جاڭبىردان قىردا ءدۇبىر باسەڭدەپ تۇر - قوستاناي وبلىسى

قوستاناي. 22 مامىر. قوستاناي وبلىسىندا تولاسسىز جاۋعان جاڭبىر ديقاندارعا كوكتەمگى دالا جۇمىستارىن جۇرگىزبەي وتىر. وبلىس بويىنشا نەبارى 264 مىڭ گەكتار القاپقا عانا ءدان سەبىلگەن.  بۇل تۋرالى egemen.kz ءتىلشىسى حابارلادى. بۇگىندە ازداعان جۇمىس تەك وبلىستىڭ وڭتۇستىگىندەگى امانكەلدى, جانكەلدين, جىتقارا, دەنيسوۆ, ناۋىرزىم اۋداندارىندا عانا ءجۇرىپ جاتىر. ولاردا بارلىق القاپتىڭ 10-30 پايىزى ارالىىعندا ءدان سەبىلدى. الايدا قالعان اۋدانداردا تولاسسىز جاڭبىردان تراكتور جۇرە الماي تۇر. قوستاناي اۋدانىندا بارلىق القاپتىڭ 0,3 مەڭدىعارا اۋدانىندا 0,6, فەدوروۆ اۋدانىندا 0,1 پايىزىنا عانا ءدان ءسىڭىرىلدى. كۇن دە جاۋعان جاڭبىر جەردىڭ كەبۋىنە مۇرسات بەرمەي جاتىر. سوڭعى كوپ جىلداردىڭ تاجىريبەسى بويىنشا مامىر ايىندا 33 مم جاڭبىر جاۋادى ەكەن, ال بيىل مامىر ايىنىڭ ەكى ون كۇندىگىندە بۇل كورسەتكىش 66 مم بولعان. وبىلستىق اۋىل شارۋاشىلىعى باسقارماسىنىڭ ءبولىم باسشىسى ءسالىمجان ەسەنامانوۆ: «وبلىس القاپتارىندا جاڭبىردىڭ سالدارىنان قيىن جاعداي قالىپتاسىپ وتىر. اگرارلىق تالاپتار بويىنشا ءدان جەرگە مامىر ايىنىڭ 15-نەن 1 ماۋسىمعا دەيىن ءسىڭىرىلۋى كەرەك. مامىردىڭ 15-نەن بۇگىنگە دەيىن ەگىلگەن ەگىن القابى 500 مىڭ گەكتارعا جەتكەن جوق. وتكەن جىلدىڭ وسى مەرزىمىندە وبلىستا 961 مىڭ گەكتارعا ءدان سەبىلگەن ەدى. سينوپتيكتەر الداعى اپتانىڭ سوڭىنا قاراي تاعى دا جاڭبىر جاۋاتىنىن ايتىپ وتىر» دەدى. وبلىستا بارلىعى 4 ميلليون 700 مىڭ گەكتارعا ەگىن ەگىلۋى كەرەك. ونىڭ ىشىندە ءداندى داقىلدار مەن بۇرشاق تۇقىمداستار 4 ميلليون 143 مىڭ گەكتارعا سەبىلۋى ءتيىس. جاڭبىر جاۋعان سايىن ارام ءشوپ تە قاۋلاپ بارادى. ديقانداردى بۇل دا مازالاپ وتىر. ءنازيرا جارىمبەتوۆا. دەرەك, سۋرەت: egemen.kz