وسكەمەن. 5 شىلدە. الەكساندر پۋشكين اتىنداعى وبلىستىق كىتاپحانادا وبلىس اكىمىنىڭ ورىنباسارى جاقسىلىق ومار, وبلىستىق ارداگەرلەر كەڭەسىنىڭ توراعاسى ۆاسيلي احاەۆ, وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى ايجان سادىقوۆانىڭ قاتىسۋىمەن شىعىس قازاقستان ءوڭىرىنىڭ ارداگەرلەرىنە ارنالعان www.veteran-vko.kz سايتىنىڭ تۇساۋكەسەرى ءوتتى. بۇل تۋرالى egemen.kz حابارلادى.
ۇلى جەڭىستىڭ 70 جىلدىعىنا وراي جاسالعان سايتتى وبلىستىق مادەنيەت, مۇراعات جانە قۇجاتتاما باسقارماسى «ۆوستوك ون-لاين» كومپانياسىنىڭ تەحنيكالىق قولداۋىمەن ىسكە اسىردى. جاڭا سايتتى اتالعان باسقارما باسشىسىنىڭ ورىنباسارى راۋشان نۇرمۇحانوۆا تانىستىردى. پورتال «كەڭەس وداعىنىڭ باتىرلارى», « ۇلى وتان سوعىسىنا قاتىسۋشىلار», «داڭق وردەنىنىڭ تولىق كاۆالەرلەرى», «تىلداعى ەڭبەگىمەن جەڭىستى شىڭداعان», «ولاردىڭ ەسىمىمەن اتالعان», «ارداگەرلەر كەڭەسى» ىسپەتتى بىرنەشە بولىمدەردەن تۇرادى. سايتتا بەرىلگەن اقپاراتتار وبلىستىڭ مۇراعاتتارى مەن مۇراجايلارىنان, كىتاپحانالارىنان الىندى. اقپاراتتارمەن بىرگە قۇجاتتار جيناعى, فوتوسۋرەتتەر, مايدان حاتتارى, مەكتەپ وقۋشىلارى جازعان شىعارمالار ەندى. مۇندا سوعىس ارداگەرلەرىنىڭ باسىنان كەشكەندەرى, مايدانداستارى تۋرالى جاندى داۋىستا اڭگىمەلەگەن بەينە جازبالارى جيناقتالعان.
«سايتتاعى اقپاراتتار ۇنەمى تولىقتىرىلىپ وتىرادى. سوعىسقا قاتىسىپ, تىلدا ەڭبەك ەتكەن تۋىستارى, تانىستارى جايلى اقپاراتتى جەرلەستەرىمىز سايتتاعى «قوناق كىتابىنا جازبا قالدىرۋ» ايدارىنا قالدىرا الادى», – دەدى راۋشان نۇرمۇحانوۆا.
دۋمان اناش.
دەرەك, سۋرەت: egemen.kz.
