پەتروپاۆل مۇگەدەكتەرىنە 23 ملن. تەڭگەنىڭ مەديتسينا قۇرالدارى بەرىلدى

پەتروپاۆل. 22 مامىر.  وبلىس ورتالىعىندا تۇراتىن 10 مىڭعا جۋىق مۇمكىندىگى شەكتەۋلى جاندارعا مەملەكەت تاراپىنان جاردەم جۇيەلى تۇردە كورسەتىلىپ كەلەدى. بيىل ولاردىڭ ءبىر توبىنا 23 ميلليون تەڭگەنىڭ مەديتسينالىق قۇرال-جابدىقتارى تاپسىرىلدى. بۇل تۋرالى وبلىستىق ەڭبەكپەن قامتۋ جانە الەۋمەتتىك باعدارلامالار باسقارماسىنىڭ ماماندارى حابارلادى. اتاپ ايتقاندا, 82 ادام قولارباعا, قۇلاعى كەمىس 47 ادام 165 سۋردوقۇرالعا, كوزى ناشار كورەتىن 26 ادام 159 تيفلوقۇرالعا يە بولدى, 211 ادامعا گيگيەنالىق جابدىقتار ساتىپ الۋعا 23,6 ميلليون تەڭگە ءبولىندى.  344 قارىپ جان شيپاجايلار مەن ەمدەۋ-ساۋىقتىرۋ ورىندارىندا بولىپ, دەنساۋلىقتارىن جاقسارتىپ قايتتى.  بۇل ماقسات ءۇشىن 75 ادامعا جەرگىلىكتى قازىنادان 8 ميلليون تەڭگە ءبولىندى. 167 ادامعا تۇراقتى مۇگەدەكتىك كومەك كورسەتىلەدى. «28 جاسىمدا ەكى اياعىمنان ايرىلىپ, ءبىرىنشى توپتاعى مۇگەدەك بولىپ قالدىم. بۇعان دەيىن ەسكى ۇلگىدەگى مۇگەدەكتەر ارباسىن پايدالانىپ كەلسەم, ەندى جاڭاسىن بەردى. كوشەدە قىدىرۋعا وتە قولايلى», دەيدى قۋانىشىن جاسىرا الماعان سەرگەي ساپكو. 10 جاستاعى مۇگەدەك قىزدىڭ اناسى ايناش توعاەۆا 2006 جىلدان بەرى تەگىن مەديتسينالىق گيگيەنالىق قۇرال-جابدىقتار الىپ كەلەدى. ءومىر ەسقالي. دەرەك: سولتۇستىك قازاقستان وبلىستىق ەڭبەكپەن قامتۋ جانە الەۋمەتتىك باعدارلامالار باسقارماسى. سۋرەت: egemen.kz