جۇرەگى جوق جۇرگىزۋشى

تەمىرتاۋلىق اۆتوبۋس جۇرگى­زۋشىلەرىنىڭ تۇستەرىنىڭ سۋىقتىعى سونداي, ولار قاباقتارىن تۇيسە بولدى, قالانىڭ توبەسىندەگى قويۋ ءتۇتىن ىدىراپ, دومنا پەشىندەگى بالقىعان شويىن قايتادان قاتىپ قالادى. ءيا, ولاردىڭ قاباقتارى قاتۋلى-اق. ءبىر قولى رۋلدە بول­سا, ەكىنشى قولى جۇدىرىق بولىپ تۇيىلگەن. جولاقىسىن تولە­مەسەڭىز – توبەڭىزدەن ءتۇيىپ جىبە­رۋ ولار ءۇشىن تۇككە دە تۇرمايتىن شىعار. ءتۇيىپ قانا قويسا جاقسى-اۋ, جەلكەڭىزدەن الىپ اۆتوبۋستان لاقتىرىپ جىبەرۋى دە بەك مۇمكىن... تاياۋدا عانا بولعان مىنا وقيعا­دان سوڭ وسىلاي دەمەسكە لاجىڭ جوق. قالاداعى مارشرۋتتاردىڭ بىرىنە قاتىنايتىن اۆتوبۋسقا مىنگەن مەكتەپ وقۋشىسىنىڭ – جاپ-جاس بالانىڭ جولاقى تولەر كەزدە 10 تەڭگەسى جەتپەي قالىپتى. ويىن بالاسى عوي, جۇگىرىپ جۇرگەنىندە جوعالتىپ الدى ما ەكەن؟ سودان, ايالداماسىنا جەتكەندە بالا جىلامسىراپ, جۇرگىزۋشىدەن ءبىر جولعا راحىم ەتىپ ءتۇسىرۋىن سۇرايدى عوي. الايدا, تەمىرتاۋلىق جۇرگىزۋشىنىڭ قاباعى تاستاي ءتۇيىلىپ, اۆتوبۋستىڭ ەسىگىن تارس جاۋىپ العان. ءابۇيىر بولعاندا, جولاۋشىلار اراسىنان قايىرىمدى ءبىر جان تابىلىپ, بالانىڭ جەتپەي قالعان جولاقىسىن تولەپتى. سوندا عانا كوڭىلى كوكتەمىر جۇرگىزۋشى ەكى ايالدامادان ءوتىپ بارىپ, بالانى اۆتوبۋستان تۇسىرگەن... الگى بالانىڭ اناسى ۆيكتوريا ۆەلماكينانىڭ ايتارعا ءسوزى جوق. «بالانىڭ جىلاعانىنا جۇرگىزۋشى تۇكىرىپ قويعان عوي. جەتپەي قالعان تيىنىن تولەپ بەرگەن قىزعا باسىمىزدى ءيىپ, العىس ايتامىز. مەن وسى جۇرگىزۋشىلەردى تۇسىنە المايمىن, حايۋانعا اينالىپ بارا ما؟ الەۋمەتتىك جاعىنان از قامتىلعان وتباسىلاردىڭ بالالارى بار. ەندى كەلىپ سولاردىڭ ءبارىن كۇننىڭ سۋىعىنا قاراماي اۆتوبۋستان لاقتىرا بەرۋ كەرەك پە؟ ءبىز قايدا بارا جاتىرمىز, ءوزى؟!», دەپ جازىپتى الەۋمەتتىك جەلىدە اشىنعان انا. ءبىر قىزىعى, تەمىرتاۋداعى اۆتوبۋس پاركىندەگىلەر بۇل وقيعادان حاباردار ەكەن. قازىرگى ۋاقىتتا ماسەلەنىڭ اق-قاراسى انىقتالىپ جاتقانعا ۇقسايدى... قايرات ءابىلدينوۆ, «ەگەمەن قازاقستان». قاراعاندى وبلىسى.