الماتىداعى قىزدار ۋنيۆەرسيتەتىندە جۇما كۇنى اياقتالعان «ءىى حالىقارالىق تۇركى الەمى زەرتتەۋلەرى» سيمپوزيۋمى اياسىندا دۇبىرلەتكەن «ءتۇبى ءبىر تۇركىمىز» فەستيۆالى بولىپ ءوتتى.
وسىمەن سەگىزىنشى رەت وتكىزىلىپ وتىرعان ءداستۇرلى فەستيۆال قىزدار ۋنيۆەرسيتەتى ستۋدەنتتەرى مەن وقىتۋشىلارىنان قۇرالعان ۇلت-اسپاپتار وركەسترىنىڭ ورىنداۋىنداعى «شاتتىق وتانى» كۇيىمەن جانە مىڭداعان شاقىرىم جەر باسىپ كەلگەن تۇرىك ەلى ونەرپازدارىنىڭ كونتسەرتتىك باعدارلاماسىمەن اشىلدى.
«تانىسايىق ءسىز بەن ءبىز», «اتا سالتىم – اسىل قازىنام» اتتى ەكى بولىمنەن تۇراتىن فەستيۆالدىڭ ءبىرىنشى بولىمىندە تۇرىك, قىرعىز, وزبەك, باشقۇرت, ازەربايجان سىندى تۇركى حالىقتارىنىڭ ۇلتتىق ءان, بيلەرى ورىندالسا, ەكىنشى بولىمدە تۇركى الەمىندەگى ءار جۇرتتىڭ ادەت-عۇرپى, سالت-ءداستۇرى كورسەتىلدى. قازاق حاندىعىنىڭ 550 جىلدىعى مەن قازاقستان حالقى اسسامبلەياسىنىڭ 20 جىلدىعىنا وراي وتكىزىلگەن فەستيۆالدىڭ باستى قۇندىلىقتارىنىڭ ءبىرى – ءتۇرلى ۇلت وكىلدەرىن سومداعان ستۋدەنت جاستاردىڭ سول حالىقتىڭ تىلىندە ەركىن سويلەۋى مەن ۇلتتىق بيلەرىن تاماشا كورسەتە بىلگەندىگى, تامىرى ورتاق, ءدىڭى ءبىر, رۋحى اسقاق, ءدىلى ءبىر تۇتاس جۇرتتىڭ جاڭعىرىپ جەتكەن جاقسىلىقتارى مەن جەتىستىكتەرىن باۋىرلاس حالىقتاردىڭ ءتىلى مەن تاريحىن, مادەنيەتىن بىلۋگە دەگەن اسقان قۇمارلىعى بولدى دەسە بولادى. قىزدار ۋنيۆەرسيتەتىنىڭ ستۋدەنتتەرى وقۋ ورنىندا اعىلشىن تىلىمەن قاتار, كورەي, قىتاي, فرانتسۋز, پارسى, اراب, تۇركى ءتىلدەرىن وقيدى. ءبىر سوزبەن ايتقاندا, فيلولوگ قىزدارىمىز ءوز ماماندىقتارىنىڭ قىر-سىرىمەن قاتار, ءتۇبى ءبىر تۇركى جۇرتىنىڭ بارلىق تىلدەرىن ءبىلىپ شىعادى. ەلدىگىمىز بەن ەرلىگىمىزدى, كەشەگى تىرلىگىمىز بەن بۇگىنگى بىرلىگىمىزدى ايداي الەمگە ايگىلەگەن, ادەمى ادەپتىڭ, ومىرشەڭ ونەگەنىڭ ءۇلگىسىن كورسەتكەن فەستيۆال سوڭىندا ۇزدىك ونەر كورسەتكەندەر ءبىلىم ورداسىنىڭ جانە تۇركى حالىقتارىنىڭ مادەني قورىنىڭ ارنايى باعالى سىيلىقتارىمەن, ماقتاۋ قاعازدارىمەن ماراپاتتالدى. ەسكە سالا كەتەيىك, ءۇش كۇنگە سوزىلعان سيمپوزيۋم جۇمىسىنا تمد ەلدەرى مەن تۇركيا, اقش, قىتاي, كورەيا, نيدەرلاند, سەربيا سىندى الەمنىڭ 20-عا جۋىق مەملەكەتى مەن قازاقستاننىڭ بارلىق ايماعىنان 500-دەن استام تۇركىتانۋ عىلىمىمەن اينالىساتىن عالىمدار قاتىستى.
ايناش ەسالي, «ەگەمەن قازاقستان».
الماتى.
