭ «نيبەلۋنگ ساقيناسى» تەترالوگياسىنان «رەين التىنى» وپەراسىندا لوگە پارتياسىن (وت قۇدايى) شىرقاعانىن اتاپ وتۋگە بولادى. الەمدى مويىنداتقان «استانا وپە­را» تەاترىنىڭ اتاقتى حورى مەن سيم­فونيالىق وركەسترى باس حورمەيس­تەر, قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ پەن بەلگىلى ديريجەر, قازاقستاننىڭ ەڭبەك سىڭىرگەن قايراتكەرى ابزال ءمۇحيتدينوۆتىڭ باسقارۋىمەن ونەر كورسەتۋى ايشىقتى كەشكە ايرىقشا رەڭك بەرەرى ءسوزسىز. ەسكە سالا كەتەيىك, «رەكۆيەم» ال­عاش رەت 1874 جىلدىڭ 22 مامىرىندا عاجايىپ حوردىڭ, وركەستردىڭ جانە يتاليالىق انشىلەردىڭ قاتىسۋىمەن ميلاندا ورىندالعان بولاتىن. ول كەزدە ديريجەرلىك تىزگىندى ۆەرديدىڭ ءوزى ۇستاعان ەكەن. ساناۋلى كۇندەردەن كەيىن «رەكۆيەمدى» ميلاندىق «لا سكالا» تەاترى قويسا, ودان كەيىن تۋىندى پاريجدە, ۆەنادا, پەتەربۋرگتە ءھام باسقا قالالاردا ۇلكەن تابىسقا جەتكەن. قاي جەردە بولماسىن ۆەرديدىڭ ايتۋلى تۋىندىسىن جۇرت ىستىق ىقىلاسپەن قابىلداپ, ءتىپتى كەي جاعدايدا جەكەلەگەن نومىرلەرىن قايتالاپ تاماشالاۋدى تالاپ ەتەتىن بولعان. جالپى, بۇل «رەكۆيەم» ۆ.ا. موتسارتتىڭ «رەكۆيەمىنىڭ» جانىندا اتالعان جانرداعى ەڭ ءجيى ورىندالاتىن شىعارمالاردىڭ ءبىرى بولىپ سانالادى. ال «استانا وپەرا» تورىندە مۋزى­كالىق تۋىندى ەرەكشە كۇيدە ورىندالادى. ويتكەنى, I دۇنيەجۇزىلىك رۋحاني كەلىسىم كونگرەسىنىڭ ۇندەۋحاتىندا 18 قازاندى رۋحاني كەلىسىم كۇنى, قاقتىعىستار مەن سوقتىعىستاردى توقتاتۋ كۇنى, تاتۋلاسۋ جولدارىن ىزدەۋ, ادامدار اراسىندا بىرىنە ءبىرى تۇسىنىستىكپەن قاراۋدى قالىپتاستىرۋ كۇنى, جاقىندارىنا مەيىرىمدىلىك پەن كومەك كورسەتۋ كۇنى دەپ جاريالاۋ تۋرالى شەشىم قابىلدانعانى ءمالىم. جيىرما جىلدان بەرى ەلىمىزدە ۇزىلمەي اتالىپ كەلە جاتقان كەلىسىم مەرەكەسىمەن مۇنداي ءىرى تۋىندىنىڭ سايكەس كەلۋى تەگىن وقيعا بولماسا كەرەك. قارشىعا كۇلەن. استانا.