بۇگىن قازاقستاننىڭ باسىم بولىگىندە قولايسىز اۋا رايى ساقتالادى

استانا. 5 شىلدە. بۇگىن ەلىمىزدىڭ باسىم بولىگىندە تۇراقسىز اۋا رايى ساقتالادى. سينوپتيكتەر ءفرونتالدى بولىكتەردىڭ وتۋىنە بايلانىستى كەي جەرلەردە نايزاعاي ويناپ, جاڭبىر جاۋىپ, جەل كۇشەيەتىنىن ايتۋدا. بۇل تۋرالى «قازاقپارات» حابارلادى. «قازگيدرومەت» ماماندارى قازاقستاننىڭ سولتۇستىگى مەن شىعىسىنىڭ كەي جەرلەرىندە بۇرشاق جاۋى ىقتيمال دەپ وتىر. ال وڭتۇستىك پەن باتىستا جاۋىن-شاشىنسىز اۋا رايى ساقتالادى. اقمولا, سولتۇستىك قازاقستان, پاۆلودار, شىعىس قازاقستان وبلىستارىنىڭ كەي جەرلەرىندە نايزاعاي ويناپ, جەل 15-20 م/س كۇشەيىپ, بۇرشاق جاۋى ىقتيمال. وڭتۇستىك قازاقستان, كۇندىز اقتوبە, باتىس قازاقستان وبلىستارىندا جەلدىڭ ەكپىنى 15-20 م/س كۇشەيۋى كۇتىلەدى. تۇندە قىزىلوردا وبلىسىنىڭ كەي جەرلەرىندە نايزاعاي وينايدى. قوستاناي وبلىسىندا تۇندە كەي جەرلەردە نايزاعاي, تاڭەرتەڭ جانە كۇندىز جەل 15-20 م/س سوعادى. الماتى, جامبىل, قاراعاندى وبلىستارىنىڭ كەي جەرلەرىندە نايزاعاي بولىپ, جەل 15-20 م/س كۇشەيەدى. كۇندىز اقتوبە وبلىسىندا قاتتى ىستىق كۇتىلەدى. وڭتۇستىك قازاقستان, قىزىلوردا, اقتوبە وبلىستارىندا, اتىراۋ, باتىس قازاقستان, قاراعاندى, جامبىل, الماتى وبلىستارىنىڭ كەي جەرلەرىندە وتە جوعارى ءورت قاۋپى ساقتالادى. تالعات رايىمبەك. دەرەك, سۋرەت: «قازاقپارات».