لەنين پورترەتى – 5 ميلليون دوللار
امەريكالىق سۋرەتشى ەندي ۋورحول سالعان ۆلاديمير لەنيننىڭ پورترەتى Sothebys اۋكتسيونىندا 4,7 ميلليون دوللارعا ساتىلعان. ساۋدا-ساتتىققا دەيىن ونىڭ قۇنى 3,8-4,5 ميلليون دوللارعا باعالانسا كەرەك. كەڭەس وداعىنىڭ «كۇن كوسەمىنىڭ» پورترەتىنە ونىڭ 1897 جىلعى, قازىرگى كەزدە ماسكەۋدەگى لەنين ورتالىق مۋزەيىندە ساقتاۋلى تۇرعان سۋرەتى پايدالانىلىپتى.
ۋورحولدىڭ وزگە دۇنيەلەرى اۋكتسيوندا ەداۋىر ارزانعا باعالانعان. ماسەلەن, جاكلين كەننەديدىڭ پورترەتى 1 ميلليون دوللارعا ساتىلىپتى. پورترەت ونىڭ كۇيەۋى, اقش پرەزيدەنتى دجون كەننەدي ولتىرىلگەننەن كەيىن سالىنعانعا ۇقسايدى. كارتينا بۇعان دەيىن اقش-تىڭ, جاپونيا مەن ۇلىبريتانيانىڭ ءىرى گالەرەيالارىندا قويىلىپ كەلىپتى. ال سۋرەتشىنىڭ مەريلين مونرونىڭ بەينەسى سالىنعان پولوتنوسى 2,3 ميلليون دوللارعا ساتىلعان.
زەينەتكەر بالالار الاڭىن قيراتتى
رەسەيدىڭ تۆەر قالاسىندا زەينەتكەر ايەل اۋلاسىنداعى بالالار الاڭىن دەمونتاجداۋ ءۇشىن ءوز ەركىمەن ارنايى بريگادا جانە تەحنيكا جالداعان. وقىس وقيعا قالاداعى بلاگوەۆ كوشەسىندەگى №7 ءۇيدىڭ اۋلاسىنا قاتىستى ايتىلىپ وتىر. الاڭعا ارنايى تەحنيكا جەتكىزىلىپ, اتكەنشەكتەر مەن باسقا دا ءتۇرلى سناريادتار دەمونتاجدالىپ تاستالعان.
دەمونتاجداۋ بارىسىندا بالالارعا ارنالعان كەرەك-جاراقتىڭ كەيبىرى سىندىرىلىپتى. تۇرعىنداردىڭ ايتۋىنشا, زەينەتكەر كەمپىرگە بالالاردىڭ شۋى جاقپاسا كەرەك. بوساتىلعان ورىنعا ول كىر جاياتىن قۇرىلعى ورناتۋدى كوزدەگەن دەگەن دە نۇسقا بار. اتى-ءجونى ناقتى ايتىلمايتىن موسقال ايەل بۇعان دەيىن اكىمشىلىككە بالالار الاڭىن الىپ تاستاۋ تۋرالى وتىنىشپەن دە شىعىپتى. بىراق بۇل وتىنىشتەن باس تارتىلعان.
جاستاردى لاڭكەستىككە تارتقان يمام
گەرمانيانىڭ استاناسى بەرلين قالاسىنداعى موابيت اۋدانىنداعى مەشىتتە يمام بولىپ جۇرگەن رەسەي ازاماتى قاماۋعا الىندى. وعان جاستاردى «يسلام مەملەكەتى» دەلىنەتىن تەررورلىق توپتىڭ قاتارىنا تارتۋمەن اينالىسقان دەگەن ايىپ تاعىلىپ وتىر. گەرمانياداعى رەسەي ەلشىلىگىندەگىلەردىڭ حابارلاۋىنشا, ديپلوماتيالىق ميسسيادان كومەك سۇراپ ازىرشە ەشكىم قايىرىلماعان.
پروكۋراتۋرانىڭ مالىمەتتەرىنە قاراعاندا, تۇتقىنداۋ نەمىس استاناسىندا جۇزەگە اسىرىلعان. ۆەدومستۆودا ونىڭ اتى مۇرات دەلىنىپ وتىر. ال تەگىنىڭ العاشقى ءارپى «ا» ەكەن. داعىستان اۆتونومياسىنىڭ تۋماسى. ورىسشا جانە چەشەنشە شەشەن سويلەيتىنگە ۇقسايدى. گەرمانيا فەدەراتيۆتىك رەسپۋبليكاسىنداعى چەشەن قوعامىندا ايتارلىقتاي ىقپالى بار كورىنەدى.
