قۇران تەگىن تاراتىلدى

باس ءمۇفتي ەرجان قاجى مالعاجى ۇلىنىڭ يگى باستاماسىمەن باحرەيننەن قاسيەتتى كۇران كارىم جەتكىزىلگەن بولاتىن. وسى ىزگى باستامانىڭ نەگىزىندە وبلىستىق ورتالىق «نۇر-عاسىر» مەشىتىندە مۇسىلمان بالاسىنىڭ جارىق نۇرى, قاسيەتتى كىتاپتى بارلىق مەشىتتەرگە تاراتۋ ءراسىمى بولدى. وندا «قۇران كارىم» كىتابى وڭىردەگى ءار مەشىتكە 15 دانادان, قوسىمشا وكىلدەرگە كەلەشەك اشىلاتىن مەشىتتەر ءۇشىن 1000 دانادان جانە قمدب-نىڭ قىزمەتكەرى سابيت يبادۋللاەۆتىڭ ەڭبەگىمەن جارىق كورگەن «قۇران جانە ماعىنالىق اۋدارماسى» اتتى كىتابى تەگىن ۇلەستىرىلدى. اتالعان شارا بارىسىندا اقتوبە وبلىستىق ورتالىق مەشىتىنىڭ نايب يمامى سەرىكجان ەنشىباي ۇلى جينالعان يمامدار قاۋىمىنا ءسوز ارناپ, بۇل قاسيەتتى «قۇران كارىم» بارشا ايماقتىڭ مۇسىلمان قاۋىمىنا بەرىلگەن ەرەكشە تارتۋ, تەڭدەسى جوق سياپات ەكەنىن, سىيعا تارتىلعان قۇران ءاربىر مەشىتتىڭ سورەسىندە مىندەتتى تۇردە جاماعات پايداسى ءۇشىن تۇرۋى تيىستىگىن جەتكىزدى. الەمدە ەڭ كوپ وقىلاتىن, وقىلۋىنىڭ ءوزى قۇلشىلىق بولىپ سانالاتىن, ءار ارپىنە ساۋاپ جازىلاتىن, قانشا وقىساڭ دا جالىقتىرمايتىن, سىرى, حيكمەتى مەن دانالىعى تاۋسىلمايتىن كىتاپ – قۇران ەكەن. قۇران ادامزاتتى شەكسىز باقىتقا جەتەلەيتىن, تۋرا جول كورسەتەتىن, قيامەتكە دەيىن وزگەرمەيتىن ماڭگى مۇعجيزا بولىپ تابىلادى. قۇران – سوڭعى پايعامبارلىقتىڭ دالەلى, تۋرا ءدىننىڭ ءۇنى ءارى يسلام شاريعاتىنىڭ اتا زاڭى. قۇران وقىعان ادامنىڭ بۇكىل بولمىسىمەن وزگەرگەنىن بايقايسىڭ. قۇرانعا دەگەن ماحاببات ونى وقۋعا بايلانىستى. باحرەيندەگى قۇران تاراتۋ قايىرىمدىلىق ۇيىمىنىڭ ۇيىتقى بولۋىمەن حالىقتىڭ يسلامي ساۋاتىن كوتەرۋ ماقساتىندا قۇران جانە ونىڭ ءارتۇرلى تىلدەردەگى اۋدارماسى بۇعان دەيىن پالەستينادا – 250 000, كامەرۋندا – 200 000, يەمەن, ەگيپەت, ۋگاندا, يسپانيا, فيليپپين جانە شري-لانكا مەملەكەتتەرىنىڭ ارقايسىسىندا 100 000 دانادان ۇلەستىرىلگەن ەكەن. مىنە, ەندى قازاق ەلىنە دە بۇل ءۇردىس جەتىپ, حالىقتىڭ ءدىني ساۋات اشۋىنا كومەگى تيەتىن بولدى. مۇنىڭ ءوزى ساۋاپتى ءىس ەكەنى ءسوزسىز. ساتىبالدى ءساۋىرباي, «ەگەمەن قازاقستان». اقتوبە وبلىسى.