جول كارتاسىنىڭ بەكىتىلگەنىنە ەكى جىل تولدى. احۋال قانداي؟

ماجىلىستە پالاتا سپيكەرى قابيبوللا جاقىپوۆتىڭ توراعالىعىمەن وتكەن جالپى وتىرىستا دەپۋتات روزاقۇل حالمۇرادوۆ ءبىلىم جانە عىلىم ءمينيسترى ا.سارىنجىپوۆكە دەپۋتاتتىق ساۋال جولدادى. وندا بىلاي دەلىنەدى: «قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسىندا 2020 جىلعا قاراي مەملەكەتتىك ءتىلدى بىلەتىن قازاقستاندىقتاردىڭ سانىن 95 پايىزعا دەيىن جەتكىزۋ, مەكتەپ ءبىتى­رۋشىلەردىڭ 100 پايىزى مەملەكەتتىك ءتىلدى مەڭ­گەرۋى كەرەك دەگەن مىندەت قويىلعان. مەملەكەتتىك باعدارلاماداعى وسى نىسانالى ينديكاتورلاردى ىسكە اسىرۋدىڭ ءبىر تەتىگى رەتىندە قازاقستان رەسپۋبليكاسى ءبىلىم جانە عىلىم مينيسترلىگى تاراپىنان ەلىمىزدەگى قازاق تىلىنەن باسقا ۇلتتىق تىلدەردە وقىتاتىن مەكتەپتەردە كوپتىلدى جانە بيلينگۆالدى ءبىلىم بەرۋدى ەنگىزۋدىڭ 2013-2015 جىلدارعا ارنالعان جول كارتاسى بەكىتىلگەن بولاتىن. وندا اتالعان مەكتەپتەردە نەگىزگى پاندەر ءبىر مەزگىلدە ءبىر ساباق ۇستىندە ەكى نەمەسە ءۇش تىلدە جۇرگىزىلۋى نەمەسە كەيبىر پاندەردىڭ قازاق تىلىندە وقىتىلۋى قاراستىرىلعان. بۇل ءادىس وڭتۇستىك قازاقستان وبلىسى, سايرام اۋدانىنداعى يۋ.سارەمي اتىنداعى وزبەك تىلىندە ساباق بەرەتىن مەكتەپ-گيمنازيانىڭ تاجىريبەسىندە وڭ ناتيجە بەرگەن. كوپتىلدى جانە بيلينگۆالدى ءبىلىم بەرۋ تۋرالى جول كارتاسى بەكىتىلگەنىنە ەكى جىل تولدى. وتكەن ۋاقىت ىشىندە ەلىمىزدە قازاق تىلىنەن باسقا تىلدەردە وقىتاتىن وبلىستار, استانا جانە الماتى قالالارى بويىنشا قانشا مەكتەپ بار, سولاردىڭ قانشاسىندا قايسى پاندەردى قازاق تىلىندە وقىتۋ قولعا الىندى؟ كوپتىلدى جانە بيلينگۆالدى وقىتۋ ادىستەمەسى ءبىلىم بەرۋ مەملەكەتتىك ستاندارتىنا ينتەگراتسيالانعان با؟ وسى ادىسپەن وقىتاتىن مۇعالىمدەردىڭ بىلىك­تىلىگىن ارتتىرۋ, ولاردىڭ ەڭبەگىن ىنتالاندىرۋ ماسەلەلەرى قالاي شەشىلگەن؟ جالپى, 2020 جىلعا قاراي مەكتەپ ءبىتى­رۋ­شىلەردىڭ 100 پايىزى مەملەكەتتىك ءتىلدى مەڭگەرۋى ءۇشىن قانداي ءىس-شارالار اتقارىلۋدا؟ وسى دەپۋتاتتىق ساۋالعا «قازاقستان رەسپۋب­ليكاسىنىڭ پارلامەنتى جانە ونىڭ دەپۋ­تات­تارىنىڭ مارتەبەسى تۋرالى» قازاقستان رەسپۋب­ليكاسى كونستيتۋتسيالىق زاڭىنىڭ 27-بابىنا سايكەس جازباشا جاۋاپ بەرۋىڭىزدى سۇرايمىن».