لوندوندا باس اسپازشى تونالدى
بريتانيالىق باس اسپازشى دجەيمي وليۆەر توناۋشىلاردىڭ «قۇرباندىعىنا» اينالدى. ۇرلىقشىلار ونىڭ لوندوننىڭ سولتۇستىگىندەگى ۇيىنە ەپپەن كىرىپ, 2 ەلەكتر قۇرالىن ۇپتەپ كەتكەن. پوليتسيانى كىرەبەرىس ەسىكتىڭ اشىق قالعانىن كورگەن كورشىلەرى شاقىرىپتى. ال ۇرىلار ۇيگە جەرتولە ارقىلى كىرسە كەرەك.
«باعالى زاتتار ۇرلانعانى تۋرالى اقپارات جوق», – دەيدى باس اسپازشىنىڭ ءباسپاسوز حاتشىسى. ال قۇقىق قورعاۋ ورگاندارىنىڭ قىزمەتكەرلەرى بەينەباقىلاۋ كامەرالارىنداعى جازبالاردى تەكسەرۋگە كىرىسىپتى. ازىرشە ەشبىر كۇدىكتى انىقتالماعان. ۇرىلار ۇيگە تۇسكەن كەزدە وليۆەر زايىبىمەن جانە 4 بالاسىمەن ءوزىنىڭ ەسسەكس گرافتىعىنداعى ۇيىندە بولعان. ونىڭ شىلدە ايىندا ساتىپ الىنعان, VII عاسىردا سالىنعان ۇلكەن قامال-ءۇيى دە بار ەكەن.
بۇرىنعى ويىنشىنىڭ بۇزىقتىعى نەسى؟
اعىلشىننىڭ «مانچەستەر يۋنايتەد» كومانداسىنىڭ جانە فرانتسيا قۇراماسىنىڭ بۇرىنعى شابۋىلشىسى ەريك كانتونا Elle جۋرنالىنىڭ فرانتسۋز نۇسقاسىنىڭ مۇقاباسى ءۇشىن جالاڭاش كۇيىندە سۋرەتكە ءتۇسىپتى. 49 جاستاعى سپورتشى فوتوسەسسياعا ءوزىنىڭ زايىبى – 38 جاستاعى فرانتسۋز اكتريساسى راشيدا براكنيمەن بىرگە قاتىسقان.
بىراق راشيدا مۇقاباعا پالتومەن ءتۇسىپتى. باسىلىم, سونىمەن قاتار, كانتونامەن جانە براكنيمەن سۇحبات تا جاريالاعان. 2007 جىلى وتباسىن قۇرعان ەرلى-زايىپتىلار ماحاببات جانە وتباسىلىق قۇندىلىقتار تۋرالى وي-پايىمدارىمەن ءبولىسىپتى. تانىمال فۋتبولشى ءوزىنىڭ ويىنشى رەتىندەگى مانسابىن 1997 جىلى ءتامامداپ, سودان كەيىن كينو تۇسىرۋگە دەن قويعان ەدى. ال ول «مانچەستەر يۋنايتەدپەن» بىرگە 4 رەت انگليا چەمپيونى اتانعان بولاتىن.
زورلىق كورگەن ەركەكتەر ورتالىعى
شۆەتسيانىڭ ستوكگولمدەگى ءبىر كلينيكاسى زورلانعان ەر ادامدارعا كومەك كورسەتەتىن ورتالىق اشتى. ەندى اتالعان اۋرۋحانا ونىڭ باسشىلىعى مالىمدەگەن قاعيداتتى قاتاڭ ۇستاناتىن بولادى. ال باسشىلىقتىڭ قاعيداتى مىناداي: مەديتسينالىق قىزمەت كورسەتۋ ماسەلەسىندە جىنىستاردىڭ تەڭدىگىن قامتاماسىز ەتۋ.
«ءبىز زورلىققا ۇشىراعان ەركەكتەر ءۇشىن تۇڭعىش كلينيكا اشىپ وتىرعانىمىزعا قۋانىشتىمىز. بۇعان دەيىن ءبىز ايەلدەر ءۇشىن ءدال وسىنداي ورتالىق اشقان بولاتىنبىز», – دەيدى مەديتسينالىق ورتالىقتىڭ اشىلۋىندا ءسوز سويلەگەن ليبەرالدىق پارتيانىڭ ءباسپاسوز حاتشىسى راسمۋس يونلۋند. اتالعان ورتالىقتىڭ جۇمىسىنا, سونداي-اق, تسەنتريستەر, حريستياندىق دەموكراتتار پارتياسى قولداۋ كورسەتكەن.
اقپارات اگەنتتىكتەرىنىڭ ماتەريالدارى نەگىزىندە ازىرلەندى.
