قوستاناي وبلىسىندا ءورت ءسوندىرۋ بەكەتتەرى قۇرىلىپ جاتىر

قوستاناي. 22 مامىر. قوستاناي وبلىسىنداعى ەلدى مەكەندەردە, شارۋاشىلىقتاردا ءورت ءسوندىرۋ بەكەتتەرى قۇرىلۋدا. بۇل تۋرالى egemen.kz ءتىلشىسى حابارلادى. اۋىلدى جەرلەردەگى العاشقى ءورت ءسوندىرۋ بەكەتى اۋليەكول اۋدانىنداعى ديەۆ اۋىلىندا ۇيىمداستىرىلدى. سونان كەيىن وسى اۋدانداعى پەرۆوماي سەلوسىندا دا قۇرىلدى. سونىمەن قاتار سارىكول اۋدانىنداعى ۆەسەلوپودول اۋىلىندا دا ورتكە قارسى بەكەت قۇرۋ ماسەلەسى قارالىپ جاتىر.  جاز ايلارىندا ورماندى جەرلەردە دە, دالادا دا ءورت جيىلەيدى.  ونداي كەزدەردە اۋدان ورتالىقتارىنداعى ءورت ءسوندىرۋ بەكەتتەرىنەن ماشينا, ءورت سوندىرۋشىلەر جەتەم دەگەنشە, جەل ءورتتى ءورشىتىپ, شاما بەرمەي كەتەتىن كەزدە ءجيى كەزدەسەدى. «ديەۆ» اگروفيرماسىنىڭ جەتەكشىسى, بەلگىلى شارۋاشىلىق ۇيىمداستىرۋشى ولەگ دانيلەنكو بۇل ماسەلەگە ءجىتى قارادى. ويتكەنى اسىل تۇقىمدى مال وسىرۋمەن اينالىساتىن شارۋاشىلىققا ءشوپتىڭ ورتەنگەنى اسا كوپ شىعىن بولىپ ەسەپتەلەر ەدى. سوندىقتان شالعايدا جاتقان شارۋاشىلىق باسشىسى وزدەرىندە ءورت ءسوندىرۋ بەكەتىن سالۋعا  تاۋەكەل ەتكەن. وبلىستىق توتەنشە جاعدايدار دەپارتامەنتى باستىعىنىڭ مىندەتىن اتقارۋشى ۆيكتور شيللەر: «ديەۆتەگى ورتكە قارسى بەكەت سول ماڭداعى 300 تۇرعىنى بار 3 ەلدى مەكەندى, ورمان القاپتارىن ءتىلسىز جاۋدان قورعايدى. وعان قوستاناي وبلىستىق توتەنشە جاعدايلار دەپارمامەنتىنىڭ ءورت ءسوندىرۋ جانە اپاتتان قورعاۋ باسقارماسىنان ارنايى ماشينالار, ورتكە قارسى قولداناتىن جابدىقتار, جاتتىقتىرىلعان ماماندار مەن جۇرگىزۋشىلەر ءبولىندى. وسى بەكەتتىڭ كۇشىمەن ديەۆ اۋىلىندا ءبىر جانە ەكى دالا ءورتى ءسوندىرىلدى», دەدى. وبلىستا بارلىعى 40 ءورت ءسوندىرۋ بەكەتى قۇرىلاتىن بولادى. ولار 80 مىڭ تۇرعىنى بار 150 ەلدى مەكەندى قىزى جالىننان قورعايدى. ءنازيرا جارىمبەتوۆا. دەرەك, سۋرەت: egemen.kz