ەلشىمەن ەكىجاقتى اڭگىمە

پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى ماۋلەن اشىمباەۆ كۋۆەيتتىڭ قازاقستانداعى توتەنشە جانە وكىلەتتى ەلشىسى تارەك ابدۋللا ءال-فارادجبەن كەزدەستى, دەپ حابارلادى وسى پالاتانىڭ ءباسپاسوز قىزمەتى. كوميتەت توراعاسى تارەك ابدۋللانى استانادان كۋۆەيت ەلشىلىگى اشىلۋىمەن جانە ونىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى بولىپ تاعايىندالۋىمەن قۇت­تىق­تادى. قازاقستاندا ەل-كۋۆەيتتە ءوز ەلشىلىگىن اشقان بولاتىن. ەندى ەلشىلىكتەر ەكى ەل اراسىنداعى ­ساياسي, ەكونوميكالىق جانە ءما­دە­ني-ىزگىلىكتى بايلانىستاردىڭ ۇلعايا تۇسەتىنىنە قىزمەت ەتەتىنىنە سەنىم ءبىلدىردى. – قازاقستاننىڭ سىرتقى سايا­ساتىندا يسلام الەمى مەن مۇسىل­مان ەلدەرى ەرەكشە ورىن الاتىن­دىقتان, ەلىمىز كۋۆەيتپەن بارلىق سالادا ىنتىماقتاستىقتى نىعايتۋعا مۇددەلى. مەملەكەتتەر اراسىنداعى ءوزارا بايلانىس 1997 جىلى قازاقستان پرەزيدەنتى ن.نازارباەۆتىڭ رەسمي ساپارى نەگىزىندە قالانعان. ەكى ەل اراسىنداعى پارلامەنتارالىق بايلانىستار دا ەكىجاقتى ىنتىماقتاستىقتى ۇيلەستىرۋمەن حالىقارالىق ارەناعا شىعۋعا قولايلى جاعداي تۋعىزادى, – دەدى ماجىلىسمەن. سونىمەن قاتار, ول قازاقستان حالقى كۋۆەيتتىڭ كەزىندە استا­نانىڭ قۇرىلىستارىنا دوستىق كومەكتەرى ءۇشىن العىس ايتاتىنىن دا جەتكىزدى. قازاقستاننىڭ 2017-2018 جىلدارى بۇۇ قاۋىپسىزدىك كەڭەسىنە تۇراقتى ەمەس مۇشە بولۋعا ۇمتىلىسىن قولداعانى ءۇشىن دە ريزاشىلىق ءبىلدىرىلدى. ەلوردادا ەكسپو-2017 حالىق­ارالىق كورمەسىنىڭ وتەتىنىن حابارلاپ, كۋۆەيت ۇكىمەتى مەن ىسكەرلەر ورتاسىنىڭ الەمدىك اۋقىمداعى شاراعا اتسالىساتىنىنا سەنىم ءبىلدىردى. كۋۆەيت ەلشىسى ءوز كەزەگىندە قازاقستان مەن كۋۆەيت اراسىن­داعى ىنتىماقتاستىق جايىن­دا ءسوز قوزعادى. قازاقستاننىڭ ور­تا­لىق ازيا ايماعى مەن الەمدىك دەڭگەيدەگى ءرولىن ايرىقشا با­عالاپ, ەكى ەل اراسىنداعى سايا­سي, ەكونوميكالىق جانە پار­لا­مەنت­ارالىق بايلانىستار جايىندا اڭگىمەلەدى.